EPAM dumaŭ, što štučny intelekt — heta redki šaniec. Akazałasia, usio składaniej
Pa vynikach druhoha kvartała kampanija EPAM źniziła prahnoz pa roście hadavoj vyručki, paśla čaho akcyi ŭpali nižej za $100. Ale što zdaryłasia? Devby.io raskazvaje, što było na žnivieńskim sazvonie inviestaraŭ.
Novaje vyprabavańnie dla kampanii padrychtavała nie hieapalityka i nie makraekanomika (tam bieź źmienaŭ — vajna na Blizkim Uschodzie ŭsio tak ža zaciahvaje pryniaćcie rašeńniaŭ), a AI. Akazałasia, što štučny intelekt źmianiaje strukturu popytu chutčej, čym EPAM paśpiavaje zamiaścić padajučy popyt na tradycyjnyja pasłuhi novymi ŠI-zamovami.
Stratehija prodažaŭ u Paŭnočnaj Amierycy nie spraŭlajecca
Za druhi kvartał EPAM vyručyła ad ŠI-natyŭnych rašeńniaŭ bolš za 160 młn dalaraŭ, heta 11% ad usioj vyručki. Novy siehmient raście chutka, ale stary ściskajecca jašče chutčej.
«Dzieści ŭ lipieni my pačali zaŭvažać, što klijenty addajuć pryjarytet AI-biudžetam, pieraraźmiarkoŭvajučy vydatki z zadač, źviazanych z tradycyjnymi pasłuhami, — takich jak ručnoje teściravańnie, UX, raspracoŭka na JavaScript, frontend. Jany pieraklučajucca na madernizacyju, i hety pierachod adbyvajecca chutčej, čym naroščvajucca novyja abjomy prac, jakija pavinny zamianić raniejšyja. U vyniku ŭ nas uźnikaje razryŭ u roście», — patłumačyŭ sutnaść prablemy SIEO kampanii Bałaž Fieješ.
Asabliva zaŭvažnaja jana ŭ amierykanskim rehijonie, dola jakoha zajmaje 57% u vyručcy EPAM. Pavieličeńnie finansavych pasłuh tam było źjedziena padzieńniem u siektary prahramnaha zabieśpiačeńnia i vysokich technałohij, u vyniku pryrost vyručki skłaŭ usiaho 0,5% u hadavym vyražeńni. U EPAM pryznajuć, što ich ułasnaja stratehija prodažaŭ u Paŭnočnaj Amierycy pracuje nie na naležnym uzroŭni.
«My bačym, što našy klijenty ŭsio čaściej chočuć bačyć abhruntavańni metazhodnaści prajektaŭ, kamiercyjnyja prapanovy, a nie prosta inžyniernyja rašeńni, jak heta było ŭ minułym», — patłumačyŭ Fieješ.
Novyja bujnyja ździełki sa starymi klijentami adsoŭvajucca, vyručka ad ich pačnie pastupać nie raniej za pieršuju pałovu 2027 hoda.
Voś jašče adna malaŭničaja cytata Fieješa, jakaja apisvaje sutnaść prablemy: klijenty nie prosta chočuć ukaraniać ŠI ŭ svoj biznes, ale atrymlivać ad hetaha addaču.
«U hetym kvartale pry kožnaj sustrečy z klijentami ŭźnikała adno i toje ž pytańnie: jak atrymać vyhadu z AI i atrymać stanoŭčuju addaču ad inviestycyj? Moj adkaz taki: heta składanaje pytańnie, na jakoje AI nie prapanuje prostaha adkazu. Pryčyna ŭ tym, što AI nie pamianšaje składanaść, a, naadvarot, pavialičvaje jaje na ŭsich uzroŭniach: talenty, architektura, pracesy, kiravańnie i madeli. Kadziravańnie aŭtamatyzujecca, raspracoŭka — nie. Čym lepš AI piša kod, tym važniejšaj stanovicca raspracoŭka rašeńniaŭ na apošnim etapie i paśpiachovaje razhortvańnie».
Rehijon EMEA (Europe, Middle East and Africa), dola jakoha 41%, naadvarot, lidziruje pa tempach rostu (+10,9% u hadavym vyličeńni). U mnohim dziakujučy tamu, što tam EPAM užo ažyćciaviŭ transfarmacyju markietynhu i mietadaŭ prodažaŭ. Asnoŭny ŭniosak u rost u hetym rehijonie dali finansavyja pasłuhi, turyzm, spažyvieckija tavary i enierhietyka.
Hrošy iduć nie na inžynieraŭ, a na tokieny
Prablemu paharšaje toje, što zakazčyki ciapier vymušanyja dzialić biudžet pamiž pasłuhami EPAM i AI-infrastrukturaj. Pavodle słoŭ SIEO, klijenty (pierš za ŭsio z partfiela SaaS-kampanij) pieranakiroŭvajuć svaje vydatki na tokieny i hrafičnyja pracesary. To bok ŠI nie tolki pamočnik inžynieraŭ i novaja śfiera dla zamoŭ, ale i pramy kankurent kampanii za biudžet klijenta.
I, zdajecca, heta prablema ŭniviersalnaja, a nie tolki EPAM. Prynamsi, na pytańnie inviestara, ci nie sychodziać paŭnočnaamierykanskija klijenty da bolš dyviersifikavanych kankurentaŭ, Bałaž Fieješ upeŭniena adkazvaje «nie».
Naprošvajecca vysnova, što biudžety zakazčykaŭ źjadajuć nie inšyja kampanii, a sam ŠI.
«My nie nazirali, kab realny popyt sapraŭdy pierajšoŭ da našych kankurentaŭ, — kaža Fieješ. — My bačym, što častka vydatkaŭ pieravodzicca ŭ tokieny, jakija my taksama možam prapanavać, ale bolšaść našych klijentaŭ kuplajuć ich napramuju abo nakiroŭvajuć srodki na infrastrukturu ci na hrafičnyja pracesary. Ja dumaju, što ŭ miežach našaj kancepcyi vychadu na rynak z bolš bujnymi ździełkami my chočam reinviestavać sekanomlenyja srodki, jakija našy klijenty atrymajuć dziakujučy pasłuham na asnovie ŠI, u raźvićcio ŭłasnaha biznesu. Tak što my nie prajhrajem kankurentam, kali vy pra heta pytajeciesia».
Cikava, što kali na majskim sazvonie Fieješ achvotna kazaŭ pra takienomiku z akcentam na košcie/krynicach zakupki tokienaŭ i «ciomnych fabrykach» jak pryvabnaj prapanovie dla klijentaŭ, to na žnivieńskaj razmovie ź inviestarami hetyja novyja słovy ŭžo nie hučać.
Štat vyras, jaho zahruzka — taksama
Miž inšym, nasupierak trendu na zamiaščeńnie supracoŭnikaŭ štučnym intelektam, štat samoj EPAM u 2026 hodzie tolki pavialičvajecca.
Pa vynikach druhoha kvartała ŭ kampanii pracavała bolš za 56 650 vytvorčych śpiecyjalistaŭ (+150 čałaviek da pieršaha kvartała), a ŭsiaho supracoŭnikaŭ było bolš za 62 850 (+100 čałaviek da pieršaha kvartała). U paraŭnańni z druhim kvartałam 2025 hoda vytvorčy štat vyras na 1,5%.
Kaeficyjent vykarystańnia resursaŭ taksama pavialičyŭsia — da 78,3% — i ŭ paraŭnańni z papiarednim kvartałam (+1,3 p. p.), i hod da hoda (+0,2 p. p.). To bok, vierahodna, na benčy (u čakańni pracy. — NN) siadzieła mienš ludziej, čym u papiarednija pieryjady.
Kursavyja roźnicy syhrali ŭ minus
Nie mienš za 10 tysiač supracoŭnikaŭ EPAM — u Indyi.
Indyjskaja tema ŭźnikła ŭ suviazi z pytańniem inviestara pra ŭstojlivaść maržy i ŭpłyŭ valutnych vahańniaŭ — vierahodna, praz asłableńnie rupii ŭ 2026 hodzie. Staršy vice-prezident EPAM Džejsan Petersan zapeŭniŭ, što kampanija nie atrymlivaje vialikaj vyhady ad valutnych vahańniaŭ. Jak tłumačyć Devby, pa-pieršaje, indyjskija supracoŭniki i tak tannyja, pa-druhoje, u bolš darahich łakacyjach miascovyja valuty, naadvarot, mocnyja.
«Niahledziačy na toje što ŭ nas značnaja pracoŭnaja siła ŭ Indyi, dola Indyi ŭ našych ahulnych vydatkach nie takaja vialikaja, jak u mnohich našych kankurentaŭ. Takim čynam, u nas pa-raniejšamu vielmi značnyja vydatki ŭ takich krainach, jak Polšča, Vienhryja, Mieksika i navat Kałumbija, dzie valuty ŭmacavalisia. I tamu valutnyja vahańni faktyčna nie zrabili istotnaha ŭniosku. Nasamreč, jany navat akazalisia niekalki admoŭnymi», — kaža Petersan.
Zusim niadaŭna kiraŭnictva EPAM kazała, što razryŭ pamiž mahčymaściami ŠI, jakija chutka raźvivajucca, i zdolnaściu pradpryjemstvaŭ nadziejna ŭkaraniać ich u vytvorčaść zabiaśpiečyć najbujniejšyja technałahičnyja inviestycyi ŭ historyi čałaviectva, i hetym šancam treba skarystacca. Praź niekalki miesiacaŭ pryznaje, što ŭsio značna składaniej.
Kamientary