13 krasavika ŭ homielskaj žurnalistki i krajaznaŭcy Łarysy Ščyrakovaj jubilej — joj spaŭniajecca 50 hadoŭ. Sustrakaje jana hetuju kruhłuju datu za kratami SIZA-3. Jaje historyju nahadvaje BAŽ.
Čatyry miesiacy tamu, 6 śniežnia, u pryvatnym domie Ščyrakovaj, dzie jana žyła z šasnaccacihadovym synam, siłaviki praviali pieratrus. Žančynu zabrali ŭ izalatar, a jaje syna Śviatasłava pieradali ŭ sacyjalny prytułak. Svajaki źviazalisia z baćkam padletka, jaki paśla razvodu žyvie asobna ŭ rasijskim Navasibirsku, adkul jon rodam. Praz dva tydni baćka pryjechaŭ u Homiel i zabraŭ Śviatasłava z prytułku pad svaju apieku.
Tym časam Łarysu Ščyrakovu ź IČU pieraviali ŭ SIZA. Suprać jaje raspačali kryminalnuju spravu pavodle art. 369-1 KK — «Dyskredytacyja Respubliki Biełaruś».
Što kankretna staviać u vinu žančynie, nieviadoma, jak i toje, na jakoj stadyi znachodzicca rasśledavańnie kryminalnaj spravy.
Z advakatki ŭziali padpisku ab nierazhałošvańni. Pieradačy ź nieabchodnymi rečami dla Ščyrakovaj ad svajakoŭ prymajuć, a voś spatkańniaŭ pakul nie dajuć.
Na volu Łarysa pisała, što znachodzicca ŭ adnoj kamiery sa zvyčajnymi biedałahami, aryštavanymi za roznyja ekanamičnyja dy bytavyja złačynstvy.
Na špacyry jany, pa sutnaści, nie chodziać. Skardziłasia taksama, što nie maje dobraha snu, bo ŭ kamiery ŭnačy ŭvieś čas haryć śviatło.
U adnym z apošnich listoŭ Łarysa prasiła pieradać joj kremy dla tvaru i cieła. Na pieraviedzienyja ŭ SIZA na asabisty rachunak hrošy Łarysie ŭdałosia zamović patrebnyja knihi pa psichałohii — minułaj vosieńniu jana pastupiła ŭ Homielski dziaržaŭny ŭniviersitet imia Franciška Skaryny na zavočnaje navučańnie, kab nabyć prafiesiju psichołaha.
U svoj čas Łarysa vočna skončyła historyka-fiłałahičny fakultet hetaha ž univiersiteta, vykładała ŭ škole historyju i anhlijskuju movu, a potym zachapiłasia žurnalistykaj, supracoŭničała ź niezaležnymi miedyja.
Jana taksama zapačatkavała ŭłasny prajekt ušanavańnia pamiaci represavanych za savieckim časam «Zabityja i zabytyja». Zapisvała śviedčańni svajakoŭ represavanych, na padstavie jakich stvarała dakumientalnyja filmy.
Za pracu na zamiežnyja ŚMI biez akredytacyi ŭ biełaruskim MZS Ščyrakovu na padstavie pratakołaŭ milicyi sudy karali administracyjnymi štrafami bolš za 40 razoŭ.
U 2021 hodzie Łarysa Ščyrakova publična zajaviła, što sychodzić z žurnalistyki. Zarehistravałasia indyvidualnym pradprymalnikam i stała zajmacca etnafotasiesijami — zdymała za hrošy achvotnych ludziej u nacyjanalnych biełaruskich strojach. Dziela hetaha vykarystoŭvała ŭłasnuju bahatuju kalekcyju narodnych vyšyvanak, namitak, staradaŭnich pobytavych rečaŭ z homielskaha kraju.
Niadaŭna Jeŭrapiejskaja fiederacyja žurnalistaŭ (EFJ) i sajuzy francuzskich žurnalistaŭ SNJ, SNJ-CGT, CFDT-Journalistes zrabili admysłovuju zajavu, u jakoj zaklikajuć da biezadkładnaha vyzvaleńnia Łarysy Ščyrakovaj.
Pavinšavać Łarysu Ščyrakovu možna pa adrasie: SIZO №3, h. Homiel, vuł. Knižnaja 1A, 246003.
Biełaruskija abrady, arnamienty i biełaruskaja mova paŭsiul. Jak naščadak pierasialencaŭ zrabiŭ siało kala Bajkała znoŭ biełaruskim, i čamu heta moža chutka skončycca99
Kamientary