Adkrytaja premjera śpiektakla «Opium» adbudziecca 29 i 30 maja ŭ art-prastory «Vierch». Śpiektakl, što apaviadaje pra «hieroja našaha času», jaki zmahajecca z vyklikami sučasnaści, staŭ pieršym paśpiachovym teatralnym prajektam, jaki sabraŭ hrošy na pastanoŭku z dapamohaj hladackaha finansavańnia na kraŭdfandynhavaj płatformie «Vulej».
Našumieły śpiektakl «Opium» užo pakazvali minskaj publicy ŭ krasaviku, ale ŭbačyli jaho tolki «suaŭtary» — hledačy, jakija padtrymali prajekt padčas kampanii pa zbory srodkaŭ. Ciapier kupić kvitki i pahladzieć «samuju sumlennuju» pastanoŭku 2016 hoda zmohuć usie achvotnyja. Taksama «Opium» staŭ adnym z udzielnikaŭ BelarusOpen — biełaruskaj prahramy Mižnarodnaha forumu teatralnaha mastactva «Teart», jaki ŭ šosty raz projdzie vosieńniu ŭ Minsku.
Režysior śpiektakla — Alaksandr Marčanka, kiraŭnik Centra biełaruskaj dramaturhii, a taksama vyjaznoj łabaratoryi dla maładych dramaturhaŭ na bazie CBD, upieršyniu paznajomiŭsia z pjesaj Vitala Karaleva padčas jaje stvareńnia: tekst napisany na IV dramaturhičnaj łabaratoryi, jakaja prachodziła viasnoj 2015 hoda. Pjesa napisanaja ŭ žanry makjumientary, abo psieŭdadakumientalizmu, jakomu ŭłaścivaja imitacyja realnych padziej. U sučasnym Rahačovie žyvie zvyčajnaja biełaruskaja siamja, dzie maci chvareje, starejšy syn tolki što straciŭ pracu, małodšamu treba pastupać va ŭniviersitet, a hrošaj katastrafična nie chapaje. Starejšy syn prymaje rašeńnie jechać va Ukrainu, kab zarabić hrošaj, ryjučy tranšei ŭ poli vajennych dziejańniaŭ.
Pjesa zacikaviła Alaksandra Marčanku i kiraŭnicu Centra vizualnych i vykanalnickich mastactvaŭ «ART Karparejšn» Anžaliku Krašeŭskuju. Abjadnaŭšy namahańni, kamanda prajekta zmahła realizavać pastanoŭku, paklikaŭšy na dapamohu patencyjnych hledačoŭ.
Krytyki i žurnalisty, jakija prysutničali na zakrytaj premjery, nazyvajuć «Opium» adnym z samych jarkich «antyvajennych vykazvańniaŭ» u 2016 hodzie.
U mai śpiektakl pakažuć dvojčy: 29 maja ŭ 16:30 i 30 maja 20:00 u art-prastory «Vierch» pa adrasie vuł. Kujbyšava, 22 (6 korpus budynka zavoda «Haryzont», 5 pavierch)
Kupić kvitki možna na sajtach bycard.bu i teart.by, u kasach horada, a taksama zamović pa telefonach + 375 17 395 30 20, + 375 (29) 622-64-44. Košt kvitka — 160 tys. rub.
Za navinami prajekta možna sačyć u sacyjalnych sietkach tut i tut.
Ciapier čytajuć
Kala Safii ŭ Połacku pastavili pomnik lotčykam Ničyparčyku i Kukanienku. Ale navat nie samalot toj madeli, na jakoj jany zahinuli, a aerapłan stalinskaha času1818
Kamientary