«Ja była tolki abałonkaj čałavieka». Kajli Minoŭh raskazała, jak u jaje druhi raz dyjahnastavali rak i jak jana nie chacieła pra heta raskazvać

Aŭstralijskaja śpiavačka raskazała, što ŭ 2021 hodzie ŭ jaje druhi raz dyjahnastavali rak paśla paśpiachovaha lačeńnia raku małočnaj załozy ŭ 2005 hodzie. U svaim novym adnajmiennym dakumientalnym filmie dla Netflix, jaki vyjšaŭ u sieradu, aŭstralijskaja śpiavačka paviedamiła, što jana «znoŭ prajšła praz heta», ale dadała, što vyrašyła nie abviaščać hetuju navinu publična, piša Bi-bi-si.

«Druhi raz mnie dyjahnastavali rak na pačatku 2021 hoda. Ja zmahła zachavać heta ŭ tajamnicy, — skazała 57‑hadovaja Minoŭh. — Nie tak, jak u pieršy raz».

«Na ščaście, ja znoŭ pieražyła heta, i ŭsio dobra, — praciahnuła jana. — Chto viedaje, što čakaje mianie za vuhłom, ale pop-muzyka žyvić mianie… maja straść da muzyki macniejšaja, čym kali-niebudź».

Uzrušanaja Kajli adznačyła, jak ciažka joj było «znajści słušny momant», kab druhi raz abviaścić pra toje, praz što jana prajšła, asabliva padčas pośpiechu jaje tancavalnaha pop-sinhła Padam Padam 2023 hoda, jaki atrymaŭ premiju Grammy Awards.

«Ja nie adčuvaju siabie abaviazanaj raskazvać pra heta śvietu, dy i nasamreč ja prosta nie mahła hetaha zrabić tady, tamu što była tolki abałonkaj čałavieka», — skazała Minoŭh.

«U niejki momant ja bolš nie chacieła vychodzić z domu. Padam Padam adčyniŭ mnie tak šmat dźviarej, ale ŭnutry ja viedała, što rak — heta nie prosta momant u maim žyćci».

«I ja sapraŭdy prosta chacieła raskazać, što zdaryłasia, kab ja mahła adpuścić heta. Ja prychodziła na intervju i pry kožnaj nahodzie dumała: «Ciapier samy čas», ale trymała heta ŭ sabie».

Choć jana nie raskazvała pra heta ni prychilnikam, ni žurnalistam, Minoŭh pakinuła nievialikija namioki na druhi etap lačeńnia raku ŭ svaim albomie Tension 2023 hoda.

Adzin ź jaje trekaŭ, Story, utrymlivaje słovy: «U mianie byŭ sakret, jaki ja trymała ŭ sabie / Pieraharni jašče adnu staronku, kroška, vyjdzi na scenu».

U trochsieryjnym dakumientalnym filmie režysiora Majkła Harta, jaki taksama pracavaŭ nad filmam pra Devida Bekchema, zorka skazała: «Mnie treba było niešta, što nahadvała b mnie pra toj čas».

Minoŭh, jakoj pastavili dyjahnaz paśla płanavaha abśledavańnia, padkreśliła, što heta byŭ jaje ŭłasny vybar — padzialicca novaj infarmacyjaj, spadziejučysia, što «chtości atrymaje karyść ad lohkaha napaminu pra nieabchodnaść prajści abśledavańnie».

«Rańniaja dyjahnostyka była vielmi karysnaj, i ja vielmi ŭdziačnaja, što mahu skazać: siońnia ja zdarovaja», — dadała jana ŭ proma da filma.

Kali ŭ 2005 hodzie joj upieršyniu pastavili dyjahnaz rak małočnaj załozy, śpiavačcy daviałosia skasavać astatniuju častku svajho tura Showgirl i admovicca ad udziełu ŭ niadzielnym kancercie lehiend fiestyvalu Glastonbury Festival, kab prajści lačeńnie, jakoje ŭklučała chimijaterapiju i pramianiovuju terapiju.

U toj čas pra heta napisali mnohija ŚMI, i Minoŭh atrymała mnostva pažadańniaŭ ad prychilnikaŭ, a taksama publičnyja paviedamleńni padtrymki ad viadomych asob.

Jak adna ź niešmatlikich zorak taho času, jakaja publična raskazała pra svoj ankałahičny dyjahnaz, Kajli atrymała šyrokaje pryznańnie za pavyšeńnie infarmavanaści pra hetuju chvarobu.

Heta pryviało da taho, što vialikaja kolkaść žančyn źviarnułasia pa miedycynskuju dapamohu, asabliva ŭ Aŭstralii, adkul rodam śpiavačka. U krainie heta nazvali «efiektam Kajli».

Jana raskazała pradziusaram Netflix, što adkłała lačeńnie, kab prajści niekalki kursaŭ EKA ŭ nadziei naradzić dzicia.

«Mnie było 36 hadoŭ, kali mnie pastavili dyjahnaz, tamu ŭžo tady… treba było dumać pra dziaciej», — skazała jana ŭ filmie.

«Tamu ja pasprabavała, navat adkłała chimijaterapiju, kab pasprabavać, što było davoli strašna ŭ toj čas, bo ty prosta chočaš, kab heta skončyłasia».

Jana dadała: «Kali b heta adbyłosia, heta było b amal cudam. Ale tak nie atrymałasia».

Minoŭh atrymała paćviardžeńnie, što ačuniała, i ŭ 2008 hodzie pryznałasia, što spačatku joj pastavili pamyłkovy dyjahnaz, zapeŭnivajučy, što «ŭsio dobra i joj niama pra što turbavacca».

Jana narešcie vystupiła na Glastonbury Festival u 2019 hodzie — na 14 hadoŭ paźniej, čym płanavałasia. Strymlivajučy ślozy, śpiavačka vykanała set svaich najlepšych chitoŭ dziesiacihodździa, i heta stała samym papularnym vystupam fiestyvalu za ŭsiu historyju.

U śniežni minułaha hoda jana dvojčy zaniała pieršaje miesca ŭ brytanskich kaladnych čartach: za sinhł i albom.

Novy dakumientalny sieryjał raspaviadaje pra šlach Minoŭh da słavy — ad jaje rańnich hadoŭ u aŭstralijskim mylnym sieryjale Neighbours da taho, jak jana stała adnoj z najbujniejšych zorak pop-muzyki z takimi chitami, jak Can't Get You Out of My Head i Spinning Around.

Film źmiaščaje archiŭnyja kadry i intervju ź siabrami i siamjoj, u tym liku ź jaje byłym kaleham pa sieryjale «Susiedzi» i byłym chłopcam Džejsanam Donavanam, siastroj Dani i muzyčnym suaŭtaram Nikam Kejvam.

• 0
• 0
• 0
• 1
• 0
• 1
• 0
• 2