15 čałaviek zahinuli, bolš za 200 było paraniena ŭ najbolšym za apošnija 65 hadoŭ terarystyčnym akcie na terytoryi Biełarusi. Šakujučaja padzieja zdaryłasia 11 krasavika 2011 hoda na stancyi mietro «Kastryčnickaja». Heta było na zołku najbolšaha za apošnija hady finansavaha kryzisu.
Viarchoŭny sud Biełarusi pahadziŭsia z vynikami śledstva, pryznaŭ vinavatymi ŭ terakcie dvuch maładzionaŭ ź Viciebska: Dźmitryja Kanavałava i Uładzisłava Kavalova.
Śmiarotny prysud im byŭ nieŭzabavie vykanany. Kanavałaŭ i jaho rodnyja pasiŭna pastavilisia da vyraku. Kavaloŭ i jahonyja svajaki, adčajna pratestavali. Śledstva vyznačyła jahonuju rolu jak pamočnika.
Častka hramadskaści nie pahadziłasia z hetym.
Sapraŭdy, matyvy dziejańnia Kanavałava i Kavalova zastalisia zahadkaj. Pavodle śledstva, jany kiravalisia čysta chulihanskimi matyvami.
Naściarožvała, što śledstva źvinavaciła ich taksama ŭ arhanizacyi vybuchaŭ u Viciebsku ŭ 2005 hodzie, napiaredadni prezidenckaj kampanii. I ŭ 2008 hodzie — na kancercie z nahody 3 Lipienia, dzie prysutničaŭ Łukašenka.
Rasśledavańnie tych vybuchaŭ supravadžałasia masavymi aryštami dziejačoŭ apazicyi i było abodva razy napoŭnicu vykarystanaje dyktatarskaj prapahandaj.
Mnohija nie vierać, što dva abołtusy, zachoplenyja vybuchoŭkaj, mahli šeść hadoŭ zastavacca niezaŭvažnymi dla śpiecsłužbaŭ.
Mierkavana, vybuch adbyŭsia prykładna pamiž druhim i trecim vahonam na stancyi «Kastryčnickaja», kali jechać u bok vakzała. Mahčyma, bomba była zakładziena pad łaŭku, ad jakoj ničoha nie zastałosia. Mahutnaść vybuchovaha prystasavańnia składała ad 5 da 7 kh u traciłavym ekvivalencie. Jano było načynienaje mietałam.
Pra miesca vybuchu na stancyi mietro «Kastryčnickaja» nahadvaje hranit inšaha koleru.
Kamientary