«Udakładniać — heta ŭžo rabić adroźnieńnie». Vakoł italjanskaha śpievaka ź Jeŭrabačańnia ŭźnik palityčny skandał
Vybar italjanskaha śpievaka na Jeŭrabačańnie vyklikaŭ palityčny skandał. Italjanski vice-premjer Matea Salvini raskrytykavaŭ vybar žury, bo Mamud — syn sa źmiašanaha šlubu jehipcianina i italjanki.
Italija ciapier pasyłaje na «Jeŭrabačańnie» pieramožcu fiestyvalu ŭ San-Rema, a jon, u svaju čarhu, pieratvaryŭsia ŭ italjanskuju viersiju «Hołasu krainy», «Ch-faktaru». Hledačy prahałasavali za śpievaka Ultimo, žury i presa addali pieravahu Mahmood-u (pa-italjansku čytajecca jak «Mamud»).
Papulist Salvini tut ža ŭchapiŭsia za hetuju situacyju, kab raskrytykavać «elity», jakija nie prysłuchoŭvajucca da «narodu».
«#Mahmood…………… mach…………Samaja pryhožaja italjanskaja pieśnia?!? Ja b vybraŭ #Ultimo, a što skažacie vy??» — takim tvitam adhuknuŭsia na pieramohu Mamuda palityk.
Sam Mamud spakojna ŭspryniaŭ sproby palityzacyi jaho pieramohi. «Nie, ja nie chaču ŭstupać ni ŭ jakuju palemiku, — skazaŭ jon. — Ja italjanski pacan na 100%. Ja syn mamy sardki i taty-jehipcianina». Jon spakojna adznačyŭ, što jaho pakaleńnie našmat bolš «intehravanaje», źmiašanaje, čym raniejšyja.
Vystup Mamuda na Jeŭrabačańni akazaŭsia pośpiecham. Jon zaniaŭ druhoje miesca, i tolki na trochi adstaŭ ad pieramožcy. Pryčym za jaho adnolkava dobra hałasavali jak žury, tak i hledačy.
Jaho pieśnia — kryk dušy ab sychodzie baćki ź siamji, pra toje, što ad baćki patrebny nie tolki hrošy (nazva pieśni — Soldi), a žyvy kantakt.
Maci śpievaka z tatam raźvialisia, kali jamu było 5 hadoŭ, i jon amal nie bačyŭ baćki. Pa-arabsku jon nie havoryć, zatoje razmaŭlaje pa-sardsku — movie vostrava Sardynija, adkul pachodzić mama. Vyras jon u adnym ź mikrarajonaŭ Miłana. «Na pieryfieryi vielmi horača» — pieršyja słovy pieśni.
Tekst pieśni — pa-italjansku, heta składanaja liryka. U prypievie pieśni niekalki słoŭ taksama pa-arabsku: «Synku, synku, daražeńki, chadzi damoŭ» — heta adzinyja słovy, jakija syn zapomniŭ ad taty — słovy, jakimi baćka klikaŭ jaho z dvara dachaty. Klip na pieśniu sabraŭ 82 miljony prahladaŭ.
Mamud — taki čysty pradukt italjanskaj kultury i italjanskaha šou-biznesu. Što cikava, na sardskim dyjalekcie jon havoryć, zatoje nie razumieje anhlijskaj movy.
Jak i pieramožca konkursu, niderłandziec Dankan Łoŭrens, Alesandra Mamud hiej, adnak jon vielmi krytykuje tych, chto akcentuje svaju seksualnaść. «Ja z pakaleńnia, dla jakoha nie maje značeńnia koler skury ci ty kachaješ čałavieka adnaho ci druhoha poła, — skazaŭ Mamud u intervju vydańniu «Karjere dela sera». - Ja nikoli nie kazaŭ, što ja hiej. Ja zaručany, i ja paličyŭ by niavietlivym pytańnie, zaručany ja ź dziaŭčynaj ci chłopcam. Udakładniać — heta ŭžo rabić adroźnieńnie».
«Raznastajnaść — heta kaštoŭnaść», — paŭtaraje jon u roznych intervju.
Italija, jak i Francyja, tradycyjna pasyłajuć na Jeŭrabačańnie pieśni na nacyjanalnych movach. Dva hady tamu vysokaje miesca zaniaŭ Francesco Gabbani z Occidentali's Karma. Tam taksama była składanaja liryka z hulnioj słoŭ, i pieśnia na siońnia nabrała amal 220 miljonaŭ prahladaŭ na Jutubie.
Kamientary