Kali pradać prosta ciapier, hrošaj na zakryćcio kredytu nie chopić. Kolki straciŭ Belgee za hod?

Hod tamu žurnalistka Onliner źmianiła stary i darahi ŭ absłuhoŭvańni premium na novy kitajski «biudžetnik». Biez mam i tataŭ, ale z kredytam: u biełaruskich rublach, z hrejs-pieryjadam i na 10 hadoŭ. Zaraz jana pasprabavała zdać mašynu dyleru ŭ trejd-in i raskazvaje pra svoj dośvied. 

Uražańni ad Belgee S50 paśla 25 000 km prabiehu

Pačnu z ahulnych uražańniaŭ i emocyj ad mašyny paśla hoda jaje ekspłuatacyi. Hałoŭnaja prablema ŭ tym, što emocyj jak takich niama: heta kamfortny biudžetny siedan (nastolki, nakolki «biudžetnik» u pryncypie moža być kamfortnym) dla spakojnaha pieramiaščeńnia z domu na pracu i pa spravach. Darečy, ja nie paškadavała, što pry kupli aŭto ŭ dylera palepšyła šumaizalacyju, nakleiła achoŭnuju plonku i abnaviła PZ (ciapier u mianie jość mahčymaść vynosić na płanšet navihatar, uklučać YouTube i h. d.).

Pavialičyć

Dziakuju sabie taksama za vybar maksimalnaj kamplektacyi: padahreŭ rula i siadzieńniaŭ, funkcyja dystancyjnaha zapusku ruchavika vielmi radavali hetaj zimoj, a letam ja zaŭsiody jezdžu z adkrytym lukam (nie vielmi lublu kandycyjaniery) — jašče adna pieravaha Flagship.

U cełym, kali vy staviciesia da mašyny ŭtylitarna i čaściej za ŭsio pierasoŭvajeciesia ŭ adzinočku ci z kimści ŭdvaich, to naŭrad ci S50 vas mocna rasčaruje. Nie prosta tak ja napisała pra kolkaść čałaviek u sałonie: nie raz zaŭvažała, što kali aŭto zabita ludźmi, to jamu navat u nievialikuju horku padnimacca ciažka.

Pavialičyć

Što tyčycca niedachopaŭ, to jany ŭsie tyja ž: atmaśfiernamu matoru žudasna nie chapaje dynamiki, a karobka rehularna «šturchajecca» i «padtuplivaje» pry nabory chutkaści. Čakaju najbližejšy TA, dzie mnie paabiacali pieraprašyć KPP i vyrašyć prablemu.

Ale ŭ astatnim usio cudoŭna: paśla zimy ni «žukoŭ», ni skołaŭ. Žyvoje łabavoje, žyvy sałon. Tak, dzie-nidzie źjavilisia drapinki, ale za heta varta dziakavać kudłatamu čatyrochłapamu pasažyru, jaki stabilna raz na tydzień katajecca na zaniatki dresury. A darečy, prabieh: na adomietry zaraz krychu bolšy za 25 000 km. Dla mianie heta nievialikaja ličba, ale sprava ŭ tym, što majecca jašče druhi aŭtamabil, a taksama mahčymaść karystacca słužbovaj mašynaj, karparatyŭnym taksi i ŭ dadatak rehularna brać mašyny na test-drajv.

Pavialičyć

Darečy, ja vielmi pieražyvała za padviesku: žyvu za horadam, i jašče nivodzin kurjer nie ŭpuskaŭ mahčymaści raspavieści mnie, što darohi ŭ maim pasiołku — najhoršyja ŭ jaho praktycy. Ale ni skrypaŭ, ni inšych starońnich hukaŭ z boku kołaŭ pakul nie čuvać. Kali ja na adnym z TA raspaviadała pra svaje aściarohi majstru-pryjomščyku i prasiła bolš staranna ahledzieć chadavuju, jon rytaryčna spytaŭ u adkaz: «A čamu tam łamacca?», namiaknuŭšy na toje, što zzadu ŭ aŭto — bałka. Ale pry hetym znajomyja znajomych zastrašvali zamienaj piarednich ryčahoŭ u pieršy hod — maŭlaŭ, niechta navat z takim sutykaŭsia.

Takim čynam, ci škaduju ja pra rašeńnie pierasieści na novy «kitaj»? Nie. Ci chacieła b ja chutčej vypłacić kredyt i pierasieści na niešta viasiołaje, zaradžanaje i pryhožaje? Jašče jak.

Kolki straciŭ Belgee S50 u canie za hod? Acenka i ahlad na padjomniku

Ale hałoŭny minus «kitaja», jak usim viadoma, — heta toje, jak takija mašyny stračvajuć u canie. Jedziem da dylera Belgee — u sałon «Atłant-M». 

Śpiecyjalisty «Atłant-M» zładzili poŭnuju pravierku — mała ci što, čym rasčaruje mašyna paśla zimy. Aŭtamabil adrazu zahaniajecca na padjomnik: śpiecyjalist ahladaje kuzaŭ, dno, krucić koły, padśviečvaje lichtarykam elemienty padvieski. Surjoznych miaścin karozii nie znojdziena (nie dziŭna, bo ŭsio dobra apracavana «antykarozijkaj»), chadavaja taksama biez narakańniaŭ. Śpiecyjalist źviarnuŭ uvahu na toje, što tarmaznyja kałodki «žyvyja» tolki napałovu, ale, pavodle jaho prahnozaŭ, da čaćviortaha płanavaha TA jany daciahnuć, tamu nie strašna.

Pavialičyć

Pavialičyć

Kampjutar «pačytaŭ» pamyłki: aktyŭnych niama, jość tolki adna «histaryčnaja», źviazanaja z rulavym kiravańniem.

A ciapier da hałoŭnaha. U jakuju sumu aceniać hadavałuju mašynu? Barabannaja drob… $16 000 pa kursie, abo 45 324,80 rubla. Nahadaju, aŭtamabil kuplaŭsia ŭ kancy sakavika 2025 hoda za 67 800 rubloŭ. To bok za hod jon straciŭ 33,15% svajho koštu, kali ličyć u rublach. Nu ci tracinu koštu.

Kali ŭ mašyny byŭ prabieh 5500 km, try roznyja dylery acanili jaje na $16 000 (48 000 rubloŭ u červieni), $14 500 i $15 000. Łyžka miodu ŭ hetaj bočcy dziohciu: atrymlivajecca, samy vialiki «abvał» koštu ŭžo adbyŭsia i aŭtamabil vyjšaŭ na svajo «płato».

Kolki pryjdziecca płacić, kali ja zachaču pierasieści z Belgee S50 na X50 prosta ciapier?

Pakolki my ŭžo ŭ sałonie Belgee, što kali ja prosta zaraz zachaču pamianiać svoj S50 na X50. Kolki mnie pryjdziecca dapłacić u majoj kankretnaj situacyi? Adkryvaju internet-bankinh: doŭh za kredyt składaje 53 445,40 rubla. A mašynu acanili, paŭtarusia, na 45 324,80…

To bok kali ja prosta ciapier pradam jaje dyleru, to ŭsio roŭna zastanusia vinavataja banku 8 120,60 rubla.

Tak, aŭtamabil straciŭ u canie bolš, čym ja paśpieła vypłacić za jaho za hod.

Pavialičyć

Takim čynam, kab pierasieści na krasovier ź siedana (uličvajučy avans 25%), mnie treba mieć na rukach 23 345,60 rubla. Paśla hetaha ja adkryju novy kredyt, tak by mović, z nula i na 10 hadoŭ.

Kolki kaštuje kožny miesiac na kredytnym Belgee S50?

Naprykancy — jašče krychu matematyki. Padličym, u jakuju realnuju sumu mnie abychodzicca vałodańnie siedanam za miesiac.

Paliva. Pry prabiehu 2080 km na miesiac i raschodzie 8ł/100km — prykładna 444 rubli.

TA. Zychodziačy z prabiehu — kala 77 rubloŭ na miesiac.

Myjka. Kala 110 rubloŭ.

Šynamantaž i huma. Prykładna 27,5 rubla (z ulikam pakupki kamplekta na 3 siezony).

Kaska. 139 rubloŭ na miesiac.

«Aŭtahramadzianka» i techahlad. Kala 10,7 rubli na miesiac.

Kredyt. Štomiesiačny płaciož u hrejs-pieryjad — kala 760 rubloŭ.

Razam štomiesiac novaja mašyna abychodzicca mnie na 1568,2 rubla. Ci tańniej utrymlivać i absłuhoŭvać patrymany premium? Pytańnie rytaryčnaje — i ŭ kožnaha budzie svoj adkaz.

• 3
• 0
• 11
• 7
• 1
• 0
• 0
• 0