Chierson sustreŭ ukrainskija vojski kvietkami i ściahami. U Rasii pryhniečanaść i sumnievy
Ukrainski śpiecnaz zajšoŭ u Chierson na chvaście ŭ rasijskaj armii, što siońnia ŭnačy na ŭsich mahčymych płaŭsrodkach pakidała pravy bierah Dniapra, padryvajučy za saboju masty. Miascovyja žychary sustrakajuć ZSU z kvietkami, pieśniami i ściahami.
Ukrainskija vojski ŭ Chiersonie miascovyja sustrakajuć z žoŭta-sinimi ściahami i pavietranymi šarykami.
Chierson byŭ adzinym abłasnym centram, jaki kantralavała Rasija paśla 24 lutaha. Rasijanie navat «dałučyli» jaho da Rasii, pravioŭšy psieŭdarefierendum.
Horad byŭ zachopleny ŭ pačatku vajny. Sotni ludziej vychodzili na praŭkrainskija mitynhi ŭ pieršyja tydni vajny. Ludzi kidalisia na rasijskija tanki biez zbroi. Z časam pad akupacyjnym režymam takija mitynhi stali niemahčymymi.
U miascovym parku rasijanie demanstratyŭna rasstralali miascovuju terytaryjalnuju abaronu, jakaja sprabavała supraciŭlacca. Taksama mnohija ludzi byli aryštavanyja za praŭkrainskuju pazicyju.
11 listapada nad budynkam Chiersonskaj administracyi źjaviŭsia ŭkrainski ściah. Paźniej žoŭta-sini ściah visieŭ nad budynkam palicyi, a paźniej źjavilisia kadry pieramiaščeńnia voinaŭ USU pa Chiersonie.
Ukraincy zajšli ŭ horad na fonie paviedamleńniaŭ Minabarony Rasii pra toje, što ŭsie akupacyjnyja vojski vyjšli z Chiersona i pierapravilisia na levy bierah Dniapra.
9 listapada kamandujučy rasijskimi akupacyjnymi vojskami Suravikin zajaviŭ, što rasijskich vajskoŭcaŭ pierakinuć z Chiersona na levy bierah Dniapra.
Ranicaj 11 listapada rasijskija ŚMI apublikavali fota i videa zrujnavanaha Antonaŭskaha mosta kala Chiersona. Jaho padarvali sami rasijanie, kali vychodzili z horada na levy bierah.
U rasijskich uładaŭ i prapahandystaŭ nastroi biazradasnyja.
Rasijskija kanały viečaram 9 listapada całkam pakazali 10-chvilinnaje aficyjnaje videa Minabarony Rasii, na jakim Suravikin raskazaŭ Šajhu pra nieabchodnaść «pierahrupavać siły».
Paśla hetaha abstanoŭku na chiersonskim kirunku na rasijskich telekanałach na praciahu 1,5 dnia nie apisvali.
Asnoŭnyja kanały Rasii ŭvohule 11 listapada nie zhadali pra adstupleńnie z Chiersonskaj vobłaści. Pakazali tolki repartažy pra toje, jak rasijskija rehijony praciahvajuć «prymać biežancaŭ».
A voś što pisali rasijskija prapahandysty:
- «Možna pieratvaryć horad u vialiki ŭmacavany rajon, pry hetym majučy składanaści z łahistykaj. Navat abaraniać jaho možna. Tolki heta surjoznyja straty siarod mirnaha nasielnictva i asabistaha składu, u tym liku mabilizavanych. Vybirali, jak vidać, z dvuch drennych varyjantaŭ. Vybrali toj, dzie mienš kryvi (Andrej Miadźviedzieŭ, kanał «Rasija»).
- Rasijskich hramadzian evakuiravali, dziaržaparat vyvieli — vielmi składanaja łahistyčnaja zadača vyrašana kamandujučym štabam «Śpiecyjalnaj vajennaj apieracyi» na dobrym uzroŭni. Pieramohu stvarajuć nie tolki papularnymi i prostymi rašeńniami, ale i nastupajučy na horła hordaści. Zdarovy sens pavinien być va ŭsich rašeńniach, navat niepryjemnych (WarGonzo).
- Rašeńnie pa Chiersonie pryniata. «Jak» i «čamu» heta adbyłosia, varta raźbiracca, ale heta pavinny rabić kampietentnyja ludzi. Raju isteryčkam spynić nahniatać. Asabliva tym, chto siadzić daloka i akop bačyŭ maksimum pa televizary <…> Nie addać na zaboj chłopcaŭ, jakija siadzieli ŭ Chiersonie, liču pravilnym rašeńniem («Vajenkar» Andrej Rudenka).
Ukrainskija vajskoŭcy praciahvajuć vyzvalać nasielenyja punkty na Chiersonščynie. U niekatorych miescach jany ŭžo dajšli da pravaha bieraha Dniapra.
Rasijanie budujuć abarončyja rubiažy na levym bierazie Dniapra i na poŭnačy akupavanaha Kryma. Adnačasova z hetym rasijanie viaduć nastupalnyja dziejańni na Bachmuckim, Aŭdziejeŭskim i Navapaŭłaŭskim kirunkach.
Ciapier čytajuć
Palitołah Alina Charysava pahadziłasia supracoŭničać z SBU. Akazałasia, heta było KDB48
Kamientary