Abjadnańnie «Kinakonh» i kinateatr «Pieramoha» raspačynajuć sieryju kinapakazaŭ u biełaruskaj ahučcy. Pakazy płanujucca štomiesiac i buduć prachodzić na vychodnych, tamu inicyjatyva atrymała nazvu «Biełaruskija ŭikendy».
Filmy pierakładzienyja na biełaruskuju movu abjadnańniem Kinakonh. Hałasy ahučki — viadomyja biełaruskija akciory i televiadučyja: Pavał Charłančuk, Hanna Chitryk, Siarhiej Žbankoŭ, Uładzimier Hłotaŭ, Śviatłana Cimochina dy inšyja.
Pieršy biełaruski ŭikend adbudziecca 22-23 kastryčnika. U hetyja dni (subotu i niadzielu), a 19:00 kinateatr «Pieramoha» pakaža film «Cudoŭna Łaska». Zachaplalnaja historyja zmahańnia suprać rabstva u Vialikabrytanii była źniata režysioram «Chronik Narnii» Majkłam Eptedam, a ŭ adnoj z hałoŭnych rolaŭ źniaŭsia znakamity brytanski akcior Bienedykt Kamberbetč. Pačatak a 19:00. Uvachod volny.
31 kastryčnika z nahody Dnia Refarmacyi projdzie pakaz histaryčnaj dramy «Lutar». Kino raspaviadzie nievierahodnuju historyju čałavieka, jaki 499 hod tamu źmianiŭ uvieś śviet. U filmie zadziejničanaja cełaja plejada viadomych akcioraŭ, uklučna sa znakamitym seram Piteram Uścinavym («Lutar» — apošniaja praca hetaha znakamitaha brytanskaha akciora z ruskimi karaniami). Z-za vyklučnaj histaryčnaj dakładnaści kinastužka rekamiendavana dla navučalnych metaŭ. Pačatak a 19:00. Uvachod volny.
Nastupny ŭikend adbudziecca ŭ listapadzie. Na vychodnyja 19-20 listapada płanujecca prezientacyja dziciačaha filma«Padynhtan», što raspaviadaje pra pryhody abajalnaha miadźviedzika ŭ Anhielščynie. Brytanija znakamita dvuma miadźviedziami: Vini-Pycham i Padynhtanam. I kali pieršy šyroka viadomy ŭ Biełarusi, to Padynhtanu jašče treba zavajavać luboŭ maleńkich hledačoŭ. I ŭ pieruanskaha miadźviedzia z manierami anhielskaha džentlmiena heta peŭna atrymajecca! Film 2014 hoda prasiaknuty dabrynioj i niepaŭtornym anhielskim humaram. Jon abaviazkova spadabajecca jak dzieciam, tak i ich baćkam. Darečy, rolu hałoŭnaha złačyncy vykanała Nikol Kidman.
Kinateatr «Pieramoha»: h. Minsk, vuł. Intiernacyjanalnaja, 20
Telefon dla daviedak: +375 (17) 203-77-66
Ciapier čytajuć
Daišnik, jakoha źbiŭ mašynaj piensijanier pad Minskam, pamior u balnicy. Jamu zładzili pyšnaje pachavańnie18
Kamientary