Chełboj II: Załataja armija
Hiljerma Del Tora pieraŭzyjšoŭ sam siabie.
Chistki mir, jaki isnavaŭ pamiž staražytnymi pačvarami i śvietam ludziej parušany. Ciomny prync Nuada źbirajecca abudzić Załatuju armiju, jakaja kaliści ledźvie nia źniščyła čałaviectva. Na šlachu siłaŭ zła stanovicca kalarytny čort z padpilenymi rahami – i jahonyja siabry ź Biuro paranarmalnych źjavaŭ…
U druhoj častcy “Chłopca z apramietnaj” meksikanski vizijaner Hiljerma Del Tora pieraŭzyjšoŭ sam siabie. Kali pieršy “Chełboj” – byŭ udarnym komiksam z daścipnymi persanažami, to “Załataja armija”, akramia hetaha – vizualnaja raskoša sama nievierahodnych istotaŭ, tryjumf paralelnaha śvietu, fantazijny bajavik, jaki nahadvaje lepšyja tvory Hoi dyj Boscha. Stužka Del Tory – heta dziciačaja kazka dla niepasłuchmianaha čorta, što ŭvasobiłasia na ekranie z samaju niastrymanaju fantazijaj. (Dziela čaho Del Tora navat admoviŭsia ad ekranizacyi novaha “Hary Potera”)
Fakturny aktor Ron Perłman u roli Chełboja – na viaršyni svajoj karjery. Jahonaja siabroŭka Selma Błer – “haryć na pracy” dyj ładzić siamiejnyja sceny; amfibija-telepat (Dah Džonz) pakutuje ad lubovi da ciomnaj pryncesy (Hanna Ŭołtan). A novy kiraŭnik – ektapłaźmienny dym u skafandry ładzić pedantyčnyja razborki.
Del Tora skarystoŭvaje fantazijnyja napracoŭki “Ŭładara piarścionkaŭ” i “Hary Potera” – ale nadaje im całkam aryhinalnaje tłumačeńnie. Kašmary adcianiajucca humaram, zvyrodztvy – nievierahodnaj pieknatoj.
Trolicha – božy dźmuchaviec – jakaja charčujecca kacianiatkami; puchlina, što prykidvajecca havarkim niemaŭlom; bajavy boh raślinaŭ – jakoha škada; ślapaja śmierć z kryłami, usiejanymi vačyma; drobna-pražerlivyja zubnyja fei.
Padaje załaty doždž nad staražytnym carstvam, jakomu nakanavana pamierci; lotaje ŭ bieznadziejnym fechtavalnym tancy biełatvary prync – i nazaŭždy zasynaje Załataja armija, pieramožanaja ačałaviečanym čortam.
Kamientary