Jak zakryćcio «Babroŭnikaŭ» i inšyja abmiežavańni paŭpłyvali na dastaŭku tavaraŭ
Za minuły miesiac mocna ŭskładniłasia situacyja z hruzapieravozkami pamiž Biełaruśsiu i ES. Polšča zakryła punkt propusku «Babroŭniki», Biełaruś u adkaz zabaraniła hruzavikam, zarehistravanym u Polščy, zajazdžać u Biełaruś praz Łatviju i Litvu. «Naša Niva» raźbirałasia, jak usie hetyja źmieny paŭpłyvali na pieravozku hruzaŭ.
Kałapsu nie adbyłosia
Niahledziačy na toje, što paśla zakryćcia «Babroŭnikaŭ» na biełaruska-polskaj miažy zastaŭsia tolki adzin punkt propusku dla vielikahruzaŭ, kałapsu nie adbyłosia. Śpiecyjalisty sa śfiery łahistyki tłumačać heta tym, što paśla pieradnavahodniaha pika ŭ śniežni abjom tavarapatoku pamiž Biełaruśsiu i krainami ES tak i nie adnaviŭsia, choć pieravozčyki čakali, što pačynajučy ź siaredziny lutaha adbudziecca ažyŭleńnie na rynku.
«Tradycyjna bližej da pačatku viasny tavarapatok vychodzić na zvyčajny ŭzrovień, a razam ź im pačynajuć raści staŭki, jakija padajuć na miesiac-paŭtara adrazu paśla Novaha hoda. Ciapier my hetaha nie nazirajem, tamu, navat niahledziačy na zakryćcio jašče adnaho punta propusku i źjaŭleńnie inšych abmiežavańniaŭ, vielizarnych čerhaŭ niama, a staŭki na pieravozku nie rastuć», — tłumačyć surazmoŭca.
Zahruzak mienš, čym čakałasia
Śpiecyjalist adznačaje, što tolki ŭ «Kazłovičach» u napramku Biełarusi na 1—2 sutak pavialičyŭsia čas prajezdu praź miažu. Na zvarotnym kirunku, pa jaho słovach, čas prachodžańnia miažy pavialičyŭsia litaralna na niekalki hadzin. Na litoŭskim i łatvijskim kirunkach čerhi kali i źbirajucca, to nievialikija.
«Zahruzak ciapier mienš, čym pa našych nazirańniach musiła być u hety pieryjad hoda. Pakul nijakich pieradumoŭ dla taho, kab ich kolkaść mocna pavialičyłasia, my nie bačym», — kaža śpiecyjalist u śfiery hruzapieravozak.
Łahist adznačaje, što dla samich pieravozčykaŭ pakul taksama asabliva ničoha nie źmianiłasia, prosta kali raniej mašyny prastojvali tydniami ŭ čerhach na miažy, to ciapier jany stajać na bazie ŭ čakańni zahruzak. Kolkaść vykananych rejsaŭ u ich zastałasia plus-minus adnolkavaj.
Z polskich busaŭ pierahružajuć u litoŭskija fury
Biełarus, jaki maje transpartnuju firmu ŭ Polščy i niekalki hruzavych mikraaŭtobusaŭ, kaža, što ŭžo paśpieŭ adčuć na sabie niehatyŭnyja nastupstvy ad zakryćcia «Babroŭnikaŭ» i ŭviadzieńnia abmiežavańniaŭ na ŭjezd na hruzavikach z polskimi numarami. Pa słovach mužčyny, jon i niekatoryja inšyja kalehi zaraz vymušanyja davozić hruz tolki da biełaruska-litoŭskaj miažy.
«Schiema pracuje nastupnym čynam: niekalki busaŭ davoziać hruz da bazy ŭ Litvie, dzie jaho pierahružajuć u adnu litoŭskuju furu, jakaja ŭžo pieravozić hruz niepasredna praź miažu. Lepiej zrabić tak, čym vieźci hruz praz «Kazłovičy».
Aproč taho, što tam davoli vialikija čerhi, palaki nie prapuskajuć ź pierahruzam, tamu busam da 3,5 tony tam rabić niama čaho, bo amal zaŭždy davodzicca pieravozić na paru socień kiłahramaŭ bolš, čym dazvolena ŭ dakumientach. Biełaruskaja i litoŭskaja mytni na niaznačnyja pierahruzy ŭvahi nie źviartajuć, a ŭ palakaŭ z hetym stroha.
Praz heta zarobki krychu pamienšali, ale padniać taryf na pieravozku niemahčyma, bo zamoŭ i biez hetaha apošnim časam niašmat», — kaža surazmoŭca.
U abmiežavańniach jość vyklučeńni
Pa słovach pieravozčyka, u biahučaj situacyi bolš za ŭsio pašancavała tym, chto zajmajecca pieravozkaj aŭto. Abmiežavańni, uviedzienyja biełaruskim bokam, nie tyčacca aŭtavozaŭ i transpartnych srodkaŭ, jakija pieravoziać bujnahabarytnyja hruzy, tamu jany, jak i raniej, mohuć ujazdžać u Biełaruś praź lubyja punkty propusku.
Biznesmien z Hrodna, jaki impartuje tavar ź Biełastoka, skardzicca, što paśla zakryćcia «Bierastavicy» ŭ jaho zaŭvažna vyraśli vydatki na dastaŭku.
«Ciapier adlehłaść ad Biełastoka da Hrodna pavialičyłasia amal da 450 kiłamietraŭ. Heta zaŭvažna pavialičyła transpartnyja vydatki. Kali bus jechaŭ ź pierahruzam, to jechać davodziłasia praź Litvu. Zaraz takoj opcyi niama, bo naš bok nie prapuskaje polskija hruzaviki. Palaki ź pierahruzam nie puskajuć, tamu aproč taho, što davodzicca rabić vialiki kruh cieraz Brest, dyk jašče i rabić try rejsy zamiest dvuch. U vyniku našyja vydatki na dastaŭku pavialičylisia amal udvaja», — padsumoŭvaje biznesmien.
Čytajcie taksama: «Kala 450 tysiač zamiežnikaŭ naviedała Biełaruś pa biaźvizie». Praŭda? Vyhladaje, što ŭ razy mienš
Pamiatajecie Piatrušu, jaki vydziraŭ draty «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja7
Pamiatajecie Piatrušu, jaki vydziraŭ draty «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja
«Paśla pieršaha zabojstva ź im raźviałasia žonka». Što viadoma pra šmatdzietnaha Siarhieja sa Stolinskaha rajona, jaki paśla vyzvaleńnia z kałonii zabiŭ troch čałaviek44
Kamientary