Biełaruś upieršyniu za 20 ź lišnim hadoŭ vyłučaje svaju karcinu na «Oskar». Pra heta stała viadoma 30 červienia padčas suśvietnaj premjery filma Darji Žuk «Kryštal» na kinafiestyvali ŭ Karłavych Varach. Stužka budzie pretendavać na ŭznaharodu ŭ katehoryi «Najlepšy zamiežny film».
Navinoj padzialiłasia režysior na svajoj staroncy ŭ Facebook, piša tut.by.
Dziejańnie karciny adbyvajecca ŭ 90-ja hady ŭ Biełarusi. Maładaja dziaŭčyna-dydžej maryć źjechać u Amieryku, ale robić pamyłku ŭ zajavie na vizu. Ciapier jana vymušanaja pravieści tydzień u nievialikim zavadskim miastečku, kab nie pazbavicca šancu na vykanańnie svajoj «amierykanskaj mary». U filmie pakazana panarama žyćcia 90-ch: moładzievyja padpolnyja rejvy, stychijnyja rynki, mary maładych ludziej pra emihracyju i žyćcio zastyłaj ŭ časie pravincyi.
Zdymki filma całkam prachodzili ŭ Biełarusi. Karcina stvorana ŭ sumiesnaj vytvorčaści kinakampanij Biełarusi, ZŠA, Hiermanii i Rasii. Nad filmam pracavała mižnarodnaja zdymačnaja hrupa, hałoŭnyja roli ŭ stužcy vykanali rasijskija akciory Alina Nasibulina, Ivan Mulin, aktrysa Kupałaŭskaha teatra Śviatłana Anikiej.
Jašče na etapie vytvorčaści film pryciahnuŭ uvahu zamiežnych kinaprafiesijanałaŭ. «Kryštal» byŭ pradstaŭleny ŭ ramkach mižnarodnych fiestyvalaŭ u Ńju-Jorku (ZŠA), Kotbusie (Hiermanija) i Talinie (Estonija). Na apošnim praca Darji Žuk atrymała pryz za najlepšy kinaprajekt.
Režysior Darja Žuk naradziłasia ŭ Minsku, vučyłasia i žyvie ŭ ZŠA. Skončyła Harvardski i Kałumbijski univiersitety, pracavała na kanale HBO, źniała niekalki karotkamietražnych filmaŭ, jakija stali ŭdzielnikami i łaŭreatami mižnarodnych kinafiestyvalaŭ. Adzin ź ich, «Sapraŭdnaja amierykanka», byŭ adznačany dypłomam Minskaha mižnarodnaha kinafiestyvalu «Listapad» u 2015 hodzie.
53-i mižnarodny kinafiestyval u Karłavych Varach prachodzić z 29 červienia pa 7 lipienia. U apošni raz Biełaruś była pradstaŭlena ŭ konkursnaj prahramie fiestyvalu ŭ 2004 filmam «Akupacyja. Misteryi» Andreja Kudzinienki.
Vychad filma «Kryštal» u Biełarusi čakajecca 30 žniŭnia.
Nahadajem, što ŭ 1994 Biełaruś vyłučała na «Oskar» karcinu «Ja - Ivan, ty - Abram» režysiora Ijałandy Zobierman, a ŭ 1996 - film «Ź piekła ŭ piekła» Dźmitryja Astrachana. Z taho času nivodzin film nie vyłučaŭsia krainaj na «Oskar».
Chto toj nieadekvatny biełarus, jaki lasnuŭ dziciatka hałavoj ab padłohu ŭ maskoŭskim Šaramiećcievie8
Kamientary