U Barsiełonie pa abvinavačvańni ŭ seksualnym hvałcie aryštavali brazilskaha futbalista Dani Ałviesa. Eks-abaronca «Barsiełony», samy tytułavany futbalist śvietu adchilaje abvinavačvańni, piša Bi-bi-si.
U piatnicu sud Barsiełony zaklučyŭ Ałviesa pad vartu da kanca śledstva biez mahčymaści ŭnieści zakład. Sudździa paličyŭ, što brazilec moža schavacca.
Mieksikanski kłub, u jakim ciapier hraje były hulec «Juvientusa» i «PSŽ», užo abviaściŭ ab skasavańni kantraktu.
Što adbyłosia
39-hadovaha futbalista zatrymali ŭ piatnicu. U palicyju jašče 2 studzienia źviarnułasia žančyna i abvinavaciła Ałviesa ŭ seksualnym hvałcie. Abvinavačvańnie ŭ seksualnym hvałcie ŭ Ispanii davoli šyroka traktujecca — ad niepažadanych zalacańniaŭ da zhvałtavańnia.
U palicyi padrabiaznaściaŭ nie pryviali, ale krynica, blizkaja da rasśledavańnia, paviedamiła ahienctvu Frans Pres, što Ałviesa abvinavačvajuć mienavita ŭ zhvałtavańni.
Jak dadaje krynica, žančyna, imia jakoj ŚMI nie nazyvajuć, paŭtaryła svajo abvinavačvańnie pierad sudom u piatnicu.
Pavodle infarmacyi ispanskich ŚMI, mierkavany incydent adbyŭsia ŭ adnym z barsiełonskich načnych kłubaŭ u noč na 31 śniežnia. Hazieta ABC piša, što Ałvies nibyta padčas tanca zasunuŭ ruku pad nižniuju bializnu žančyny bieź jaje zhody, a zatym prajšoŭ za joj u tualet.
Ałvies paćviardžaje, što byŭ u kłubie, ale abvinavačvańni ŭ nieprystojnych pavodzinach admaŭlaje.
«Ja tancavaŭ i prosta dobra baviŭ čas, nikomu nie pieraškadžaŭ. Ja nie viedaju, chto hetaja žančyna. Jak ja moh takoje zrabić žančynie?»
U akružeńni futbalista ŭ abvinavačvańni taksama nie vierać. Jaho žonka, ispanskaja madel Žaana Sanz skazała, što ŭ toj viečar Ałvies pajšoŭ na viečarynu ź siabrami, kab raźviejacca. «Jon pajšoŭ patancavać, pasłuchać muzyku. Jon heta lubić. Voś i ŭsio. Ničoha nie było. Ja viedaju, što jon vielmi vietlivy i pavažlivy».
Mieksikanski kłub, ź jakim u Ałviesa byŭ kantrakt da 30 červienia 2023 hoda, nieadkładna razarvaŭ adnosiny z futbalistam.
«Kłub paćviardžaje svaju nieciarpimaść da dziejańniaŭ, jakija supiarečać duchu i kaštoŭnaściam kłuba. My nie možam dapuścić, kab pavodziny adnaho čałavieka nanieśli škodu našym pryncypam», — skazaŭ dyrektar futbolnaha kłuba Leapolda Siłva.
U Barsiełonie Ałvies pravodziŭ adpačynak paśla čempijanatu śvietu pa futbole ŭ Katary.
Ałvies zavajavaŭ za karjeru 46 tytułaŭ i ličycca samym tytułavanym futbalistam śvietu.
Ź ispanskim kłubam «Barsiełona» brazilski abaronca pravioŭ vosiem siezonaŭ, vyjhraŭšy z 2008 pa 2016 hady šeść razoŭ Ła Lihu, trojčy Lihu čempijonaŭ i čatyry razy atrymaŭšy Kubak Ispanii.
Paśla «Barsy» Ałvies vyjhraŭ z turynskim «Juvientusam» «čempijonstva Italii i Kubak krainy, paśla čaho ŭ składzie «Pary Sien-Žermiena» za try hady ŭ kłubie staŭ čempijonam Francyi, a taksama vyjhraŭ Kubak Lihi i Supierkubak.
U 2019 hodzie Ałvies byŭ pryznany najlepšym hulcom Kubka Amieryki ŭ składzie brazilskaha «San-Paŭłu», a ŭ 2020 hodzie sa zbornaj Brazilii staŭ pieramožcam Alimpijskich hulniaŭ 2020 hoda ŭ Tokia.
U studzieni 2022 hoda Ałvies nienadoŭha viarnuŭsia ŭ «Barsiełonu» jak svabodny ahient.
U 2022 hodzie ŭ Katary Ałvies staŭ samym uzrostavym futbalistam u historyi čempijanataŭ śvietu. Abaronca zbornaj Brazilii vyjšaŭ na pole va ŭzroście 39 hadoŭ, 6 miesiacaŭ i 27 dzion.
U składzie zbornaj Brazilii Ałvies z 2006 hoda zhulaŭ 126 matčaŭ i zabiŭ 8 hałoŭ.
Ciapier čytajuć
Minski školnik praspaŭ prypynak. Ale kiroŭca aŭtobusa davioz jaho dadomu!3
Minski školnik praspaŭ prypynak. Ale kiroŭca aŭtobusa davioz jaho dadomu!
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku2424
Kamientary