Praz vajnu va Ukrainie Šviejcaryja moža źmianić farmat svajho niejtralitetu
Parłamient Šviejcaryi ŭ čaćvier abmiarkuje zakonaprajekt, jaki dazvalaje pastaŭlać bojeprypasy šviejcarskaj vytvorčaści va Ukrainu i nakiravać tanki krainam, čyj vajenny patencyjał źniziŭsia za košt pieradačy tankaŭ Ukrainie. Padobnyja razmovy byli niemahčymyja ŭ Šviejcaryi jašče hod tamu, da rasijskaha ŭvarvańnia va Ukrainu, piša «Ahientstvo. Novosti» sa spasyłkaj na Bloomberg.
Prajekt, raspracavany Svabodnaj demakratyčnaj partyjaj (FDP), praduhledžvaje vydaču Hiermanii, Ispanii i Danii dazvołu na pastaŭku Ukrainie šviejcarskich bojeprypasaŭ i prodaž Polščy, Słavakii i Čechii tankaŭ Leopard naŭzamien techniki, jakuju krainy płanujuć adpravić Ukrainie.
Havorka idzie pra 96 tankaŭ Leopard-2, vykarystańnie jakich było spynienaje amal dziesiać hadoŭ tamu dla dalejšaha vyvadu z ekspłuatacyi. Ich prodaž zapatrabuje rašeńnia parłamienta ab praviadzieńni pracedury vyvadu z ekspłuatacyi. Zapyty ab kupli ad jeŭrapiejskich krain pakul nie prychodzili, paviedamiła pres-słužba Minabarony Šviejcaryi na zapyt Bloomberg.
Vajna va Ukrainie źmianiła abmierkavańnie farmatu šviejcarskaha niejtralitetu, paviedamiła ahienctvu deputatka ad FDP Maja Rynikier.
«My nie možam admovicca ad niejtralitetu, ale nam treba abmierkavać, jakija ŭ nas jość mahčymaści dla padtrymki krain, jakija adstojvajuć tyja ž demakratyčnyja kaštoŭnaści, što i Šviejcaryja», — skazała Rynikier.
Jaje prapanova pieradać tanki za simvaličny adzin frank za kožny było adchilenaje ŭ pieršym čytańni na minułym tydni, ale deputat choča vynieści jaho na paŭtorny razhlad viasnoj.
Razam z tym deputat najbujniejšaj pradstaŭlenaj u parłamiencie šviejcarskaj narodnaj partyi Tomas Eski zajaviŭ ahienctvu, što jaho partyja nie płanuje hałasavać za zakonaprajekty ab pašyreńni vajennaj padtrymki.
Adnak 55% žycharoŭ krainy padtrymlivaje reekspart bojeprypasaŭ šviejcarskaj vytvorčaści, kab dapamahčy Ukrainie, heta vynikaje ź niadaŭniaha apytańnia, vyniki jakoha jość u rasparadžeńni Bloomberg.
Šviejcaryja admoviłasia pastaŭlać zbroju Ukrainie ŭ adpaviednaści z palitykaj niejtralitetu. U listapadzie prezident Šviejcaryi Ińjacya Kasis zajaviŭ, što kraina «nie budzie prama ci ŭskosna ŭdzielničać u vajennym kanflikcie». «Ni padčas Pieršaj suśvietnaj vajny, ni navat padčas Druhoj my nie ekspartavali ŭzbrajeńnie», — padkreśliŭ jon.
Vajna va Ukrainie ŭžo prymusiła admovicca ad niejtralnaha statusu Finlandyju i Šviecyju, jakija viasnoj minułaha hoda padali zajaŭku na ŭstupleńnie ŭ NATA.
Ciapier čytajuć
Byłoha supracoŭnika kontrraźviedki KDB aryštavali za zdradu dziaržavie9
Kamientary