«Pavodziŭ siabie nachabna i aburalna». YouTube-błohiera aryštavali na 10 sutak za «pieraškodu» ahladu doma
37-hadovy Vadzim Klučnik viadzie YouTube-kanał Vadim Key. 25 maja dadomu ŭ Kałodziščach da mužčyny pryjšli supracoŭniki milicyi, kab pravieści ahlad na padstavie pastanovy, jakaja była vypisanaja «ŭ suviazi z pravierkaj infarmacyi ab mahčymym udziele ŭ kryminalnaj spravie», paviedamlajuć pravaabaroncy.
28 maja spravu Vadzima pa art. 24.3 KaAP razhladzieŭ sudździa Minskaha rajona Vadzim Kaziej. Błohiera abvinavacili ŭ pieraškodzie milicyjantam padčas ahladu ŭ domie i ŭ tym, što Vadzim «pavodziŭ siabie nachabna i aburalna». Svaju vinu Klučnik nie pryznaŭ.
U toj čas, kali da jaho pryjšli milicyjanty, mužčyna kasiŭ travu na zadnim dvary, tamu moh adrazu nie pačuć. Ale kali ŭbačyŭ supracoŭnikaŭ, to adrazu adčyniŭ bramku i aznajomiŭsia z pastanovaj.
Zrabiŭ jon heta dvojčy, bo nie moh pavieryć pračytanamu i dumaŭ, što da jaho pryjšli pamyłkova. Sa słovaŭ Vadzima, jon prapanavaŭ prajści im u dom i niepadparadkavańnie nie akazvaŭ. Pakazańni Klučnika paćvierdziła i jaho žonka, jakaja vystupiła śviedkaj na sudzie.
U pakazańniach milicyjanta «Nieŭskaha» adsutničaje, što Klučnik «pavodziŭ siabie nachabna i aburalna», ale mienavita heta jamu i staviłasia ŭ vinu. Taksama pavodle pratakoła čas zatrymańnia i čas pravaparušeńnia — adnolkavyja.
U vyniku sudździa Kaziej pryznaŭ Klučnika vinavatym pa art. 24.3 KaAP i aryštavaŭ jaho na 10 sutak.
Kamientary