«Kommiersant» pra płan intehracyi Biełarusi i Rasii: Maskva choča ekanamičnaha pahłynańnia
Rasija i Biełaruś majuć namier stvaryć adziny Padatkovy i Hramadzianski kodeksy, źniešniehandlovy režym, a taksama ŭnifikavać ulik ułasnaści da 2021 hoda. Z prahramaj ekanamičnaj intehracyi aznajomiŭsia «Kamiersant».
Akramia taho, krainy płanujuć sfarmavać adzinyja sacharantyi, abjadnać bankaŭski nahlad (adnak jon budzie pracavać z dvuma centrabankami), stvaryć adziny rehulatar rynkaŭ nafty, hazu i elektraenierhii i dziaržrehulavańnie halin.
Adznačajecca, što pry takoj vysokaj stupieni intehracyi havorka idzie ab stvareńni z 2022 hoda kanfiederatyŭnaj dziaržavy.
Dva ministerstvy ekanomiki — rasijskaje i biełaruskaje — da 1 listapada 2019 hoda taksama pavinny stvaryć «darožnuju kartu», iakaja abjadnoŭvaje halinovaje rehulavańnie. Akramia HEK harmanizavać (u dadzienym vypadku majecca na ŭvazie adziny nabor normaŭ rehulavańnia, a nie adziny «sajuzny» dziaržorhan) prapanujecca «pramysłovuju palityku», što b heta ni značyła, režym dziaržrehulavańnia ahrarynkaŭ, handlu, transpartu i suviazi, antymanapolnuju palityku, režym abarony spažyŭcoŭ.
Absalutna nie zakranutyja «Prahramaj dziejańniaŭ» nastupnyja śfiery: heta abarona, dziaržbiaśpieka, sud, pravaachova i pytańni MUS, adukacyja, achova zdaroŭja, navuka, a taksama niepasredna dziaržkiravańnie, h.zn. ŭnutranaja forma vykanaŭčaj ułady ŭ Rasii i Biełarusi, jak, zrešty, i paŭnamoctvy (dy i samo isnavańnie) vykanaŭčaj ułady Sajuznaj dziaržavy.
Adnak baki damovilisia ab tym, što «inšyja pałažeńni damovy» ab Sajuznaj dziaržavie taksama mohuć abmiarkoŭvacca.
Prynamsi da 2022 hoda kazać pra «faktyčnaje abjadnańnie» dźviuch krain z nastupnym pierachodam u «nadbudovačnuju» strukturu centralnych uładnych paŭnamoctvaŭ Rasii i Biełarusi zychodziačy z «Prahramy dziejańniaŭ» naohuł niama padstaŭ — u dakumiencie idzie havorka tolki pra ekanamičnuju intehracyju, adznačaje Kamiersant.
Prajekt «Prahramy dziejańniaŭ Biełarusi i RF pa realizacyi pałažeńniaŭ dahavora ab stvareńni Sajuznaj dziaržavy» ŭzhadnili z mahčymaściu niaznačnych źmienaŭ 6 vieraśnia premjer-ministry Rasii i Biełaruś Dźmitryj Miadźviedzieŭ i Siarhiej Rumas.
Vydańnie adznačaje, što «pry realizacyi płana da 2021 hoda havorka idzie pra pahłynańnie mocna adziaržaŭlenaj ekanomikaj Rasii amal całkam dziaržaŭnaj ekanomiki Biełarusi na ŭzroŭni kiravańnia», bo VUP Rasii ŭ 29 razoŭ bolšy za VUP Biełarusi.
Łukašenka niervova prakamientavaŭ vizit Cichanoŭskaj u Kijeŭ45
Kamientary