Hałasavyja pamočniki ŭsio bolš aktyŭna stanoviacca častkaj našaha štodzionnaha žyćcia, ale jość hrupa nasielnictva, jakaja pakul zastajecca pa-za miežami hetych tendencyj. Na siońniašni dzień hłuchija ludzi nie majuć mahčymaści skarystacca dadatkami nakštałt Siri ad Apple ci Alisy ad kampanii Jandeks.
Hetyja ludzi kamunikujuć na movie žestaŭ — «na mihi», jak havorać pa-biełarusku, i šmat chto sprabavaŭ navučyć hetaj movie kampjutary. Apošni čas prapanoŭvalisia samyja roznyja varyjanty rašeńniaŭ — ad sensarnych palčatak, što rehistrujuć ruchi palcaŭ karystalnika, da admysłovych prahram dla toj ža mety. Ale ŭsie jany byli biespaśpiachovyja, piša The Economist.
Adnak navukoŭcy praciahvajuć šukać varyjanty taho, jak technałohii mahli b bolš spryjać intaresam hłuchich ludziej. Ekśpierty rychtujuć bazy źviestak z tekstami na mihi. A prahramisty, u svaju čarhu, sprabujuć pieratvaryć hetyja bazy ŭ karysnyja pradukty dla hłuchich karystalnikaŭ.
Jak i zvyčajnyja movy, movy žestaŭ — a ich sistem u śviecie naličvajecca kala sotni — majuć svaje hramatyčnyja asablivaści, admietnyja idyjomy i dyjalekty. U toj ža čas dapamožniki pa mihi daloka nie zaŭsiody adlustroŭvajuć tonkaści štodzionnaha ŭžyvańnia tych ci inšych žestaŭ. Asobnyja movy mohuć stać skaračeńniem dla niejkich składanych idej. Tamu pravilna raspaznać mihi našmat składaniej, čym zrazumieć vymaŭlenyja składy abo napisanyja litary.
U 2019 hodzie kampanija Microsoft praviała daśledavańnie, zhodna ź jakim typovaja ahulnadastupnaja baza tekstaŭ na zvyčajnych movach składajecca prykładna ź miljarda słoŭ ad tysiačy roznych pramoŭcaŭ. U vypadku z movami žestaŭ bazy tekstaŭ zvyčajna bolš ścipłyja — mienš za 100 tysiač znakaŭ usiaho ad dziesiaci pramoŭcaŭ.
Dobraja baza tekstaŭ pavinna być raznastajnaj, inakš jana nie zmoža efiektyŭna pracavać. Da taho ž, kampjutary vučacca nadta pavolna, to-bok im treba tłumačyć kožny kavałak uviedzienaj infarmacyi — kožny ruch i vyraz tvaru. Heta taksama patrabuje času.
Zbor infarmacyi, nieabchodnaj dla pracy z movami žestaŭ, patrabuje zapis mimiki ludziej, tamu šmat kaho chvaluje prablema pryvatnaści. Ale pry dastatkovaj kolkaści źviestak budzie mahčyma dasiahnuć dobrych vynikaŭ. Daśledčyki vienhierskaj kampanii SignAll užo majuć kala 300 tysiač videa ad sta pramoŭcaŭ z vykarystańniem bolš za 3 tysiač znakaŭ z amierykanskaj movy žestaŭ. Raspracavanaja kampanijaj prahrama moža razumieć hetuju movu pry pavolnaj chutkaści i pierakładać mihi ŭ piśmovuju anhlijskuju movu. Pakul što prahrama pracuje tolki pry vykarystańni admysłovych palčatak.
Kiraŭnik kampanii Žołt Robatka tłumačyć, što ciapier praca navukoŭcaŭ źviazanaja ź pierakładam tekstaŭ na movie žestaŭ u zvyčajnyja piśmovyja ci vusnyja teksty. Pierakład u advarotnym nakirunku bolš składany, bo treba vyrašyć pytańnie taho, jak vizualizavać mihi.
Nad hetym ciapier pracujuć niekalki mižnarodnych prajektaŭ, ale zastajecca pytańnie pravilnaha padychodu da prablemy. Papiarednija prajekty takoha kštałtu byli pryśviečanyja palapšeńniu kamunikacyi z hłuchimi dla inšych ludziej. Ekśpierty ličać, što kali ŭ centry ŭvahi padčas raspracoŭki novych praduktaŭ pastavić mienavita intaresy hłuchich ludziej, to heta pryviadzie da lepšych vynikaŭ.
Ciapier čytajuć
«Zaprasiŭ mianie na spatkańnie i pryjechaŭ na jaho z pakietam pamidoraŭ zamiest kvietak». Što ŭspaminajuć pra Jana Pamiedora Reuckaha, admina šmattysiačnaj supołki biełarusaŭ Polščy55
Kamientary