«30 dzion nočy», «Vampirka»
Biazładnaje marnavańnie hrošaj – i stylovy nuar.
30 DZION NOČY (30 Days of Night)
ZŠA – Novaja Zelandyja, 2007, kalarovy, 113 chv.
Režyser: Dejvid Słejd
Roli vykonvajuć: Džoš Hartnet, Mielisa Džordž, Deni Hjustan, Ben Foster, Mark Bun Junijor, Mark Rendeł, Manu Benet
Žanr: Miasny vampirski film pavodle scenaru Styva Najłza, Ściuarta Bici, Brajana Nielsana pa komiksach Styva Najłza i Bena Templeśmita
Adznaka: 3,5 (z 10)
Maleńki haradok na Alascy. Apošni dzień napiaredadni doŭhaj zimovaj nočy, jakaja zaciahniecca na miesiac. Niechta pazabivaŭ usich sabakaŭ i źniščyŭ mabilniki. Pakul šeryf (Džoš Hartnet) sprabuje znajści vandałaŭ, prychodzić noč – a razam ź joj i chieŭra vampiraŭ, jakaja ładzić sabie bankiet…
Karcina Dejvida Słejda nia maje ničoha ahulnaha z chulihanskaj švedzkaj žachaŭkaj “30 dzion da dośvitku”. Stužka – ekranizacyja komiksaŭ. Ale režyser Dejvid Słejd, jaki prasłaviŭsia žorstkaj dramaj “Ladziaš” – anijak nie skarystaŭ vyjhryšnuju sytuacyju “doŭhaj nočy”.
Kardonavyja hieroi (na čale z Džošam Hartnetam) viała sprabujuć abaraniacca, vampiry nahadvajuć zubastych i mardatych bamžoŭ, zamiest pradumanaha dziejańnia – mantažnaje milhacieńnie kryvavych scenak. Dziaŭčynka-zabojca, pierakusanaje horła, kroŭ na śniezie, siakiera ŭ rukach – “darosły status” stužka zasłužyła. Ale heta nia značyć, što ad hetaha jana stałasia filmam.
Seansy ŭ mienskich kinateatrach. Ale hrošy lepiej aščadzić, kab uziać naprakat kudy lepšuju karcinu na ličbie.
VAMPIRKA ci PAŬSTAŃNIE (Vampirša / Rise)
ZŠA – Novaja Zelandyja, 2007, kalarovy, 94 chv.
Režyser: Sebaśćjan Hućjerez
Roli vykonvajuć: Lusi Lju, Džejmz D'arsi, Robert Forster, Majkł Čyklis, Kemieran Ryčardsan, Ałan Ryč, Samanta Šełtan, Kievin Ŭitli, Marho Haršman, Merylin Mensan
Žanr: Vampirski hanhsterski trymcieńnik-nuar
Adznaka: 6
Žurnalistka Sedzi Błejk zašmat viedała – i jaje zabili. Sedzi pračynajecca ŭ trupiarni j pačynaje pomścić svaim kryŭdnikam. Ale ciapier jana vampirka. Dyj jejnyja zabojcy zusim nia ludzi…
Vampirski hanhsterski nuar, dzie kiepski kiraŭnik bandy – fakturny ŭpyr-nicšeaniec (Džejmz D'arsi), hieroj-śledčy – ruchavaja niežyvaja pryhažunia z arbaletam u rukach (Lusi Lju), na epizodach – Merylin Mensan, a krovapuskańni maskujucca pad seryjnyja zabojstvy.
Jak i ŭ “Hoładzie” Toni Skota, kryvasmoki nia majuć ikłaŭ i karystajucca rytualnymi nažami. Pakuty sumleńnia, pomsta, dvuboj. Melancholija lohkaha kiču, načny horad – i niepatrebnaja damavina…
Darečy, pradusar takich roznych pa jakaści chorar stužak – Sem Rejmi.
Ciapier čytajuć
«Byŭ hałodny, jak z Aśviencima, nie jeŭ ni miasa, ni harodniny». Što viadoma pra śmierć babrujskaha žurnalista, na jakoha zaviali kryminalnuju spravu ŭ Polščy1616
Kamientary