Biełaruskamu pravaabaroncu Ramanu Kiślaku druhi raz admovili ŭ prytułku ŭ Hruzii
Pa danych pravaabaroncaŭ, u Hruzii zaraz da sotni biełarusaŭ prosiać prytułku.
Departamient mihracyi MUS Hruzii druhi raz skazaŭ «nie» na prośbu Ramana Kiślaka ab palityčnym prytułku. Pra heta sam Raman Kiślak raskazaŭ Radyjo Svaboda 27 sakavika.
Pavodle jaho, rašeńnie pryniali jašče ŭ śniežni minułaha hoda, ale pra jaho stała viadoma tolki ciapier.
«Heta byŭ paŭtorny zvarot pa prytułak z pryčyny novych abstavin. Z 1 kastryčnika minułaha hoda pačałasia novaja pracedura. Kab zarehistravać čałavieka jak «prośbita prytułku», jaho zajava pavinna być pryznana prymalnaj. Nu i mnie na hetaj pieršaj stadyi admovili. Mielisia razhladzieć za 10 dzion, a jany raściahnuli na 4 miesiacy. Vidavočna, prosta zabyli pra mianie. A kali ja nahadaŭ — zadnim čysłom aformili admovu», — kaža Kiślak.
Raman źjechaŭ ź Biełarusi ŭ lipieni 2021 hoda, bajaŭsia represij, trapiŭ u Hruziju i z taho času prosić palityčny prytułak.
U 2023 hodzie Departamient mihracyi ŭžo admoviŭ jamu, ale haradski sud Tbilisi hetaje rašeńnie admianiŭ. Potym Apielacyjny sud letaś admianiŭ rašeńnie haradskoha suda, i admovu Departamienta mihracyi pryjšłosia prymać: Kiślak musiŭ byŭ źjechać za 30 dzion, kali nie znojdzie padstaŭ zastavacca.
Tady jon padaŭ skarhu ŭ Kamitet pravoŭ čałavieka AAN, jaje zarehistravali, i jon moh zastavacca ŭ Hruzii.
Ciapier Raman źbirajecca asprečyć admovu ŭ haradskim sudzie Tbilisi, dzie ŭžo raniej pieramahaŭ. Jon praciahvaje pravaabarončuju pracu ŭ Hruzii — dapamahaje biełarusam jurydyčnymi paradami.
Pa danych pravaabaroncaŭ, u Hruzii zaraz da sotni biełarusaŭ prosiać prytułku.
U 2025 hodzie hruzinskija ŭłady admovili ŭ prytułku 22 biełarusam. U centr časovaha raźmiaščeńnia pry Departamiencie mihracyi letaś nakiravali piać biełarusaŭ, šeść čałaviek vysłali z krainy, paviedamlała krynica «Pozirka» sa spasyłkaj na Nacyjanalnuju palicyju Hruzii.
Kamientary
Mało povodov i pričin?