«Ot etoj kukły liš niesčasťja». Jak internet-troli pracujuć nad raskołam ruchu za vyzvaleńnie Biełarusi
Łukašenkaŭskija i rasijskija śpiecsłužby imknucca raźjadnać biełaruskija demakratyčnyja siły i hramadzianskuju supolnaść, vykarystoŭvajučy jak botaŭ, tak i svaich ahientaŭ u apazicyjnych asiarodkach, a taksama manipulujučy ludźmi. Hałoŭnym abjektam atak zastajecca Śviatłana Cichanoŭskaja. Źniščy postać adzinaha lidara — i apazicyja vierniecca ŭ atamizavany stan, u jakim jana była da 2020 hoda. «Naša Niva» prasačyła, jak mietadyčki trolaŭ źmianiajucca razam z temnikami resursaŭ typu «Žoŭtych źlivaŭ».
Cichanoŭskaja — heta publičnaja piersona, i krytykavać jaje — absalutna narmalna, jak i lubych inšych palitykaŭ i hramadskich dziejačaŭ.
Za čas niapeŭnaści i represij paśla apošnich vybaraŭ mnohija adčuvajuć stomlenaść, kryŭdu, niezadavolenaść pracaj demsiłaŭ.
Varta adroźnivać łukašenkaŭskich trolaŭ ad krytykaŭ Cichanoŭskaj z nacyjanalna-kansiervatyŭnaha siektara ci z hrupovak jaje palityčnych kankurentaŭ, u jakich svajo bačańnie situacyi i pierśpiektyŭ.
Ale my zaŭvažyli, što ŭ sacyjalnych sietkach i na forumach jość ludzi — dakładniej, niki — jakija nabiahajuć u abmierkavańni vyklučna ŭ tredy i artykuły peŭnaj tematyki. I adsačyli vyraznyja supadzieńni rytoryki i navat leksiki trolaŭ. Vyrazy, jakija vykarystoŭvajuć troli, pačatkova ci paralelna źjaŭlajucca na łukašysckich kanałach typu «Žoŭtych źlivaŭ».
Vyhladaje, što ahientura śpiecsłužbaŭ mimikruje pad nacyjanalistaŭ. U toj ža čas padryŭnyja naratyvy spracoŭvajuć na častku aŭdytoryi, na jakuju skiravanyja, i jana ich padchoplivaje. U vyniku jany źlivajucca ŭ adnu manipulatyŭnuju płyń. Łukašysty i Maskva spadziajucca takim čynam z časam pavialičvać raskoł u apazicyjnych kołach.
Voś niekatoryja pryjomy i naratyvy, jakimi karystajucca ŭ dyskredytacyi biełaruskich demakratyčnych siłaŭ łukašenkaŭskija śpiecsłužby — a za imi i ludzi, što znachodziacca pad upłyvam łukašenkaŭskaj prapahandy. Takija pryjomy vykarystoŭvajucca nie tolki suprać Cichanoŭskaj (jany mohuć sustrakacca ŭ adnosinach pratestu i prychilnikaŭ pieramien ahułam), ale na jaje prykładzie jany najbolš zaŭvažnyja.
«Kahebešnaja škura. Łubianskaja ahientka»
Miakka kažučy, dziŭna padazravać u pracy na łukašenkaŭskija śpiecsłužby čałavieka, muža jakoha asudzili na 18 hadoŭ źniavoleńnia.
Jak i padazravać u pracy na Rasiju palityka, jakomu całkam daviarajuć krainy Zachadu i čyj ofis bazujecca ŭ Vilni. Tym nie mienš, hetyja teoryi aktyŭna prasoŭvajucca.
«Katletnica»
Zdavałasia b, užo prajšło bolš za dva hady z taho momantu, jak Cichanoŭskaja pryjšła ŭ publičnuju palityku. I heta byli vielmi kancentravanyja dva hady. Ale troli dahetul imknucca pradstavić jaje jak niedalokaha čałavieka, chatniuju haspadyniu i kucharku. Taki kantrast z «mocnym haspadarnikam», śpiecyjalistam pa sielskaj haspadarcy i lačeńni kavidu.
Pry hetym troli vykarystoŭvajuć takija słovy, jak «katletnica» i «nievierojatnyje», u źniavažlivym kantekście.
Kamientary ŭ padobnym duchu sustrakajucca i ad kansiervatyŭna-nacyjanalistyčnaj publiki, siarod jakich šmat krytykaŭ Cichanoŭskaj:
Paraŭnajcie heta z dyskursam «Žoŭtych źlivaŭ»:
«Cichanoŭskaja — heta minułaje biełaruskaj palityki»
Niečakana, ale tyja samyja boty, jakija kažuć, što Cichanoŭskaja heta niedaśviedčany palityk — litaralna tyja ž niki, — kažuć, što Cichanoŭskaja heta minułaje biełaruskaj palityki, staraja adyhranaja karta.
Ad jaje patrabujuć syści ŭbok, admovicca ad palityčnaj dziejnaści, byccam jana kamuści inšamu pieraškadžaje zajmacca palitykaj. Byccam by varta joj syści, i tut ža prajavicca i raskvitnieje palityčny talent inšych lidaraŭ.
Cichanoŭskuju abvinavačvajuć u najaŭnaści niejkaj manapolii na palityčnuju dziejnaść u demakratyčnym łahiery, chacia jana nie lidar «pravadyrskaha typu», a chutčej «simvaličny lidar».
«Aŭtapark, jak u Łuki»
Cisnuć na zajzdraść — kłasičny pryjom.
Abvinavačvańnie, što Cichanoŭskaja zajmajecca palityčnaj dziejnaściu tolki dziela taho, kab «zarabić hrošy», adno z hałoŭnych u repiertuary trolaŭ.
«Ona žie Śvietka, Pilipčuk»
Jašče adna reč, jakaja abjadnoŭvaje režymnych trolaŭ ź niekatorymi ludźmi z nacyjanalna-kansiervatyŭnaha siektara — vykarystańnie dziavočaha proźvišča Cichanoŭskaj (Pilipčuk), a taksama imieni — u niehatyŭnym kantekście.
Paraŭnaŭcie z tym, što pišuć łukašysckija kanały:
Tut jany pišuć «Śvietka» ź miakkim znakam — hetyja ludzi z rasijskim myśleńniem ličać, što biełarusy ŭsprymajuć kłasičny pravapis niehatyŭna, jak i jany sami.
«Mudłaja»
Asobnaja linija — vyśmiejvańnie maniery maŭleńnia Cichanoŭskaj.
Vykarystoŭvajucca i antysiemickija vykazvańni, pravodziacca kanśpirałahičnyja paraleli pamiž defiektami maŭleńnia i nacyjanalnym pachodžańniem.
Pierakidańnie adkaznaści na Cichanoŭskuju ci samich pratestoŭcaŭ za represii i hvałt
Adno z hałoŭnych pasłańniaŭ łukašystaŭ hramadstvu: nie treba było pratestavać, nie treba było patrabavać svabodnych vybaraŭ, nie treba było vykryvać niekampietentnaść łukašysckaj viarchuški — nie było b represij.
Troli paśladoŭna davodziać, što mienavita Cichanoŭskaja (a nie łukašenkaŭcy) adkaznaja za represii i hvałt suprać biełarusaŭ.
Taksama na jaje imknucca skinuć adkaznaść za dziejańni Łukašenki, jakija pryviali da taho, što Biełaruś pierastała ŭsprymacca śvietam jak niezaležnaja dziaržava, a rasijski ŭpłyŭ u krainie vyras.
«Baki adjeła»
Akramia vyśmiejvańnia dykcyi i sprobaŭ syhrać na zajzdraści, časta boty pierachodziać na vyśmiejvańnie źniešnaści palityka.
Paraŭnajcie z ustanoŭkami «Žoŭtych źlivaŭ»:
Ciapier čytajuć
Što viadoma pra zatrymanych radyjoamataraŭ, jakim pahražaje až da rasstrełu11
Kamientary
apałahiety carkvy Śviatoj Śviety (sKaročana – SS), za ŭklučeńnie mianie ŭ zał vašaj bajavoj
słavy. ja očyń palščyna