Pamiežny kamitet Biełarusi abnaviŭ infarmacyju nakont čalcoŭ Kaardynacyjnaj rady Maryi Kaleśnikavaj, Ivana Kraŭcova i Antona Radniankova. Raniej paviedamlałasia, što ŭnačy jany ŭsie troje pierasiekli miažu z Ukrainaj, piša BiełTA.
«Anton Radniankoŭ, Ivan Kraŭcoŭ i Maryja Kaleśnikava 8 vieraśnia kala 4:00 raspačali sprobu pakinuć terytoryju Biełarusi praz aŭtadarožny mižnarodny punkt propusku «Alaksandraŭka» na biełaruska-ŭkrainskaj miažy. Z ulikam asablivaściaŭ infrastruktury punkta propusku i prachodžańnia linii dziaržaŭnaj miažy na hetym učastku ažyćciaŭlajecca ŭzmacnieńnie achovy dziaržmiažy i byli vystaŭlenyja dadatkovyja pamiežnyja narady, — raspavioŭ aficyjny pradstaŭnik Dziaržaŭnaha pamiežnaha kamiteta Anton Byčkoŭski. — Radniankoŭ, Kraŭcoŭ i Kaleśnikava na aŭtamabili «BMV» prajšli mytny pahraničny kantrol, vyjechali ŭ bok Ukrainy. Adnak paśla, sustreŭšy pahraničny narad, mašyna rezka paskoryłasia, stvaryŭšy pahrozu žyćcia vajennasłužačamu orhanaŭ pahranižnaj słužby. Kaleśnikava apynułasia pa-za transpartnym srodkam. Pa sutnaści jaje vypchnuli ź jaho i praciahnuli ruch u bok Ukrainy».
Anton Byčkoŭski dadaŭ, što Radniankoŭ i Kraŭcoŭ pakinuli terytoryju Biełarusi i apynulisia na sumiežnym baku. Kaleśnikava zatrymanaja.
Paźniej Byčkoŭski paćvierdziŭ i «Svabodzie», što Maryja Kaleśnikava zatrymanaja pamiežnikami: «Ciapier idzie raźbiralnictva, kab dać hetaj situacyi pravavuju acenku».
A «Interfaks-Ukraina» sa spasyłkaj na krynicy piša, što Maryja Kaleśnikava nie pierasiekła miažu Ukrainy, bo pry sprobie jaje hvałtoŭnaha vyvazu z terytoryi Biełarusi jana parvała svoj pašpart.
«Pry sprobie faktyčnaj departacyi jana parvała pašpart, i nie mahła być prapuščana pamiežnikami na terytoryju Ukrainy»,-skazaŭ surazmoŭca ahienctva.
«Maryju Kaleśnikavu nie ŭdałosia vydvaryć ź Biełarusi, bo hetaja śmiełaja žančyna raspačała dziejańni pa praduchileńni jaje pieramiaščeńnia praź miažu.
Jana zastałasia na terytoryi Biełarusi», — napisaŭ u sacyjalnaj sietcy Facebook namieśnik ministra ŭnutranych spraŭ Ukrainy Anton Hieraščanka.
Ciapier čytajuć
Zorka brejkdansu ź Viciebska atrymaŭ 11 hadoŭ turmy ŭ Kitai. Što zdaryłasia?5
Kamientary