Siońnia adbyŭsia aŭkcyjon pa prodažy ziamielnych učastkaŭ pad budaŭnictva pryvatnych damoŭ u Łahojskim rajonie. Ziamla ŭ hetych miescach zaŭsiody karystajecca popytam, i tarhi heta paćvierdzili. Tak, na ziamielnyja nadzieły ŭ adnoj ź viosak pretendavali pa 20—30 čałaviek, piša Realt.by.
Na aŭkcyjon prapanavali 14 učastkaŭ u vioskach Biełaruckaha, Hajnienskaha, Łahojskaha, Astrašyckaha i Švabskaha sielsavietaŭ.
Najbolšuju cikavaść u Biełaruckim sielsaviecie vyklikaŭ plac u vioscy Siomkava, na vulicy Viasiołkavaj, 15. Na ziamlu pretendavali vosiem čałaviek. U vyniku 12 sotak pry pačatkovaj canie 16 tysiač rubloŭ byli pradadzieny za 68,5 tysiačy rubloŭ (kala 25 tysiač dalaraŭ).
U Łahojskim sielsaviecie samym papularnym staŭ učastak u vioscy Aŭhustova, na vulicy Kałhasnaj, 19B. Na ziamielny nadzieł z mahčymaściu padviadzieńnia vady, elektryčnaści i hazu płoščaj 12 sotak pretendavali 6 čałaviek. Ziamlu ŭdałosia pradać za 86,3 tysiačy rubloŭ (31 tysiaču dalaraŭ) pry pačatkovaj canie 25 tysiač rubloŭ.
Nu a najbolšy ažyjataž vyklikali ŭčastki ŭ Astrašyckim sielsaviecie. Najbolšaja kolkaść zajavak pastupiła na 4 nadzieły ŭ vioscy Łabunščyna. Na kožny ź ich zarehistravałasia 27, 24, 33 i 29 čałaviek.
Baraćba išła za ziamielnyja placy pa 10 sotak, zabiaśpiečanyja elektryčnaściu, hazam i vodapravodam. Jany byli vystaŭleny na aŭkcyjon pa adnolkavaj pačatkovaj canie — za 15 tysiač rubloŭ.
U vyniku ŭčastak na Kaštanavaj, 21 pradadzieny za 83,3 tysiačy rubloŭ (30 tysiač dalaraŭ), na Kaštanavaj, 23 — za 77 tysiač rubloŭ ($28 tysiač), na Navasielskaj, 24 — za 85 tysiač rubloŭ ($31 tysiaču), a na Navasielskaj, 26 — za 91 tysiaču rubloŭ ($33 tysiačy). Apošni nadzieł staŭ samym darahim z pradadzienych na siońniašnich tarhach.
U Švabskim sielsaviecie prapanavali 3 učastki, ale pakupnik znajšoŭsia tolki na adzin ź ich. Ziamielny nadzieł na vulicy Lasnoj u vioscy Čabatary byŭ pradadzieny pačatkovaj canoj, pavialičanaj na 5% — za 5250 rubloŭ (1920 dalaraŭ).
U Hajnienskim sielsaviecie pradavaŭsia 1 učastak, na jaki pretendavaŭ 1 čałaviek. Jon nabyŭ ziamlu ŭ vioscy Radovičy za 12 tysiač rubloŭ (4420 dalaraŭ).
Pa samaj vysokaj pačatkovaj canie — za 280 000 rubloŭ — na aŭkcyjon vystaŭlaŭsia ŭčastak płoščaj 1,2 ha ŭ vioscy Alokšycy, pryznačany dla viadzieńnia asabistaj padsobnaj haspadarki. Adnak žadajučych kupić hety nadzieł nie znajšłosia.
Ciapier čytajuć
Pačobut parazvažaŭ, ad čaho zaležyć budučynia Biełarusi8
Kamientary