Nakolki efiektyŭna śviečki zaścierahajuć ad ciažarnaści? Havorym pra barjernuju kantracepcyju

Jakoje miesca siarod kantraceptyvaŭ zajmajuć barjernyja

Kali siońnia raźbirać kantracepcyju z punktu hledžańnia dziejsnaści, to na pieršym miescy apynucca preziervatyvy. Na druhim — harmanalnyja kantraceptyvy. Paśla — unutrymatačnyja śpirali, harmanalnyja płastyry i harmanalnyja kolcy. A za imi — usie mahčymyja barjernyja mietady kantracepcyi, kudy i ŭvachodziać śpiermicydy — kremy, hieli, pieny, a taksama śviečki, jakija razburajuć śpiermatazoidy.

Isnuje mierkavańnie, asabliva ŭ relihijnych płyniach, što lubaja kantracepcyja — heta hvałt nad arhanizmam. Kali kazać pra śpiermicydy, to hvałtu ŭ adnosinach da repraduktyŭnaha mienstrualnaha cykłu niama nijakaha.

Historyja barjernaj kantracepcyi takaja ž daŭniaja, jak i ŭ pryncypie historyja kantracepcyi, što sychodzić da časoŭ źjaŭleńnia čałavieka. Jašče ŭ Jehipcie padčas raskopak znachodzili rečy, padobnyja na ŭnutrymatačnyja śpirali i anałahičnyja varyjanty kantraceptyvaŭ.

U daŭninu vykarystoŭvali samyja roznyja śpiermicydy: advary traŭ, taŭčonuju sieru, limonnuju kisłatu, pieramołatyja rohi aleniaŭ. Na histaryčnych prastorach miedycyny možna znajści masu zhadak mienavita pra miascovuju kantracepcyju, jakaja nie dazvalaje śpiermatazoidu pranikać vyšej za šejkavy barjer, apładniać jajcakletku i pryvodzić da ciažarnaści.

Kamu pasujuć śviečki

Kamu pasujuć śviečki ŭ jakaści miascovaj kantracepcyi? Žančynam, jakija ŭ siłu niejkich abstavin žyvuć pałavym žyćciom čas ad času. Dla žančyn, u jakich na praciahu ŭsiaho mienstrualnaha cykła prysutničaje pałavoje žyćcio, hety mietad nie padychodzić.

Abirajuć śviečki ŭ jakaści kantracepcyi tyja, u kaho alerhija na łateks, pary, jakija prosta nie prymajuć toj ža preziervatyŭ u doŭhaterminovych adnosinach. Žančyny, jakim supraćpakazanaja harmanalnaja kantracepcyja. Niekatoryja kažuć: «Ja nie mahu kožny dzień pić tabletku. Ja mahu pra jaje zabyć, i heta pryniasie mnie bolš škody, čym karyści». Abo: «U mianie maleńkija dzieci» ci «U mianie muž časta ŭ kamandziroŭkach, navošta mnie kožny dzień pić tabletku?».

Śpiermicydy možna vykarystoŭvać u pieryjad karmleńnia cyckaj, kali niama ŭpeŭnienaści, što harmanalny cykł adnaviŭsia i jość ryzyka znoŭ zaciažaryć.

Hety srodak taksama pasuje tym, chto admaŭlajecca ad usich sposabaŭ i mietadaŭ kantracepcyi i abiraje pierarvany pałavy akt abo kalandarny mietad. Pa vialikim rachunku, nazvać hetyja mietady kantracepcyjaj nielha, bo ich efiektyŭnaść vielmi nizkaja. Kali ž da ich dadać śpiermicydy, heta značna pavysić efiektyŭnaść.

Z uzrostam u arhaniźmie žančyny pačynajuć adbyvacca niezvarotnyja źmieny, źviazanyja sa zhasańniem repraduktyŭnaj funkcyi. Skura hublaje ełastyčnaść, a ślizistyja abałonki — vodny bałans. Praz heta źjaŭlajecca suchaść i dyskamfort u intymnaj zonie. Śpiermicydy ž cudoŭna ŭvilhatniajuć ślizistuju pochvy i faktyčna zamianiajuć naturalnuju zmazku.

Kamu lepš abrać alternatyŭny varyjant

Nie pasujuć śviečki padletkam. Pałavoje žyćcio pavinna być maksimalna abaronienym ad infiekcyj, jakija pieradajucca pałavym šlacham. Chimičnyja śpiermicydy ad ich nie abaraniajuć. Druhi momant, čamu barjernaja kantracepcyja nie rekamiendujecca padletkam, — nie sfarmiravany mienstrualny cykł. Vykarystańnie barjernaj kantracepcyi ŭ pieryjad avulacyi źnižaje jaje efiektyŭnaść.

Nie rekamiendujucca chimičnyja mietady kantracepcyi žančynam z šeraham zachvorvańniaŭ pałavoj śfiery. Heta kandydozy, bakteryjalnyja vahinozy, zachvorvańni šejki matki, chraničnyja kalpity, cervicyty.

Što rabić, kab barjernaja kantracepcyja była maksimalna efiektyŭnaj

Hałoŭnaje — čytać instrukcyju pa prymianieńni. Jak praviła, u joj dakładna ŭsio ŭkazana. Za kolki času da pałavoha kantaktu treba vykarystoŭvać: naprykład, za 15 chvilin ci za paŭhadziny. Heta važna, pakolki ŭsie kampanienty musiać pačać pracavać.

Zvyčajna adrazu paśla vykarystańnia barjernaj kantracepcyi nielha pravodzić hihijeničnyja pracedury dla pałavych orhanaŭ. Taksama važna, kab nie było infiekcyj repraduktyŭnaha traktu, zapalenčych zachvorvańniaŭ, parušeńniaŭ mikrafłory.

I jašče adno važnaje praviła: adna śviečka — adzin pałavy kantakt. Dla druhoha razu patrebnaja novaja śviečka.

Čamu barjernaja kantracepcyja była, jość i budzie

1. Jana dastupnaja ŭ cenavym płanie.

2. Jana znachodzicca ŭ zonie dasiahalnaści žančyny.

3. Zvyčajna jana nie patrabuje dadatkovych miedycynskich kansultacyj.

4. Jana zručnaja dla žančyn, nie azadačanych pytańniem kantracepcyi štodzionna.

5. Jana kamfortnaja ŭ psichaemacyjnym płanie, bo nie parušaje naturalny chod pracesu, kali my havorym pra seks. Mnohich ludziej biantežyć sam fakt najaŭnaści preziervatyva.

6. Jaje možna spałučać ź inšymi kantraceptyvami, naprykład, z preziervatyvam.

7. Pa efiektyŭnaści barjernyja mietady kantracepcyi znachodziacca niedzie ŭ załatoj siaredzinie. Pry pravilnym vykarystańni ich, vykanańni instrukcyi, jany svaju kantraceptyŭnuju efiektyŭnaść całkam apraŭdvajuć.

Pavialičyć

• 0
• 0
• 1
• 0
• 0
• 0
• 0
• 0