«Rakucioŭskaje leta — 2016» — 31 lipienia

31 lipienia (niadziela) u Rakucioŭščynie (Maładziečanski rajon) projdzie tradycyjnaje śviata paezii i pieśni «Rakucioŭskaje leta - 2016».

Uletku 1911 hoda paśla amal 15-hadovaha rastańnia Maksim Bahdanovič narešcie viarnuŭsia na rodnyja biełaruskija ziemli. Pryvietnym, ciopłym, utulnym kutočkam, dzie małady paet pravioŭ letnija miesiacy, stała Rakucioŭščyna. Tut, u vakolicach falvarka Vacłava Łyčkoŭskaha, Maksim Bahdanovič znajšoŭ sapraŭdnuju krynicu dla natchnieńnia — žyćcio biełaruskaj vioski. Navokał hučała žyvaja rodnaja mova, jakoj paet imknuŭsia avałodać z najbolšaj daskanałaściu.

Letnija vodary łuhoŭ, brujeńnie krynic, šapacieńnie lasoŭ, ptušynyja śpievy… Usio heta adhukałasia ŭ dušy paeta. I niaspynnaj płyńniu liŭsia z-pad ruki radok za radkom na staronki. A nieŭzabavie toŭścieńki sšytačak, śpiareščany raŭniutkim počyrkam, staŭsia asnovaj adzinaha pryžyćciovaha zbornika vieršaŭ Maksima Bahdanoviča «Vianok». Mienavita pobyt u Rakucioŭščynie i padarožža da jaje dapamahli Maksimu jašče hłybiej akunucca ŭ vir biełaruskaj historyi, sapraŭdnaha viaskovaha žyćcia ź niaspynna havarkimi siabrami, susiedziami, viaskoŭcami. I z takoj čaroŭnaj letniaj pryrodaj!

U hety niezabyŭny mikrakosmas lipieńskaj Rakucioŭščyny Litaraturny muziej Maksima Bahdanoviča zaprašaje daŭnich siabroŭ i usich, chto choča apynucca ŭ atmaśfiery sapraŭdnaha šlachieckaha falvarka stohadovaj daŭniny. Chto viedaje, mo, niaŭłoŭnaje natchnieńnie, što i dahetul nievyčarpalnaj krynicaj strumienić poruč z maładziečanskaj viosačkaj, zapanuje nad usimi, chto projdzie ściežkami hienijalnaha biełaruskaha paeta.

Prahrama śviatkavańnia

11.00 - pryvitalnaja impreza kala pamiatnych kamianioŭ; 

12.00 - litaraturna-muzyčnaja impreza, u jakoj prymajuć udzieł viadomyja dziejačy kultury i mastactvaŭ Biełarusi: piśmieńniki – Navum Halpiarovič, Ludmiła Rubleŭskaja, Ludmiła Chiejdarava, Valaryna Kustava, Jula Cimafiejeva, Andrej Chadanovič, Źmicier Arciuch, Taćciana Niadbaj, Sierž Minskievič, muzyki – Aleś Kamocki, Volha Akulič, Alesia Sivochina.

Dajezd

Elektryčka Minsk — Maładziečna da stancyi «Uša» (v. Krasnaje), dalej spytać, kudy iści. 08:57 (pryjezd u 10:18), 09:52 (11:14)

Abo maršrutkami Minsk — Čyść ad vuł. Kirava, chodziać u 8.50, 9:20, 9:50 i h.d.,

abo maršrutkaj Minsk — Maładziečna ad stancyi «Družnaja» da v. Krasnaje. Chodziać kožnyja 15-20 chvilin.

• 0
• 0
• 0
• 0
• 0
• 0
• 0
• 0