Apublikavanyja pieršyja za niekalki hadoŭ zdymki Aun San Su Čžy

Byłaja lidarka Mjanmy i łaŭreatka Nobieleŭskaj premii miru Aun San Su Čžy, jakaja ź lutaha 2021 hoda znachodzicca pad vartaj, sustrełasia z delehacyjaj Mižnarodnaj fiederacyi Čyrvonaha Kryža. Heta jaje pieršaja za apošnija čatyry hady paćvierdžanaja sustreča z kim-niebudź, akramia pradstaŭnikoŭ uładaŭ Mjanmy, piša Bi-bi-si.

Na fotazdymkach sa sustrečy, apublikavanych uładami krainy, 81‑hadovaja Aun San Su Čžy vyhladaje zdarovaj i trymajecca ŭpeŭniena. Adnak nijakich padrabiaznaściaŭ pra stan jaje zdaroŭja, a taksama pra toje, pra što jana razmaŭlała z haściami, nie paviedamlajecca.

Viasnoj hetaha hoda syn Aun San Su Čžy, Kim Arys, razharnuŭ mižnarodnuju kampaniju, patrabujučy paćviardžeńnia taho, što jaho maci žyvaja i zdarovaja. U mai jon źviarnuŭsia da prezidenta Francyi Emaniuela Makrona z zaklikam zapatrabavać ad uładaŭ Mjanmy dokazaŭ taho, što jaho maci žyvaja i zdarovaja.

Kim Arys atrymaŭ pieršy list ad Aun San Su Čžy paśla jaje zatrymańnia ŭ lutym 2024 hoda. Paśla hetaha jon bolš nie atrymlivaŭ ad jaje nijakich viestak. Jaje advakaty nie bačyli svaju padabaronnuju bolš za try hady. Apošniaja fatahrafija, na jakoj byłaja lidarka Mjanmy była zafiksavanaja, była apublikavana ŭ mai 2021 hoda padčas sudovaha pracesu nad joj.

Niahledziačy na nieadnarazovyja zapeŭnivańni vajskoŭcaŭ, što Su Čžy žyvaja i zdarovaja, jany nie pradstaŭlali pierakanaŭčych dokazaŭ hetaha.

Pieravarot i prysud

Aun San Su Čžy była zatrymanaja nieŭzabavie paśla taho, jak uzbrojenyja siły zrynuli jaje ŭrad u 2021 hodzie.

Vajenny pieravarot u Mjanmie adbyŭsia praź niekalki miesiacaŭ paśla taho, jak pierakanaŭčuju pieramohu na vybarach atrymała partyja Aun San Su Čžy — «Nacyjanalnaja liha za demakratyju» (NLD).

Vajskoŭcy śćviardžali, što vyniki vybaraŭ byli sfalsifikavanyja, adnak niezaležnyja naziralniki paćvierdzili, što vybary ŭ cełym byli sumlennymi i svabodnymi.

Paśla vajennaha pieravarotu ludzi vyjšli na vulicy, i vajskoŭcy pačali žorstka padaŭlać vystupleńni prychilnikaŭ demakratyi, aktyvistaŭ i žurnalistaŭ.

Aun San Su Čžy prysudzili da 33 hadoŭ pazbaŭleńnia voli pa 19 abvinavačańniach, u tym liku ŭ karupcyi i parušeńni vybarčaha zakanadaŭstva. Jana kateharyčna adchilała ŭsie abvinavačańni, nazyvajučy ich absurdnymi, a jaje prychilniki abvinavačvali novyja ŭłady krainy ŭ sfabrykavańni spraŭ suprać palityka, kab vyklučyć jaje ŭdzieł u palityčnym žyćci krainy.

U 2023 hodzie prysud byłoj lidarcy Mjanmy byŭ źmiakčany: termin skaracili da 27 hadoŭ pazbaŭleńnia voli, a ŭ krasaviku hetaha hoda ŭłady krainy zajavili, što jana pieraviedzienaja pad chatni aryšt.

Uvieś čas paśla vyniasieńnia prysudu ničoha nie było viadoma pra ŭmovy ŭtrymańnia i stan zdaroŭja Aun San Su Čžy.

Vajenny kiraŭnik Mjanmy Min Aun Chłajn imkniecca vyvieści svoj režym ź mižnarodnaj izalacyi. Za apošnija miesiacy jon ździejśniŭ šerah aficyjnych vizitaŭ u susiednija krainy.

Dazvoł Aun San Su Čžy sustrecca z pradstaŭnikami mižnarodnaj arhanizacyi, vierahodna, taksama abumoŭleny žadańniem vyvieści krainu z dypłamatyčnaj izalacyi. Raniej, paśla paviedamleńniaŭ pra pieravod Aun San Su Čžy pad chatni aryšt, ekśpierty kazali, što, mahčyma, ułady Mjanmy rychtujucca da dalejšych źmienaŭ u jaje statusie, u tym liku da vyzvaleńnia.

Pavialičyć

Na dumku karespandenta Bi-bi-si, publikacyja materyjałaŭ pra sustreču pradstaŭnikoŭ Čyrvonaha Kryža z byłoj lidarkaj Mjanmy moža śviedčyć pra toje, što vajennaja chunta sapraŭdy hatovaja ŭ najbližejšy čas zadavolić adno z patrabavańniaŭ mižnarodnaj supolnaści — vyzvalić Aun San Su Čžy.

Siarod inšych patrabavańniaŭ da ŭrada Mjanmy — spynieńnie bambardzirovak rajonaŭ, jakija kantralujucca apazicyjaj, i pačatak pieramoŭ ab spynieńni hramadzianskaj vajny.

Aun San Su Čžy pryjšła da ŭłady ŭ 2015 hodzie paśla taho, jak papiarednija kiraŭniki Mjanmy praviali demakratyčnyja reformy. Jana nabyła viadomaść jak aktyvistka i zmaharka za demakratyju jašče pry papiarednim vajennym režymie, pravioŭšy bolš za 15 hadoŭ pad chatnim aryštam. Jana pa-raniejšamu karystajecca vialikaj papularnaściu siarod budysckaj bolšaści nasielnictva Mjanmy.

Adnak u śviecie jaje reputacyja była značna padarvanaja z-za žorstkaha abychodžańnia z pradstaŭnikami musulmanskaj narodnaści rachindža.

• 0
• 0
• 0
• 0
• 0
• 0
• 0
• 0