Zatrymany jak minimum adzin z zavadataraŭ zryvu vystupleńnia śpiecyjalnaha pradstaŭnika dziejnaha staršyni ABSIE ŭ trochbakovaj kantaktnaj hrupie pa ŭrehulavańni situacyi na ŭschodzie Ukrainy pasła Marcina Sajdzika.
Pra heta BiełaPAN paviedamiŭ aficyjny pradstaŭnik HUUS Minharvykankama Alaksandr Łastoŭski.
Zatrymany znachodzicca ŭ Leninskim RUUS stalicy. Pa fakcie zdareńnia pryznačana pravierka.
Pra inšych udzielnikaŭ incydentu pakul ničoha nie paviedamlajecca.
Nahadajem, u momant vychadu Sajdzika da žurnalistaŭ dva chłopcy i dźvie dziaŭčyny zajavili, što jany aktyvisty partyi «Druhaja Rasija» (byłaja nielehalnaja Nacyjanał-balšavickaja partyja), i pačali vykrykvać łozunhi «Druhaja Rasija!», «Ruki preč ad Danbasa!», «Parašenka — zabojca!» i «Danbas — u skład Rasii!». Maładyja ludzi raskidali ŭlotki z zajavaj, u jakoj śćviardžałasia, što pieramovy ŭ Minsku ničoha nie vyrašajuć. Sajdzik časova pakinuŭ pamiaškańnie dla pres-kanfierencyi.
Adzin z udzielnikaŭ akcyi paśla incydentu zastaŭsia siadzieć u chole haścinicy i admaŭlaŭsia razmaŭlać z žurnalistami, ale potym paviedamiŭ, što ŭsie jany pryjechali z Rasii, a akcyja była nakiravana suprać ABSIE jak arhanizacyi, jakaja, na ich dumku, ničoha nie vyrašaje. Aktyvist, jaki nazvaŭsia Mojšam, zajaviŭ, što ich metaj źjaŭlajecca «ŭklučeńnie Danbasa ŭ skład Rasii».
Biełaruskaje MZS nazvała toje, što adbyłosia, «śviadomaj pravakacyjaj, nakiravanaj na zryŭ pieramoŭnaha pracesu i dyskredytacyju minskaj pieramoŭnaj placoŭki».
Ciapier čytajuć
Kolkaść achviar vybuchu ŭ maskoŭskim elitnym restaranie na jubilei hienierała, jaki kamandavaŭ nastupam na Kijeŭ ź Biełarusi ŭ 2022-m, vyrasła da piaci čałaviek44
Kamientary