Jak pracuje chłuśnia: ruskija stvaryli fejkavy kanał ukrainskich marpiechaŭ, ciapier jaho biaskonca cytuje prapahanda, u tym liku minskaja
Raskazvajem, jakija fejki praz hety kanał zapuskali i jak adroźnivać fejkavyja kanały ad sapraŭdnych.
Heta telehram-kanał, jaki vydaje siabie za aficyjny resurs 35-j asobnaj bryhady marskoj piachoty imia kontr-admirała Michaiła Vastrahradskaha. Praŭda, ukrainskim krynicam jon zusim nieviadomy. A što jon fejkavy, «Našaj Nivie» paćvierdzili ŭ samoj 35-j bryhadzie:
«Paviedamlajem, što ŭ bryhady niama kanała ŭ Telegram. Vašy čytačy mohuć sačyć za dziejnaściu našaj kamandy ŭ našych Facebook i Instagram».
Zatoje na hety kanał pastajanna spasyłajucca prakramloŭskija prapahandysty i biełaruskaja praŭładnaja prapahanda. Pieryjadyčna pačynajucca sapraŭdnyja chvali cytavańnia. Voś, da prykładu, łukašyscki kanał «Biełorusskij siłovik» vydaje post z hetaha kanała pra toje, što, byccam by, u 35-j bryhadzie «buduć rasstrelvać tych, chto admaŭlajecca iści ŭ boj». U hety samy momant toj samy fejk publikuje anhłamoŭny prapahandyscki tvitar-akaŭnt.
Takaja sinchronnaść moža pakazvać na kaardynacyju pracy maskoŭskaj i minskaj prapahandy.
Nieŭzabavie paśla hetaha «kanał 35-j bryhady» cytujuć i «Žoŭtyja źlivy», jak prykład «ukrainskaj lutaści».
Fejkavy kanał staŭ pastajannaj krynicaj infarmacyi dla prapahandysckich miedyja. Naprykład, tut jany, byccam by, skardziacca kiraŭnictvu na toje, što ich «pasyłajuć na ŭboj». Praŭda, nidzie, akramia prapahandysckich ŚMI jaho niama, a na aficyjnych staronkach bryhady zusim inšyja paviedamleńni, ale heta nie pieraškadžaje rasijskim kanałam z sotniami tysiačaŭ padpisantaŭ cytavać paviedamleńnie. Pieradrukoŭvaje jaho i łukašenkaŭskaja prapahanda.
Abo tut — kanał ź miljonam padpisčykaŭ kamientuje skrynšoty z fejkavaha kanała. Ich padchoplivaje astatniaja Z-sietka.
A 18 krasavika fejkavy kanał 35-j bryhady paviedamiŭ «siensacyju»: «Bachmut usio». Praŭda, nidzie, akramia hetaha kanała, niama źviestak, što paśla paŭhoda bajoŭ rasijskaj armii ŭdałosia zaniać hety ŭkrainski horad z 70-tysiačnym nasielnictvam, dakładniej, toje, što ad jaho zastałosia.
Jak adroźnić fejkavy kanał?
Pradstaŭniki inicyjatyvy Cyberbeaver rajać brać spasyłki na kanały z aficyjnych krynic, naprykład, sa staronak zasnavalnikaŭ. Taksama źviartać uvahu na nazvu kanała — tam mohuć być padmieny litaraŭ i inšyja skažeńni, jakija robiać nazvu vizualna padobnaj da sapraŭdnaj.
Taksama važna źviartać uvahu na cytavańni kanała. Možna prosta «zahuhlić» jaho nazvu i pahladzieć, chto jaho cytuje. Kali ŭ śpisie vyklučna prapahandysckija miedyja, to amal napeŭna kanał fejkavy.
«Naša Niva» — bastyjon biełaruščyny
PADTRYMAĆCiapier čytajuć
Ci jechaŭ Łukašenka ŭ mašynie na svaju inaŭhuracyju? Jość sumnievy1
Ci jechaŭ Łukašenka ŭ mašynie na svaju inaŭhuracyju? Jość sumnievy
«Z maskalom havary, da kamień za pazuchaju dziaržy». My daviedvajemsia ŭsio bolš novaha pra Kastusia Kalinoŭskaha — palityka, jakoha ciapier nie chapaje3131
Kamientary