U Biełarusi zabaroniena pracavać jašče adnamu viadomamu trenieru, choć jon nibyta i nie ŭ čornych śpisach. Čym praviniŭsia?

Hetaja historyja pačała razhortvacca ŭ 2021 hodzie. Žukoŭski ŭ tym siezonie pracavaŭ u BATE — aficyjna ŭznačaliŭ kamandu 21 śniežnia 2020-ha, a pakinuŭ praz hod. Pry im barysaŭcy stali druhimi ŭ čempijanacie i vyjhrali Kubak.

Pieršaja pałova siezona, jak raskazvajuć infarmavanyja krynicy, praminuła spakojna — nichto ź minsportu nie čapaŭ ni Žukoŭskaha, ni BATE. Usio źmianiŭ matč kvalifikacyi Lihi kanfierencyj u Batumi, dzie pradstaŭnik Biełarusi minimalna pieramoh miascovaje «Dynama». Dakładniej, źmianiŭ navat nie sam matč, a toje, što paŭabaronca BATE Pavieł Niachajčyk, zabiŭšy pieramožny miač, pabieh śviatkavać jaho da trybuny ź biełaruskimi zaŭziatarami. U ich byŭ razhornuty bieł-čyrvona-bieły ściah (varta adznačyć, što inšych biełaruskich zaŭziataraŭ na hulni nie było).

Heta, pavodle infarmacyi «Trybuny», vielmi razzłavała ministra sportu i turyzmu Siarhieja Kavalčuka. Praź niekatory čas jon vyklikaŭ da siabie Kapskaha i zajaviŭ, što hulcoŭ, jakija dazvalajuć sabie takija dziejańni, na poli być nie pavinna. Byli nazvanyja i inšyja futbalisty BATE, jakim zabaraniałasia hulać. Jany na toj momant užo fihuravali ŭ składzienym čornym śpisie. Heta bramnik Anton Čyčkan, abaroncy Maksim Bardačoŭ, Pavieł Rybak i Daniła Niačajeŭ, paŭabaroncy Dźmitryj Biaśśmiertny, Stanisłaŭ Drahun i napadnik Mikałaj Sihnievič. Usie jany ŭ 2020‑m źnialisia ŭ videa suprać hvałtu.

Kavalčuk daŭ zrazumieć, što kali Kapski nie pasłuchajecca, mohuć być nastupstvy, praŭda, nie ŭdakładniajučy, jakija mienavita.

Kiraŭnik BATE raskazaŭ pra ŭsio Žukoŭskamu, a toj… praciahnuŭ vypuskać hulcoŭ, praciahvajučy zmahacca za vynik. Čyčkan u druhim kruzie pravioŭ 5 matčaŭ u vyšejšaj lizie, Bardačoŭ i Niačajeŭ — pa 12, Rybak — 8, Biaśśmiertny i Niachajčyk — pa 10 (apošni ŭ piaci matčach byŭ kapitanam), Drahun — 2 (z červienia da kastryčnika byŭ traŭmavany), Sihnievič — 11 (u adnym matčy byŭ kapitanam).

Niezadavoleny Kavalčuk nahadvaŭ Kapskamu pra svaju rekamiendacyju, abychodziačysia, praŭda, biez žorstkich pahroz.

Siezon BATE zaviaršyŭ sa srebram, a 30 śniežnia 2021‑ha kłub aficyjna paviedamiŭ, što Žukoŭski sychodzić paśla zakančeńnia kantraktu. Jak śćviardžajuć krynicy «Trybuny», pry žadańni Kapski moh i pakinuć śpiecyjalista: pahadnieńnie było składziena pa schiemie «1+1» — to-bok miełasia opcyja padaŭžeńnia jašče na hod. Adnak Kapski, raźvitvajučysia, skazaŭ trenieru, što nibyta Kavalčuk zabaraniaje tamu zastavacca ŭ kłubie — praz toje, što vykarystoŭvaŭ «niepažadanych» futbalistaŭ.

Žukoŭski šukaŭ novaje miesca — i nieŭzabavie daviedaŭsia, što zahad nie pracavać ź im pastupiŭ kłubam z čempijanatu Biełarusi ad Kavalčuka. Trenier farmalna nie byŭ uklučany ŭ čornyja śpisy, ale kłuby nie hareli leźci na ražon, navat kali trenier byŭ im cikavy.

U vyniku Žukoŭski da kanca leta 2022‑ha siadzieŭ biez pracy, pakul nie padpisaŭ kantrakt z kazachstanskim «Atyrau». Z taho času jon pracavaŭ vyklučna ŭ Kazachstanie.

Ź lutaha hetaha hoda śpiecyjalist znoŭ nie maje pracy, ale ŭ Biełarusi, jak kažuć krynicy «Trybuny», jamu pa-raniejšamu pracavać nie dazvalajecca.

• 0
• 0
• 1
• 0
• 0
• 0
• 1
• 0