Prajmieryz PARNAS (Partyi Narodnaj Svabody) skončylisia hučnym skandałam. Imiony, proźviščy, numary telefonaŭ, daty naradžeńnia, IP adrasy, je-mail'y i navat paroli aktyvistaŭ partyi źjavilisia ŭ internecie.
Hałasavańnie za kandydataŭ, jakija pavinny buduć vyłučacca ad partyi na vybarach u Dumu ŭvosieni, išło na sajcie partyi, a taksama na ŭčastkach u Maskvie i niekalkich inšych haradach Rasii. Mienavita dadzienyja tych, chto hałasavaŭ praz sajt, i «ŭspłyli» ŭ siecivie. Paśla ŭciečki dadzienych hałasavańnie spynili, ale addać svaje hałasy ŭžo paśpieli bolš za 7 tysiač čałaviek.
Pazicyja kiraŭnictva PARNASa nakont uciečki była niezrazumiełaj: spačatku jany zajavili, što heta vynik «pamyłki administratara», a potym pačali vinavacić śpiecsłužby. Pra heta zajaŭlaŭ Michaił Kaśjanaŭ, staršynia partyi, da jaho dałučyŭsia i adzin z kiraŭnikoŭ rady partyi, viadomy apazicyjny dziejač Illa Jašyn. Da taho ž, vyrašana było vyłučać kandydataŭ na vybary, nie ŭličvajučy vyniki prajmieryz.
Tym časam, situacyja z dadzienymi vybarščykaŭ PARNASa vyklikała nieparazumieńnie siarod rasijskich apazicyjanieraŭ. Nieŭzabavie źjaviłasia viersija, što ŭciečka była admysłova padstrojenaja samimi kiraŭnikami partyi, kab admianić vyniki prajmieryz – bo lidaram na ich staŭ Viačasłaŭ Malcaŭ z Saratava. Malcaŭ – videabłohier, šmat chto nazyvaje jaho «papulistam» ci navat «sarataŭskim Žyrynoŭskim» z-za rezkich vykazvańniaŭ u błohu.
Uklučyŭsia ŭ abmierkavańnie ŭciečki i Alaksiej Navalny. Jon zajaviŭ, što vyniki prajmieryz abaviazkova treba ŭličyć.
U viersiju z FSB Navalny nie vieryć, jak nie vieryć i ŭ viersiju z «zapłanavanaj uciečkaj». Ale ž, pa jaho słovach, treba abaviazkova pravieści rasśledavańnie, kab vyśvietlić, što ŭsio ž adbyłosia. Taksama Navalny prapanavaŭ vykanaŭčamu kiraŭnictvu PARNASa syści ŭ adstaŭku z nahody skandała.
I PARNAS, i Navalny spačatku rychtavalisia da vybaraŭ u Dumu razam. Była stvorana navat Demakratyčnaja kaalicyja, jakaja abjadnoŭvała šerah apazicyjnych partyj i dziejačaŭ. Pieršapačatkova ŭ Demkaalicyju, stvoranuju ŭ 2015 hodzie, uvachodzili PARNAS, Demakratyčny vybar, Partyja prahresu, «5 śniežnia», «Salidarnaść» i Libiertaryjanskaja partyja Rasii. Adnak u hetym hodzie, paśla vychadu filma NTV «Kaśjanaŭ dzień» ź intymnym kampramatam na lidara Kaśjanava i jaho kalehu pa PARNAS Natallu Pialevinu, kaalicyja raskałołasia. Ź jaje vyjšła niekalki čalcoŭ, u tym liku i Navalny i jaho niezarehistravanaja «Partyja prahresu».
Ciapier byłyja paplečniki pačynajuć vinavacić adzin adnaho. Z boku Navalnaha dakazvajuć, što pierachapić paroli śpiecsłužby prosta nie zmahli b. Da taho ž, niekatoryja ź imionaŭ i adnolkavyja paroli mohuć śviedčyć ab tym, što padčas hałasavańnia aktyŭna vykarystoŭvalisia boty. U svaju čarhu, PARNASaŭcy praciahvajuć śćviardžać, što da «źlivu» prykłali ruku praŭładnyja struktury albo śpiecsłužby. PARNAS arhumientuje heta tym, što, pa-pieršaje, palicyja budzie vykarystoŭvać hatovy «śpis apazicyjanieraŭ», a pa-druhoje, samu partyju mohuć pryciahnuć da adkaznaści za publikacyju piersanalnych dadzienych.
Pry hetym u PARNASie paviedamili, što źviartacca da pravaachoŭnych orhanaŭ u suviazi z uciečkaj dadzienych nichto nie budzie. Tłumačać heta tym, što ŭ partyi niama davieru da śledčych. Taksama nibyta niama i času – nadta šmat pracy nad farmiravańniem śpisaŭ kandydataŭ.
Tak što pakul jasna tolki adno – adzinstva ŭ rasijskaj apazicyi niama, u hetym jana ničym nie adroźnivajecca ad apazicyi biełaruskaj. Razbrod u demakratyčnaj kaalicyi, jaki pačaŭsia sa sprečnaha videa NTV, praciahvajecca. Zamiest najchutčejšaha vyrašeńnia pytańnia praciahvajucca i sprečki pamiž byłymi čalcami kaalicyi, što taksama nie idzie na karyść nikomu ź ich, a asabliva — PARNASu. I toje, što adbyvajecca siońnia, adšturchnie ad apazicyjanieraŭ jašče častku patencyjnych vybarščykaŭ. Na heta spracujuć i šmatlikija dziaržaŭnyja i praŭładnyja ŚMI, jakija ŭžo padchapili skandał.
Ciapier čytajuć
Što viadoma pra zatrymanych radyjoamataraŭ, jakim pahražaje až da rasstrełu15
Kamientary