Kiprski afšor vykupiŭ raniej nieviadomuju rezidencyju pad Radaškovičami VIDEA
Telekanał «Biełsat» apublikavaŭ videa, źniataje kala siadziby «Krasnasielskaje». Miesca jaje znachodžańnia paznačana na karcie jak vioska Pralnia Minskaha rajona (kiłamietr ad vioski Kukieleŭščyna i pryblizna 7 kiłamietraŭ ad miastečka Šaršuny). Heta nakirunak Radaškovičaŭ.
«Znak na darozie zabaraniaje ŭjezd. Tym nie mienš pa karotkaj šašy, jakuju bieśpierapynna čyścić śpiectechnika, kursujuć dziasiatki aŭtaŭ. Siarod ich my sustreli słužbu čystki basiejnaŭ i džakuzi. Adzinaje vyjście — kinuć transpart i pajści pieški. Pierad ujaznoju bramaju — milicyja, jakuju miascovyja rajać nam abychodzić. Terytoryju aharodžvaje płot sa ščylna rasstaŭlenym videanazirańniem. Bačna, što spadarožnikavyja zdymki značna sastareli. Terytoryja vyhladaje, chutčej, jak sanatoryj, a nie jak budaŭničaja placoŭka. Tut ža i miesca dla pasadki viertalotaŭ», — paviedamlaje «Biełsat». Žurnalistam udałosia zrabić zdymki z pavietra.
Siadziba zajmaje kala 11 hiektaraŭ na bierazie raki Udry. Ułaśnikam źjaŭlajecca Respublika Biełaruś, adnak učastak na 100 hadoŭ uziaty ŭ arendu zamiežnym budaŭničym unitarnym pradpryjemstvam «SiertusAvija». Heta rasijskaja kampanija, adzinaja ŭzhadka pra jaje była ŭ 2012 hodzie. Tady «SiertusAvija» budavała anhar u aeraporcie «Minsk-2».
Dalej ślady zabłytvajucca jašče macniej.
Budynki na terytoryi tajamničaj rezidencyi naležać kiprskaj afšornaj kampanii. «Błatbierh Chołdynhs Limited» ź Nikasii vykupiła jaje ŭ 2012 hodzie. Pryčym pradaŭcami byli razam «SiertusAvija» i «Dypsiervis».
«Dypsiervis» — arhanizacyja, u abaviazki jakoj uvachodzić zabieśpiačeńnie dziejnaści vyšejšych słužbovych asobaŭ, u tym liku prezidenta. Bolšaść rezidencyj Alaksandra Łukašenki naležyć mienavita «Dypsiervisu».
I voś hetaja arhanizacyja pradała budynki kiprskamu afšoru. Hrošy zaśviacilisia surjoznyja — adna tolki draŭlanaja łaźnia płoščaj mienš za 50 m2 kaštavała $1,04 miljona!
Pryčym kali ŭłaśnik źmianiŭsia, to haspadarčaje viadzieńnie zastałosia za rasiejcami z «SiertusAvija».
Heta pieršy vypadak u historyi Biełarusi, kali adna z rezidencyj pierachodzić z-pad kantrolu «Dypsiervisa» va ŭłasnaść nieviadomych afšornych kampanij.
Čytajcie taksama:
Usie rezidencyi prezidenta Biełarusi: ad «Drazdoŭ» da rodnaj chaty — foty
Ciapier čytajuć
«Šynvize — končany sadyst». Adzin z adyjoznych načalnikaŭ kałonii Babrujska pierabraŭsia ŭ Hiermaniju29
Kamientary