Prasłaŭleny biełaruski futbalist Mustyhin: Nie baču pryčynaŭ, kab zaŭzieć za Rasiju

Adzin z samych słavutych savieckich futbalistaŭ 1960-ch — forvard minskaha «Dynama» Michaił Mustyhin — u intervju Radyjo Svaboda acaniŭ sioletni čempijanat śvietu ŭ Brazilii, prykinuŭ šancy biełaruskaj kamandy na ŭdzieł u forumach padobnaha maštabu.

— Vy naradzilisia ŭ Rasiei, tam pačynałasia vaša futbolnaja bijahrafija. Cikaviciesia hulnioj rasiejskaj zbornaj? Prynamsi, da pačatku čempijanatu rasiejcy kazyrali, što raźbiarucca z supiernikami adnoj levaj.

— Ja nie hladzieŭ pieršuju hulniu z Paŭdniovaj Karejaj, bo hulali ŭnačy. Choć chaciełasia skłaści niejkaje ŭjaŭleńnie, čamu zhulali 1:1. A voś jak učora z Belhijaj hulali, bačyŭ — prajhrali pa spravie. Kamanda słabaja, nia ŭraziła absalutna ničym. Tearetyčnyja šancy na płej-of jašče jość, ale ja na Rasieju nie spadziajusia, nie-nie. Astatnija kamandy zusim nie słabyja. Što tyčycca «adnoj levaj», to na čempijanacie śvietu źbirajucca kamandy, jakich tak lohka nie pierajhrać. I afrykanskija, i azijackija mabilizujucca, demanstrujuć vysoki klas. I addać kamuści pieravahu ciažka. Tamu ŭ Rasiei choć i kažuć, što kamanda ŭ ich salidnaja, ale adzin matč prajhrajuć — i ŭsio, dadomu. Belhijcy, adrozna ad rasiejcaŭ, hulniu pakazvajuć, z Alžyram taksama budzie nia prosta. Zaraz nie ŭhadaješ, dzie słabyja kamandy, a dzie mocnyja. Kali ščyra skazać, ja prosta hladžu futboł.

Chto vybitnuju hulniu pakazvaje, za taho i pieražyvaju, što mnie za Rasieju zaŭzieć? Za dobry futboł, za dobruju kamandu — heta tak. A najpierš zaŭzieju za tuju kamandu, dzie hulajuć zorki. Asabista mnie škada Ranałda, za jaho pieražyvaju.

Słaba Partuhalija zhulała, a što moža zrabić navat superzorka, kali kamanda jaŭna prajhraje? Jak usia kamanda ahułam kapituluje, adzin hulec ničoha nia zdolny vypravić. Sam viedaju, kali jašče hulaŭ: supiernik našmat macniejšy, da ciabie nie dachodziać pieradačy, ty redka atrymlivaješ miač — adpaviedna, u ciabie mieniej atrymlivajecca momantaŭ. Hetaksama i ŭ Ranałda, kali partuhalcy hulali ź niemcami, z amerykancami.

— Dniami eks-hałoŭny trener nacyjanalnaj zbornaj Biełarusi Anatol Bajdačny vykazaŭ ździŭleńnie, što, akazvajecca, daloka nia ŭsie biełarusy zaŭziejuć za Rasieju…

— Nie, nu pry čym tut biełarusy i zbornaja Rasiei? Hłupstva niejkaje. Jon sam, zdajecca, z Rasiei, dyk kali jamu tak padabajecca, niachaj za jaje i zaŭzieje. Ja taksama rodam z Rasiei, ale, jašče raz kažu, ja pieražyvaju za dobry, jakasny futboł. Pry čym tut Rasieja?

Kali b Biełaruś tam hulała — sprava inšaja, sapraŭdy, treba było b padtrymlivać svaju kamandu. A Rasieja nam što za aryjencir? My što, žyviom tam? Za kaho, jak kažuć, fanacieć? Hulcoŭ mižnarodnaha ŭzroŭniu niama, zorak niama.

Takich, jak, prykładam, u Halandyi. Darečy, mnie hetym razam vielmi spadabaŭsia ichni forvard (choć funkcyi ŭ jaho nie zusim takija) Van Persi. Ci bliskučy napadnik ź niamieckaj «Bavaryi» Roben, taksama za Halandyju vystupaje. Dva hulcy prosta vybitnyja, ciahnuć za saboj astatnich jak lakamatyŭ. Chto ŭ rasiejskaj kamandzie moža choć by paraŭnacca?

***

Michaił Mustyhin naradziŭsia ŭ Kałomnie Maskoŭskaj vobłaści ŭ 1937 hodzie.

U 1953-m pačaŭ hulać u futboł u junackaj kamandzie «Avanhard». Słužba ŭ vojsku prachodziła ŭ maskoŭskim CSKA, adnak zatrymlivacca tam paśla demabilizacyi admoviŭsia i ŭ 1961 hodzie pryniaŭ prapanovu ad mienskaha klubu «Biełaruś» (paźniej — « Dynama«). Tut forvard pravioŭ najlepšyja spartovyja hady. U 1962-m (17 hałoŭ) i 1967-m (19 hałoŭ) pryznany najlepšym bambardziram sajuznaha pieršynstva, a ŭ 1963-m u składzie dynamaŭcaŭ staŭ bronzavym pryzeram čempijanatu SSSR. Nieadnarazova ŭvachodziŭ u lik lepšych futbalistaŭ SSSR. Vyklikaŭsia ŭ nacyjanalnuju zbornuju SSSR, adnak zamacavacca ŭ jaje składzie pieraškodziŭ parok serca. Paśla zaviaršeńnia karjery pracavaŭ treneram u mienskaj SDIUŠAR № 5 i spartovym klubie «Mator». Apošnija 15 hadoŭ adyšoŭ ad aktyŭnaj dziejnaści, žyvie ŭ vioscy pad Mienskam.

• 1
• 0
• 1
• 0
• 0
• 0
• 1
• 0