Łukašenka: «Za što musiać hinuć maje chłopcy?»
Zdaryłasia čakanaje: padčas turne pa fiermach i paletkach Łukašenka nie vytrymaŭ i pierajšoŭ da palityčnych zajaŭ. Piša ŭ svaim błohu na NN Alaksandr Kłaskoŭski.
Zdaryłasia čakanaje: padčas turne pa fiermach i paletkach Łukašenka nie vytrymaŭ i pierajšoŭ da palityčnych zajaŭ.
U pryvatnaści, jon biez ekivokaŭ paćvierdziŭ razvahi ekśpiertaŭ pra palityčny torh z Maskvoj, u pryvatnaści što tyčycca padpisańnia damovy pra KSAR ADKB. «…My abaviazkova padpišam, kali heta budzie vyhadna», — skazaŭ Łukašenka, naviedvajučy 11 žniŭnia Niaśvižski rajon.
Zaŭvažcie: dakumienty ab farmavańni KSAR — heta nie kot u miachu. Minsk daŭno vyvučyŭ kožnuju kosku. Tak što pasaž «kali heta budzie vyhadna» tyčycca nie źmiestu pahadnieńnia, a mienavita mahčymych piernikaŭ.
I jašče adna krasamoŭnaja fraza — pierakaz niefarmalnych hutarak ź inšymi prezidentami na Isyk-Kuli: «Skažycie, što ja mušu abaraniać u vas i za što musiać hinuć maje chłopcy? Za toje, što Biełaruś u Rasii na rynak nie puskajuć? Ci za toje, što enierharesursy z Kazachstana, Rasii pa šalonych cenach pavinien kupić?».
Zrazumieła, heta rytaryčnaja fihura. Chacieŭ padkreślić, što va ŭmovach ekanamičnaj dyskryminacyi, presinhu, na fonie handlovych vojnaŭ kłaścisia kaśćmi za čužyja intaresy Biełaruś nie razhonicca.
Ale atrymałasia dvuchsensoŭna. Nu a kali raptam dobra prapłaciać — dyk što, chaj sabie chłopcy hinuć?
Chacia na praktycy biełaruskaje načalstva raźličvaje atrymać niejkija bonusy za zhavorlivaść, a kidać bajcoŭ da čorta na rohi, kaniečnie ž, nie zacikaŭlenaje. Łukašenka padkreśliŭ: ničoha strašnaha u tych KSAR niama, biez majoj, maŭlaŭ, zhody našy vajskoŭcy nikudy nie pajeduć.
Dumajecca, što nasamreč zaściaroha inšaja: kab pad markaj tych KSAR u niejkuju krytyčnuju chvilinu nie vysadzili desant u nas. Tamu pytańnie Minsk moža ciahnuć davoli doŭha. Pa madeli pryznańnia/niepryznańnia Abchazii z Paŭdniovaj Asiecijaj.
Uvohule ž zaraz zručny čas nabivać canu. Uvosień — sumiesnyja z rasijcami vialikija manieŭry «Zachad-2009» na biełaruskaj terytoryi. Maskva peŭna ž zacikaŭlena chacia b takim čynam prademanstravać rytualnaje «braterstva pa zbroi». Dyk niachaj raskašelvajecca. A to ŭ nas usia salara moža na žnivo pajści...
«Łukašenka ŭ vajskovym płanie nie budzie rvać z Rasijaj, — pierakanany minski ekśpiert Alaksandr Alesin. — Prosta adpaviednyja damoŭlenaści ź Minskam zaraz buduć kaštavać Maskvie daražej».
Ciapier čytajuć
Łatuška: U Piatkievič treślisia ruki, hałava, jana tupała, kryčała: «Vy nasadžajecie nacyjanalizm»48
Kamientary