«Kamu naležyć Krym?» Stała viadoma, na jakija pytańni treba adkazać biełarusam i rasijanam dla atrymańnia DNŽ u Litvie
U rasparadžeńni redakcyi «Lusterka» akazaŭsia apytalnik, jaki nieabchodna zapaŭniać rasijanam i biełarusam dla atrymańnia nacyjanalnaj vizy Litvy i dazvołaŭ na žycharstva hetaj krainy.
U ankiecie prosiać adkazać na pytańni pra adukacyju, papiarednija miescy pracy, słužbu ŭ vojsku, dziełavych suviaziach, kantaktach ź dziaržustanovami krain NATA i ES. Taksama jość pytańnie pra dostup da sakretnaj infarmacyi i suviazi sa słužbami raźviedki i biaśpieki krainy pachodžańnia abo inšaj dziaržavy (akramia Litvy).
Dva zaklučnyja pytańni ankiety datyčać rasijskaj ahresii va Ukrainie. U punkcie 10 zajaŭnikam nieabchodna adkazać na pytańnie «Ci padtrymlivajecie vy vajennyja dziejańni, jakija pravodziacca Rasijskaj Fiederacyjaj na terytoryi Ukrainy?», a ŭ punkcie 11 — «Na vašuju dumku, kamu naležyć Krym?»
Nahadajem, dla hramadzian Rasii i Biełarusi, jakija chočuć atrymać dazvoł na žycharstva ŭ Litvie ci navat nacyjanalnuju vizu, uviali novy vid pravierki. Ciapier im treba zapaŭniać śpiecyjalnuju ankietu z pytańniami pra svajo minułaje i raskazać pra svajo staŭleńnie da rasijskaj ahresii va Ukrainie.
Infarmacyja, jakuju zamiežnik padaść u ankiecie, budzie mieć vyrašalnaje značeńnie dla vydačy jamu dazvołu na pražyvańnie, zajavili ŭ Departamiencie mihracyi Litvy. Kali jon admovicca ad zapaŭnieńnia ankiety abo zapoŭnić jaje nie całkam, śpiecyjalisty Departamienta mihracyi majuć prava admović prymać jaho zajavu naohuł. Kali ž źviestki akažucca niedakładnymi abo vyśvietlicca, što čałaviek niešta schavaŭ, jamu budzie admoŭlena ŭ vydačy dakumientaŭ, a kali ŭ jaho jość dziejny DNŽ abo nacyjanalnaja viza, ich mohuć nieadkładna anulavać.
Takoje ankietavańnie, na dumku litoŭskich uładaŭ, stanie dadatkovym filtram biaśpieki i dazvolić vyjaŭlać zamiežnikaŭ, jakija ŭ siłu svajoj minułaj dziejnaści abo suviaziaŭ ź niedemakratyčnymi režymami mohuć stać pahrozaj nacyjanalnaj biaśpiecy Litvy.
Kamientary