«Удакладняць — гэта ўжо рабіць адрозненне». Вакол італьянскага спевака з Еўрабачання ўзнік палітычны скандал

Выбар італьянскага спевака на Еўрабачанне выклікаў палітычны скандал. Італьянскі віцэ-прэм'ер Матэа Сальвіні раскрытыкаваў выбар журы, бо Мамуд — сын са змяшанага шлюбу егіпцяніна і італьянкі.

Італія цяпер пасылае на «Еўрабачанне» пераможцу фестывалю ў Сан-Рэма, а ён, у сваю чаргу, ператварыўся ў італьянскую версію «Голасу краіны», «Х-фактару». Гледачы прагаласавалі за спевака Ultimo, журы і прэса аддалі перавагу Mahmood-у (па-італьянску чытаецца як «Мамуд»).

Папуліст Сальвіні тут жа ўхапіўся за гэтую сітуацыю, каб раскрытыкаваць «эліты», якія не прыслухоўваюцца да «народу».

«#Mahmood…………… мах…………Самая прыгожая італьянская песня?!? Я б выбраў #Ultimo, а што скажаце вы??» — такім твітам адгукнуўся на перамогу Мамуда палітык.

Сам Мамуд спакойна ўспрыняў спробы палітызацыі яго перамогі. «Не, я не хачу ўступаць ні ў якую палеміку, — сказаў ён. — Я італьянскі пацан на 100%. Я сын мамы сардкі і таты-егіпцяніна». Ён спакойна адзначыў, што яго пакаленне нашмат больш «інтэграванае», змяшанае, чым ранейшыя.

Выступ Мамуда на Еўрабачанні аказаўся поспехам. Ён заняў другое месца, і толькі на трохі адстаў ад пераможцы. Прычым за яго аднолькава добра галасавалі як журы, так і гледачы.

Яго песня — крык душы аб сыходзе бацькі з сям'і, пра тое, што ад бацькі патрэбны не толькі грошы (назва песні — Soldi), а жывы кантакт.

Маці спевака з татам развяліся, калі яму было 5 гадоў, і ён амаль не бачыў бацькі. Па-арабску ён не гаворыць, затое размаўляе па-сардску — мове вострава Сардынія, адкуль паходзіць мама. Вырас ён у адным з мікрараёнаў Мілана. «На перыферыі вельмі горача» — першыя словы песні.

Тэкст песні — па-італьянску, гэта складаная лірыка. У прыпеве песні некалькі слоў таксама па-арабску: «Сынку, сынку, даражэнькі, хадзі дамоў» — гэта адзіныя словы, якія сын запомніў ад таты — словы, якімі бацька клікаў яго з двара дахаты. Кліп на песню сабраў 82 мільёны праглядаў.

Мамуд — такі чысты прадукт італьянскай культуры і італьянскага шоу-бізнэсу. Што цікава, на сардскім дыялекце ён гаворыць, затое не разумее англійскай мовы.

Як і пераможца конкурсу, нідэрландзец Данкан Лоўрэнс, Алесандра Мамуд гей, аднак ён вельмі крытыкуе тых, хто акцэнтуе сваю сэксуальнасць. «Я з пакалення, для якога не мае значэння колер скуры ці ты кахаеш чалавека аднаго ці другога пола, — сказаў Мамуд у інтэрв'ю выданню «Кар'ерэ дэля сэра». - Я ніколі не казаў, што я гей. Я заручаны, і я палічыў бы няветлівым пытанне, заручаны я з дзяўчынай ці хлопцам. Удакладняць — гэта ўжо рабіць адрозненне».

«Разнастайнасць — гэта каштоўнасць», — паўтарае ён у розных інтэрв'ю.

Італія, як і Францыя, традыцыйна пасылаюць на Еўрабачанне песні на нацыянальных мовах. Два гады таму высокае месца заняў Francesco Gabbani з Occidentali's Karma. Там таксама была складаная лірыка з гульнёй слоў, і песня на сёння набрала амаль 220 мільёнаў праглядаў на Ютубе.

• 0
• 0
• 0
• 0
• 0
• 0
• 0
• 0