Da śmiarotnaha pakarańnia asudžany zabojca homielskaj studentki Natalli Jemialjančykavaj, 25- hadovy Alaksandr Hrunoŭ.
Takoje rašeńnie pryniała siońnia sudovaja kalehija pa kryminalnych spravach Homielskaha abłasnoha suda. Hrunoŭ pryznany vinavatym u zabojstvie z asablivaj žorstkaściu pa artykule 139 Kryminalnaha kodeksa.
Sprečki pa spravie ab žorstkim zabojstvie dziaŭčyny adbylisia 23 śniežnia ŭ Homielskim abłasnym sudzie. Hrunoŭ 20 vieraśnia 2012 z-za kryŭdy nanios nie mienš za 102 nažavyja ranieńni Natalli Jemialjančykavaj, ad čaho taja pamierła na miescy.
Raniej Homielski abłasny sud pryhavaryŭ Hrunova da vyšejšaj miery pakarańnia, adnak sudovaja kalehija pa kryminalnych spravach Viarchoŭnaha suda 22 kastryčnika admianiła śmiarotny prysud, nakiravaŭšy spravu na pierahlad.
26 listapada ŭ abłasnym sudzie pačaŭsia paŭtornaje słuchańnie spravy.
Padčas sprečak u paniadziełak dziaržaŭny abvinavaŭca zapatrabavała dla abvinavačvanaha vyšejšuju mieru pakarańnia — rasstreł.
Prakuror adznačyła, što Hrunoŭ učyniŭ złačynstva, jakoje šakiruje svajoj žorstkaściu, hety čałaviek niebiaśpiečny dla hramadstva. Na dumku dziaržabvinavaŭcy, u spravie šmat abstavinaŭ, što abciažvajuć vinu Hrunova, u toj čas jak źmiakčalnych — niama. Jaŭku z pavinnaj, napisanuju abvinavačvanym paśla dastaŭki ŭ milicyju, ličyć takoj akaličnaściu nielha, zajaviła prakuror.
Maci zabitaj studentki taksama zapatrabavała dla abvinavačvanaha vyšejšaj miery pakarańnia. «U jaho niama ni kropli žalu, ni kropli raskajańnia, jak jaho naohuł možna ličyć čałaviekam?» — zajaviła žančyna.
Jana taksama začytała paviedamleńnie ŚMI ź mierkavańniem Alaksandra Łukašenki ab homielskaj spravie. Kiraŭnik dziaržavy, u pryvatnaści, skazaŭ: «Kali ty, niahodnik i padonak, idzieš i nie pieršy raz užo ŭčyniaješ złačynstva, zabivaješ čałavieka, to jakoje prava ty maješ žyć na hetaj ziamli? Ja nie kryvažerny, ale adpłata i pakarańnie pavinnyja być adpaviednymi. Vaźmicie heta na kantrol. U advarotnym vypadku my nikoli nie naviadziem paradak i nikoli nie panizim hetuju tempieraturu ŭ hramadstvie. Ciažkija, asabliva ciažkija złačynstvy: vinavaty — adkazvaj na ŭsiu katušku».
Advakat abvinavačvanaha paprasiŭ sud pakarać Hrunova pazbaŭleńniem voli, ale nie rasstrełam, bo ŭpeŭnieny, što jon nie nastolki niebiaśpiečny dla hramadstva, jak ličyć dziaržabvinavaŭca.
Advakat pryvioŭ dovady ab źmiakčalnych abstavinach u spravie, u tym liku ab jaŭcy z pavinnaj: «Jana śviedčyć ab čystasardečnym pryznańni i raskajańni. Kali b abvinavačvany nie napisaŭ jaŭku z pavinnaj i naohuł admoviŭsia ad dačy pakazańniaŭ, było b vielmi składana dakazać jaho vinu. Usio abvinavačańnie budujecca na pakazańniach Hrunova».
Sam Hrunoŭ, jaki vystupiŭ z apošnim słovam u sudzie, tolki paprasiŭ daravańnia ŭ maci zabitaj dziaŭčyny i skazaŭ, što «nie viedaje, jak heta adbyłosia». Adnosna pakarańnia jon ni ab čym sud nie prasiŭ.
Treba adznačyć, što zabojstva studentki Hrunoŭ učyniŭ praz hod paśla adbyćcia pakarańnia za naniasieńnie ciažkich cialesnych paškodžańniaŭ, što paciahnuła śmierć: jon źbiŭ sužyciela svajoj maci.
Pa vynikach psichijatryčnaj ekśpiertyzy małady čałaviek pryznany adekvatnym, zaležnaści ad ałkaholu i narkotykaŭ u jaho nie vyjaŭlena. Adnak jon chvareje na źmiašanaje rasstrojstva asoby.
Kamientary