NYT: Amierykanskija sankcyi mohuć zrujnavać ekanomiku Rasii, ale staviać pad pahrozu i suśvietnuju finansavuju sistemu
Mahčymyja sankcyi ZŠA suprać Rasii, jakija Vašynhton pryhraziŭ uvieści ŭ vypadku ahresii Maskvy suprać Kijeva, mohuć pryvieści da vysokaj inflacyi, krachu rasijskaha fondavaha rynku i inšych formaŭ «finansavaj paniki». Pra heta piša RBK sa spasyłkaj na analitykaŭ The New York Times.
Adnak abmiežavańni pryviaduć i da nastupstvaŭ dla inšych dziaržaŭ, upeŭnienyja ekśpierty. Jany dapuskajuć, što «chutki i surovy» adkaz, jaki paabiacali amierykanskija ŭłady, moža stać uzrušeńniem dla ekanomik raźvitych krain, asabliva jeŭrapiejskich, i pastavić pad pahrozu stabilnaść suśvietnaj finansavaj sistemy.
Sankcyi, jakija abmiažujuć mahčymaści ekspartu rasijskich nafty i hazu, stanuć mahutnaj zbrojaj suprać rasijskaj ekanomiki i, mahčyma, najbolš efiektyŭnym ekanamičnym «strymlivajučym faktaram» suprać uvarvańnia va Ukrainu, ale jany taksama «pryčyniać bol» Jeŭropie i Złučanym Štatam, miarkujuć ekśpierty. Niekatoryja analityki ŭ hutarcy z NYT dapuścili, što Rasija moža adkazać na sankcyi spynieńniem pastavak pryrodnaha hazu ŭ Jeŭropu ci kibieratakami na amierykanskuju i jeŭrapiejskuju infrastrukturu.
U tym, što Rasija prymie miery ŭ adkaz, u tym liku z dapamohaj chakierskich napadaŭ suprać amierykanskich finansavych ustanoŭ, upeŭnieny były supracoŭnik Dziarždepartamienta ZŠA, analityk Rand Corporation Semiueł Čarap. «My napadajem na ich bujnyja banki, jany, chutčej za ŭsio, napaduć na našyja», — zajaviŭ jon.
Pa słovach Maryi Śniehavaj, supracoŭnicy Univiersiteta Džordža Vašynhtana, žorstkija miery suprać Rasii pryviaduć da źmieny cen na naftu i haz, što ŭ svaju čarhu adabjecca na inflacyi. «Inflacyja ŭ ZŠA strymlivaje dziejańni administracyi», — zajaviła jana, dadaŭšy, što jaje pakazčyki za apošnija hady dasiahnuli «biesprecedentnaha» ŭzroŭniu.
Havoračy ab nastupstvach dla samoj Rasii, były śpiecyjalist pa sankcyjach u Dziarždepartamiencie Edvard Fišman zajaviŭ, što abmiežavańni suprać bujnych rasijskich bankaŭ adabjucca na ŭsioj ekanomicy krainy i paŭpłyvajuć na žyćcio rasijan. Apytanyja NYT ekśpierty papiaredžvajuć, što miery pryviaduć da roznych nastupstvaŭ: ad rostu koštaŭ na pradukty charčavańnia i adzieńnie da niehatyŭnaha ŭpłyvu na piensijnyja vypłaty i źbieražeńni z-za abvału rubla abo rasijskich rynkaŭ.
Maksim Znak naviedaŭ śpiektakl «Zekamieron», pastaŭleny pa jahonaj knizie, napisanaj u SIZA4
Kamientary