Turcyja nie zmahła znajści kupca na rasijskija S-400 i moža adpravić ich na mietałałom

Ankara raniej źviarnułasia da Rasii pa dazvoł na pieraprodaž S-400 AAE. Adnak pieramovy, jak paviedamlajecca, spynilisia. Adnoj z mahčymych pryčyn nazyvajuć toje, što sami Emiraty zacikaŭleny ŭ amierykanskich źniščalnikach F-35 i nie chočuć nabyvać rasijskija sistemy, jakija mohuć stvaryć dla ich padobnyja prablemy z Vašynhtonam.

Mienavita najaŭnaść S-400 źjaŭlajecca hałoŭnaj pieraškodaj dla viartańnia Turcyi ŭ prahramu F-35. Amierykanskija sienatary patrabujuć, kab Ankara całkam pazbaviłasia ad rasijskich kompleksaŭ. Raniej Turcyja prapanoŭvała prosta vyvieści ich z ekspłuatacyi, adnak častka amierykanskich palitykaŭ ličyć hetaha niedastatkovym.

Pavodle sienatara-demakrata Krysa Kunsa, lubaja kraina, jakaja nabudzie i razhornie S-400, moža sutyknucca z tymi ž abmiežavańniami i prablemami, što i Turcyja.

Prezident ZŠA Donald Tramp jašče ŭ pačatku lipienia daŭ zrazumieć, što hatovy dazvolić Turcyi nabyć F-35 i źniać ź jaje sankcyi, uviedzienyja paśla kupli rasijskich kompleksaŭ. Prezident Turcyi Redžep Taip Erdahan zajaviŭ, što čakaje ad Trampa vykanańnia hetaha abiacańnia.

Adnak u Sienacie ZŠA padkreślivajuć: pakul Turcyja nie pazbavicca ad S-400, pytańnie pra F-35 zastajecca zabłakavanym.

Kali Ankara nie zmoža pradać kompleksy AAE i nie znojdzie inšaha prymalnaha dla ZŠA sposabu ad ich pazbavicca, adnym z varyjantaŭ moža stać ich poŭnaje źniščeńnie abo zdača na mietałałom. Pry hetym amierykanski čynoŭnik adznačyŭ, što Turcyja, vidać, usio ž zacikaŭlena ŭ tym, kab znajści inšaje rašeńnie prablemy.

ZŠA i sajuźniki pa NATA aścierahajucca, što razhortvańnie S-400 razam z zachodniaj vajskovaj technikaj dazvolić Maskvie atrymać sakretnyja danyja pra amierykanskija źniščalniki piataha pakaleńnia F-35. Rasijskija śpiecyjalisty, jakija absłuhoŭvajuć S-400, patencyjna mahli b vyvučyć stełs-technałohii F-35. 

Tamu z-za mocnaha cisku zachodnich sajuźnikaŭ i pahrozy dalejšych ekanamičnych strataŭ Ankara tak i nie razhortvała kuplenyja ŭ 2019 hodzie S-400 na pastajannaje bajavoje dziažurstva u poŭnym abjomie. Pry hetym vydatkavała jana na ździełku z Maskvoj kala 2,5 miljadaŭ dalaraŭ.

U vyniku kupla S-400 stała dla Turcyi hieapalityčnaj pastkaj: namahajučysia prademanstravać niezaležnaść svajoj źniešniaj palityki i dyviersifikavać pastaŭščykoŭ zbroi, Ankara surjozna sapsavała adnosiny z ZŠA i NATA, straciła dostup da avijacyi novaha pakaleńnia F-35 i atrymała darahija rakietnyja kompleksy, jakija ciapier faktyčna prastojvajuć.

• 2
• 2
• 14
• 1
• 1
• 0
• 0
• 0