U Kanach pakazali film, całkam stvorany štučnym intelektam. $400 tysiač pajšło na vyličalnyja mahutnaści ŠI

95‑chvilinnaja stužka «Hell Grind» kaštavała jaje stvaralnikam 500 tysiač dalaraŭ, ź jakich 400 tysiač skłali vydatki na vyličalnyja mahutnaści štučnaha intelektu. Uvieś praces zaniaŭ dva tydni. Z padrabiaznaściami znajomić The Wall Street Journal.

Pavialičyć

Tema štučnaha intelektu (ŠI) užo niekalki hadoŭ zastajecca adnoj z hałoŭnych na Kanskim fiestyvali. Raniej razmovy vakoł štučnaha intelektu byli pieravažna tryvožnymi: akciory, režysiory i scenarysty bajalisia, što technałohii pačnuć zamianiać ludziej. Ale sioleta, jak adznačaje WSJ, nastroj staŭ mienš paničnym. 

Dla mnohich u industryi pytańnie ciapier palahaje tolki ŭ tym, jak mienavita vykarystoŭvać hety instrumient. I prykładam tut moža pasłužyć 95‑chvilinnaja stužka «Hell Grind» (nazvu možna pierakłaści jak «Daroha praź piekła»), stvoranaja startapam Higgsfield AI z San-Francyska. U hetym pryhodnickim bajaviku absalutna ŭsio — hieroi, łakacyi, aśviatleńnie i navat drobny rekvizit — źjaŭlajecca praduktam hienieracyi.

Siužet filma apaviadaje pra čatyroch złodziejaŭ, jakija litaralna traplajuć u piekła. Hałoŭny hieroj Roka musić prajści praz antyŭtapičnuju pusteču, kab vyratavać svaju kachanuju Łułu.

Jak piša WSJ, dla stvareńnia takoj maštabnaj vizualnaj historyi kampanii Higgsfield AI spatrebiłasia ŭsiaho dva tydni. Biudžet prajekta skłaŭ 500 tysiač dalaraŭ, pryčym 80% hetaj sumy pajšło na apłatu vyličalnych mahutnaściaŭ.

Pry hetym sama kampanija nie raspracoŭvaje bazavyja madeli hienieracyi videa. Zamiest hetaha jana vykarystoŭvaje ŭžo isnyja sistemy, naprykład Google Veo 3, a svaje namahańni kancentruje na instrumientach, jakija dazvalajuć zrabić vyjavy paśladoŭnymi i stylistyčna adnarodnymi.

Stvaralniki «Hell Grind» nastojvajuć na tym, što ŠI nie admianiaje prafiesiju režysiora. Navat pry poŭnaj hienieracyi filma patrabujecca sapraŭdnaje razumieńnie kiniematohrafa. Patrebna viedać pryncypy kampazicyi kadra, čarhavańnie płanaŭ, asnovy mantažu i pracy kamiery. ŠI moža namalavać vyjavu, ale mienavita čałaviek vyznačaje, jak pavinna vyhladać scena i ŭ jakoj paśladoŭnaści jana pavinna iści.

Śviatło! Kamiera! Prompt!

Jak raskazvaje kiraŭnik adździeła kantentu Higgsfield Adził Alimžanaŭ, kožny asobny zapyt (prompt) dla madeli stvaraŭ kala 15 siekund materyjału. Hetyja karotkija ŭryŭki davodziłasia hienieravać mnostva razoŭ, pastajanna karektujučy zapyt, kab atrymać lepšuju viersiju. Dla pieršych 25 chvilin filma spatrebiłasia 16 181 papiaredniaja hienieracyja videa, ź jakich u vyniku adabrali 253 finalnyja kadry.

Asablivaj prablemaj pry stvareńni poŭnamietražnaha ŠI-kino stała zachavańnie vizualnaj paśladoŭnaści. Madeli ŠI byvajuć niepradkazalnymi, a ŭ vialikim filmie nielha dapuścić, kab sceny vyhladali pa-roznamu ŭ kožnym novym kadry.

Mienavita tamu kožny prompt musiŭ być nadzvyčaj doŭhim i detalizavanym. Prapisvalisia ŭsie paramietry: styl vyjavy, aśviatleńnie, typ abjektyva, raźmiaščeńnie kamiery. Akramia taho, štučnamu intelektu nahadvali pra nieabchodnaść vykonvać zakony fiziki: «zachavańnie hravitacyi i iniercyi — masa pavinna mieć realnuju vahu, karektnyja kantaktnyja cieni, adsutnaść rekvizitu, jaki łunaje ŭ pavietry».

U vyniku ŭ siarednim kožny asobny prompt składaŭsia z 3 tysiač słoŭ. U Higgsfield navat stvaryli asobny instrumient, jaki sam dapamahaje hienieravać takija hihanckija zapyty. Karystalnik moža zahruzić staronku scenaryja, paśla čaho sistema vydaść prompt na niekalki tysiač słoŭ, aptymizavany dla stvareńnia videa prafiesijnaj jakaści.

Niahledziačy na chutkaść pracy, praces akazaŭsia vielmi zatratnym i pracajomkim. Pavodle stvaralnikaŭ, im davodziłasia vykidać sotni zhienieravanych rolikaŭ praz drobnyja defiekty: niapravilny ruch vačej hieroja, nienaturalnuju mimiku abo niaŭdały ruch kamiery.

U vyniku rachunak kampanii za vyličalnyja mahutnaści ŠI skłaŭ 400 tysiač dalaraŭ. Kab utrymać vydatki ad jašče bolšaha rostu, stvaralniki pracavali z «nieavobłačnymi» pravajdarami, takimi jak Nebius i CoreWeave, paźbiahajučy pasłuh bujnych technałahičnych hihantaŭ. Takija servisy zajmajucca pieravažna arendaj mahutnych videakart i vyličalnych resursaŭ dla niejrasietak i časta prapanujuć bolš vyhadnyja ŭmovy dla ŠI-prajektaŭ.

Jak adznačajuć u kampanii-vytvorcy, ich prajekt staŭ śviedčańniem taho, što navat u epochu štučnaha intelektu stvareńnie kino zastajecca składanym ramiastvom. Niemahčyma prosta paprasić niejrasietku «zrabić kruty 95‑chvilinny film» — i atrymać hatovuju stužku.

• 1
• 0
• 0
• 0
• 0
• 0
• 0
• 0