19-hadovy chłopiec adkryŭ u Minsku kramu z rečami ŭ nacyjanalnym styli FOTA
U minskim handlovym centry «Siłuet» (kala Kamaroŭskaha rynka) užo bolš za dva miesiacy pracuje krama «Darečy», dzie pradajucca roznyja vyšymajki, kubki i inšyja rečy z nacyjanalnym arnamientam. Jaje uładalnik — 19-hadovy Vadzim.
«Razam z dapamohaj baćki ja vyrašyŭ adkryć kramu «Darečy». Siońnia ludzi cikaviacca nacyjanalnymi rečami, tamu, papracavaŭšy užo bolš za dva miesiacy, my zrazumieli, što nie darma heta robim».
Sam Vadzim išoŭ da biełaruskaści z 12 hod. Krynicaj natchnieńnia była biełaruskaja muzyka, a dakładniej, «Lapis Trubiacki» i Lavon Volski. Pastupova chłopiec staŭ cikavicca biełaruskaj movaj, historyjaj i kulturaj — i voś ciapier sam unosić układ u jaje raźvićcio.
Pastupova Vadzim pierakanaŭ baćku u istotnaści nacyjanalnych kaštoŭnaściaŭ. «Baćka prosta nie cikaviŭsia hetym, a ciapier u jaho, jak i ŭ mianie, nabitaja tatuiroŭka z Pahoniaj».
U kramie «Darečy» pradajucca bajki, majki, suvieniry, hamancy, dziciačyja vyšyvanki, sumki, branzalety i šmat čaho inšaha. «U nas jość pradukcyja symbal.by, Mark Formelle, roznyja vyraby majstroŭ z Rakava i Hrodna. Ja voś śpiecyjalna paviesiŭ dziciačyja vyšyvanki na ŭvachodzie. Ludzi chodziać i zamiłoŭvajucca».
Vadzim adznačaje, što staŭleńnie minakoŭ absalutna roznaje, ale mała byvaje abyjakavych. «Dzieści 70% padtrymlivajuć. 20 — staviacca admoŭna i tolki 10% — pamiarkoŭna. Byvaje, što ja baču, što ludzi kiepska razumiejuć pa-biełarusku, ale kali ja prapanuju ź imi razmaŭlać pa-rusku, jany admaŭlajucca, kažuć, što im padabajecca biełaruskaja mova».
A miž tym u kramu zajšoŭ mužčyna siaredniaha ŭzrostu, kab abrać sabie vyšymajku ci majku z «Pahoniaj». «Dziakuj vam, chłopcy, ja voś niekalki hod taksama u «Siłuecie» pracavaŭ, ciapier u inšym miescy, ale vy robicie hodnuju spravu».
Vadzim adznačaje, što biznes idzie davoli paśpiachova. Pakolki ŭsie rečy biełaruskaj vytvorčaści, padatkaŭ prypadaje płacić trochi mienš, čym tym, chto zakuplajecca ŭ Rasii ci Jeŭropie. Padčas hutarki kramu naviedała 5-6 čałaviek, ale Vadzim adznačaje, što heta jašče davoli mała dla paniadziełka. Voś i dziaŭčyna pryjšła pa bajku ci majku z nacyjanalnymi simvałami, kab padaryć svajmu chłopcu na dzień narodzinaŭ.
Susiedzi pa handlovych kropkach časta naviedvajuć kramu. Pa słovach Vadzima, bolš za ŭsich jahonuju spravu padtrymlivajuć miascovyja achoŭniki. «Tak, byli tut uładalniki kropak, jakija prychodzili, abražali, ale bolšaść całkam padtrymlivaje ideju takich rečaŭ».
Vadzim spadziajecca, što biełaruskaja kultura budzie pašyracca siarod našych ludziej, a sam jon choča prosta ŭnieści svoj układ u jaje papularyzacyju.
Kamientary