Kaladny karparatyŭ u «Pajedziem pajadzim» skončyŭsia skandałam
Dniami skandalny restaran «Pajedziem pajadzim» trapiŭ u čarhovuju niepryjemnuju historyju. Rabotniki hrupy kampanij «Biełahra» vyrašyli zładzić tam karparatyŭ na Kalady — skončyłasia kanfliktam.
Praŭda, historyju lepš za ŭsio pieradaje prymaŭka «aboje raboje».
Situacyja nastupnaja: rabotniki «Biełahra» sabralisia ŭviečary 24 śniežnia ŭ restaranie ź vidam na kurapackija kryžy. Stoliki braniravali zahadzia, za niekalki miesiacaŭ, bo była vialikaja kampanija z 25 čałaviek.
Ale ŭsio pajšło nie tak: ich pasadzili nie na tym paviersie, na jaki jany raźličvali, a paśla amataraŭ «pajechać pajeści» nie zadavolili pavodziny administracyi ŭstanovy. U vyniku hości pajeli — bo pryjechali ž.
Ale zakidali restaran niehatyŭnymi vodhukami na ŭsich mahčymych placoŭkach:
«U vyniku minimalnych pieramovaŭ da nas zaprasili dyrektara restarana Śviatłanu (jana tak pradstaviłasia). Vysłuchaŭšy našy pretenzii, i toje nie da kanca, jana vykazałasia, što ničym dapamahčy nie moža i vykinuła šakavalnuju i niedapuščalnuju frazu «Kali vas štości nie zadavalniaje — my viartajem pieradapłatu i vy roŭnaj chadoju vydalajeciesia z ustanovy». Nu kudy my ŭsie tak pryhoža apranutyja padzieniemsia??? Viadoma ž, ścisnuŭšy zuby, i ŭžo bieź śviatočnaha nastroju vyrašyli zastacca i choć niejak davieści svaje mety da kanca».
«Naša Niva» źviazałasia z tymi, chto adpačyvaŭ u restaranie, i z administracyjaj ustanovy.
U kampanii «Biełahra» nazvali ŭsio heta «nieparazumieńniem» i padkreślili, što supracoŭniki adpačyvali ŭ restaranie nie ŭ farmacie aficyjnaha karparatyvu, a ŭ farmacie «sustrečy siabroŭ».
U restaranie «Pajedziem Pajadzim» admovilisia kamientavać situacyju. Ale ž adkazali na pretenzii klijentaŭ u piśmovym vyhladzie, pakinuŭšy adkaz na adzin z vodhukaŭ.
Pa słovach pradstaŭnikoŭ restarana, hości z «Biełahra» prapanavali «kampramis» za svaje pakuty: kab u jakaści vybačeńnia z boku administracyi im dazvolili nie apłačvać rachunak za viečar.
Naturalna, administracyja restarana na taki «kampramis» nie pajšła, što jašče bolš razzłavała klijentaŭ.
Karaciej, adny «pajechali, pajeli», inšyja ž apraŭdali čakańni chejtaraŭ.
Kamientary