Ułady Francyi ŭ čaćvier abjavili, što francuzskija daktary ŭpieršyniu ŭ historyi vyjavili virus Šamonda, jaki zvyčajna paražaje žyvioł, u čałavieka. Hety pacyjent pamior, ale ŭłady padkreślivajuć, što heta byŭ asablivy vypadak, i ŭ cełym virus nie ŭjaŭlaje niebiaśpieki dla ludziej, piša Bi-bi-si.
Virus Šamonda zvyčajna pieradajecca siarod žyvioł praz ukusy drobnych kryvasmokavych nasiakomych. Jon cyrkuluje ŭ Afrycy i Azii ŭžo niekalki dziasiatkaŭ hadoŭ, a ŭ Jeŭropie byŭ upieršyniu vyjaŭleny hetym letam.
U sumiesnaj zajavie ministerstvaŭ achovy zdaroŭja i sielskaj haspadarki Francyi skazana, što va ŭmierłaha pacyjenta byli surjoznyja prablemy ź imunnaj sistemaj, i tamu jon ujaŭlaje saboj vyklučny vypadak.
«Nieŭrałahičnyja ŭskładnieńni, jakija naziralisia ŭ hetaha pacyjenta z paškodžańniem imunnaj sistemy pierad jaho śmierciu, ź vialikaj stupieńniu vierahodnaści možna źviazać z zaražeńniem virusam Šamonda», — zajavili francuzskija ministerstvy, padkreśliŭšy pry hetym, što śpiecyjalisty praciahvajuć kliničnyja, bijałahičnyja i epidemijałahičnyja daśledavańni hetaha vypadku.
Pavodle papiarednich źviestak, pamierły pacyjent zaraziŭsia virusam, kali jaho ŭkusiła moška.
Heta adbyłosia na ŭschodzie Francyi, dzie virus cyrkuluje siarod žyvioł.
Jeŭrapiejski centr prafiłaktyki i kantrolu zachvorvańniaŭ (ECDC) zajaviŭ, što ŭvažliva sočyć za francuzskim vypadkam i jaho nastupstvami.
«ECDC padtrymlivaje suviaź z francuzskimi ŭładami i jeŭrapiejskimi partniorami i vyśviatlaje patencyjnyja nastupstvy dla zdaroŭja hramadstva», — havorycca ŭ zajavie centra.
Jak paviedamlaje Suśvietnaja arhanizacyja zdaroŭja žyvioł (WOAH), siarod chatnich žyvioł virus Šamonda ŭ asnoŭnym paražaje bujnuju rahatuju žyviołu, ale jaho vyjaŭlali i ŭ koniej, aviečak i koz.
U bujnoj rahataj žyvioły jon vyklikaje vostruju dyjareju, lichamanku, drymotnaść i padzieńnie nadojaŭ. Jak paviedamlaje ahienctva Reuters, na francuzskich fiermach nadoi ŭ paražanych virusam Šamonda karoŭ źnizilisia ŭ čatyry razy.
Upieršyniu hety virus byŭ vyjaŭleny ŭ Nihieryi ŭ siaredzinie 1960‑ch hadoŭ i z taho času raspaŭsiudziŭsia na niekatoryja rehijony Afryki, a taksama na Japoniju.
U Jeŭropie prysutnaść virusa Šamonda zafiksavali ŭ kancy lipienia — analizy pakazali jaho najaŭnaść u žyvioł u paŭdniovaj Hiermanii, Šviejcaryi i va ŭschodniaj Francyi.
Z taho času, pavodle źviestak francuzskaha štotydniovaha vieterynarnaha biuletenia, jon vyjaŭleny ŭžo ŭ 14 krainach Zachodniaj Jeŭropy, ad Irłandyi i Partuhalii da Aŭstryi i Słavienii.
Ciapier čytajuć
Administratarka «Štaba Anošak» vałodaje biełaruskaj kampanijaj, datyčnaj da pastavak sankcyjnych paŭpravadnikoŭ u vajujučuju Rasiju3
Administratarka «Štaba Anošak» vałodaje biełaruskaj kampanijaj, datyčnaj da pastavak sankcyjnych paŭpravadnikoŭ u vajujučuju Rasiju
Rasijski repier Jahor Kryd źniaŭsia ŭ majcy z vyjavaj hieroja filma «Idzi i hladzi», jakomu damalavali pirsinh i tatuiroŭki. Cišotku vypuścili krama biełaruski44
Rasijski repier Jahor Kryd źniaŭsia ŭ majcy z vyjavaj hieroja filma «Idzi i hladzi», jakomu damalavali pirsinh i tatuiroŭki. Cišotku vypuścili krama biełaruski4
«Zaprasiŭ mianie na spatkańnie i pryjechaŭ na jaho z pakietam pamidoraŭ zamiest kvietak». Što ŭspaminajuć pra Jana Pamiedora Reuckaha, admina šmattysiačnaj supołki biełarusaŭ Polščy77
Kamientary