Troch palakaŭ z prymiežža asudzili za kantrabandu biełaruskich cyharet. Adnamu turmu, astatnim — štrafy
Akruhovy sud u Biełastoku asudziŭ troch mužčyn, jakich abvinavačvali va ŭdziele ŭ kantrabandzie cyharet ź Biełarusi ŭ Polšču pry dapamozie mietearałahičnych pavietranych šaraŭ. Samy surovy prysud — 2,5 hoda pazbaŭleńnia voli. Dvoje astatnich atrymali ŭmoŭnyja terminy.
Abvinavačanyja — maładyja palaki va ŭzroście ad 22 da 26 hadoŭ, jakija žyvuć u pamiežnaj zonie. Pavodle prakuratury, jany jak minimum niekalki razoŭ udzielničali ŭ pierapraŭcy cyharet z vykarystańniem šaroŭ. Usie troje, jak paličyŭ sud, dziejničali ŭ składzie arhanizavanaj złačynnaj hrupy: ich zadačaj byŭ pryjom hruzu paśla kantaktu ź ludźmi, jakija zapuskali šary i pieradavali kaardynaty miescaŭ, dzie tyja padali na polskim baku.
Zatrymańni adbylisia ŭ kastryčniku 2025 hoda: Pamiežnaja varta i palicyja ŭ sumiesnaj apieracyi ŭziali padazravanych u pamiežnaj hminie Kuźnica Padlašskaha vajavodstva. Padčas vobyskaŭ znajšli telefony, SIM-karty i pryłady dla łakalizacyi šaroŭ. Spravu viała Akruhovaja prakuratura ŭ Biełastoku, jakaja abjadnała ŭ adno śledstva ŭsie vyjaŭlenyja na toj momant vypadki takoj kantrabandy. Abvinavačańni achoplivajuć pieryjad ź vieraśnia 2024‑ha pa krasavik 2025 hoda i pierapraŭku 11,5 tysiačy pačkaŭ cyharet.
Samy surovy prysud atrymaŭ mužčyna, na rachunku jakoha było najbolš pryjomaŭ hruzu, a taksama ŭcioki ad patruloŭ padčas pieravozki kantrabandy. Jamu pryznačyli 2,5 hoda pazbaŭleńnia voli, piacihadovuju zabaronu kiravać transpartam, a taksama kala 15 tysiač jeŭra štrafu. Dvoje inšych atrymali ŭmoŭnyja terminy i štrafy.
Pavodle słoŭ sudździ, hałoŭny abvinavačany atrymaŭ prapanovu ad čałavieka, jaki zajmaŭsia takimi pierapraŭkami: jon jeździŭ da paznačanych kropak pryjomu i advoziŭ pakunki z cyharetami va ŭmoŭlenyja miescy. Za adzin pryjom jon atrymlivaŭ 250 jeŭra, a svaim naparnikam płaciŭ pa 25‑50 jeŭra.
Kamientary