«Jon nas nienavidzić — i nienavidzić paśladoŭna». Jak rasijskija vajennyja błohiery acanili novaha hałoŭnakamandujučaha USU
Pryznačeńnie 43‑hadovaha Michaiła Drapataha hałoŭnakamandujučym Uzbrojenych sił Ukrainy vyklikała aktyŭnuju reakcyju ŭ supolnaści rasijskich vajennych błohieraŭ. Pry hetym adzinstva ŭ acenkach niama.
Jašče napiaredadni pryznačeńnia aŭtar telehram-kanała «Zapiski vietierana» Alaksiej Karhapolcaŭ prahnazavaŭ, što Drapaty moža stać bolš składanym supiernikam dla rasijskaj armii, čym jahony papiarednik. Na dumku błohiera, hałoŭnaja pieravaha novaha hałoŭnakamandujučaha — uzrost i dośvied, atrymany ŭžo padčas vajny.
«Ci budzie Drapaty lepšy za Syrskaha — pabačym. Ale adna jahonaja pieravaha pierad Syrskim, jakaja moža abiarnucca dla nas minusam, — heta toje, što Drapaty vielmi małady (43 hady) i enierhičny. Padčas padziej 2014 hoda jon byŭ usiaho tolki kambatam i prasoŭvaŭsia pa karjernaj leśvicy ŭžo va ŭmovach vajny».
Telehram-kanał «Opieracija Z: Vojenkory Russkoj Viesny» na navinu ab pryznačeńni Michaiła Drapataha adreahavaŭ značna bolš emacyjna. Aŭtary nazvali novaha kiraŭnika USU «nacystam» i «rusafobam», apublikavaŭšy lehiendarnaje videa z Maryupala viasny 2014 hoda.
Hetaje ž videa vykarystaŭ i błohier Kirył Fiodaraŭ. Na jaho dumku, dziejańni Drapataha jašče ŭ 2014 hodzie śviedčać pra jahonaje staŭleńnie da Rasii.
«Jon nas nienavidzić — i nienavidzić paśladoŭna. A značyć, budzie imknucca zabivać, nie zvažajučy ni na jakija maralnyja abmiežavańni».
Fiodaraŭ taksama vykarystaŭ pryznačeńnie Drapataha jak nahodu dla zakliku da bolš žorstkich dziejańniaŭ rasijskaha boku.
«Pytańnie tolki ŭ tym: ci budziem my takimi ž u adkaz… ci narešcie vierniem sabie inicyjatyvu eskałacyi?»
Padobnym čynam aceńvaje novaha hałoŭnakamandujučaha i aŭtar kanała «Vojevoda vieŝajet», były lotčyk Alaksiej Ziemcaŭ. Jon ličyć, što hałoŭnaja admietnaść Drapataha — asabistaja varožaść da Rasii.
«U adroźnieńnie ad Syrskaha, jaki tolki «raŭnuj-zvažaj», Drapaty ščyra nas nienavidzić».
«Dla nas heta drenna», — zaŭvažaje błohier i vykazvaje nadzieju, što na svajoj pasadzie jon pratrymajecca niadoŭha.
Pry hetym jon sprabuje prynizić zdolnaści novaha hałoŭnakamandujučaha:
«Tyja, chto ličyć Drapataha piśmiennym kamandziram, pamylajucca. Vodhuki pra jaho vielmi nieadnaznačnyja. U nas chapaje tych, chto pierajšoŭ z taho boku i śćviardžaje, što Drapaty — nie taho ŭzroŭniu. Mnohija kažuć, što jon uvohule dubovy».
Jašče bolš rezka vykazaŭsia błohier Uładzimir Ramanaŭ. Jon śćviardžaje, što novy hałoŭnakamandujučy nibyta nie nadta kłapocicca pra svaich padnačalenych i aryjentujecca pieradusim na adnosiny z palityčnym kiraŭnictvam:
«Dla jaho najpierš važnaja blizkaść da viarchoŭ».
U jakaści arhumienta Ramanaŭ pryvodzić ułasnuju interpretacyju padziej vakoł Debalcava, śćviardžajučy, što Drapaty «pakinuŭ svaje vojski i ŭciok na mikraaŭtobusie». Paćviardžeńniaŭ hetamu vykazvańniu jon nie pryvodzić.
Najbolš strymanuju acenku daŭ błohier Michaił Źvinčuk, aŭtar telehram-kanała «Rybaŕ». Jon pryznaje, što Drapaty vyhladaje bolš niebiaśpiečnym praciŭnikam za Syrskaha, adnak ličyć, što ŭpłyŭ novaha hałoŭnakamandujučaha nie varta pieraaceńvać.
«Z adnaho boku, 43‑hadovy Drapaty ŭsio ž vyhladaje bolš niebiaśpiečnym voraham, čym zhadany Syrski. (…) Ale na piaty hod vajny asnoŭnyja prablemy USU (i, darečy, nie tolki ich) lažać nie ŭ płoskaści asoby hałoŭnakamandujučaha».
Na dumku Źvinčuka, deficyt asabovaha składu, prablemy z bojeprypasami i nastupalnym patencyjałam niemahčyma vyrašyć adnoj tolki zamienaj hienierała.
«U cełym asoba hałoŭnakamandujučaha USU abo ŭkrainskaha ministra abarony siońnia daloka nie hałoŭny faktar, jaki ŭpłyvaje na stratehičnyja raskłady. I zamiena adnaho na druhoha nie pryvodzić da efiektu z razradu: «raniej usio było drenna, a ciapier raptam usio stanie dobra».
Pry hetym jon admysłova zaŭvažaje, što taki pryncyp dziejničaje nie tolki ŭ dačynieńni da Ukrainy.
«Darečy, heta spraviadliva nie tolki dla Ukrainy. Jak i toje, što asnoŭnyja prablemy ŭłasnych uzbrojenych sił ciapier zaležać nie ad taho, chto siadzić u kreśle kamandujučaha armijaj praciŭnika».
Ciapier čytajuć
«Darahija, viesialiciesia, hulajcie i kuraleście. Niachaj na staraść u vas budzie zapas dobrych pieražyvańniaŭ». Apošni hod Śviatłany Kurs — u jaje dopisach1212
Kamientary