Były dyrektar «Siličaŭ» žyvie ŭ Krymie i sudzicca z susiedkaj, jakaja kazała, što jon datyčny da śmierci čałavieka

Były dyrektar hornałyžnaha kompleksu «Siličy» Siarhiej Šajko pierajechaŭ u akupavany Rasijaj Krym. Jamu 67 hadoŭ, mužčyna pracuje ŭ škole nastaŭnikam historyi, pierapoščvaje ŭ sacsietkach usiu pucinskuju prapahandu, a taksama maje ŭčastak u sadovym tavarystvie «Śvietač» kala Fieadosii.

Hrupa sadavodaŭ vyłučyła Šajko kandydatam u praŭleńnie tavarystva. Ale napiaredadni vybaraŭ staršynia tavarystva Alena Leŭčanka ŭ ofisie skazała astatnim členam praŭleńnia, što jon, «budučy kiraŭnikom, byŭ asudžany za chałatnyja adnosiny da pracy» i što «tam zabili čałavieka». Taksama jana nazvała jaho «nie vielmi dobrym kiraŭnikom», jaki «navat dapuściŭ śmiarotny vynik»: «byŭ drenny kiraŭnik tam, a pryjechaŭ i vyrašyŭ tut navodzić svaje paradki».

Adzin z sadavodaŭ zapisaŭ razmovu na dyktafon. U sudzie jon rastłumačyŭ, što zaŭsiody tak robić u razmovach ź Leŭčanka, «bo jana časta kaža niapraŭdu».

U sakaviku 2026 hoda Šajko padaŭ u sud isk ab abaronie honaru i hodnaści. Jon raspavioŭ, što kiravaŭ «Siličami» z 2006 pa 2009 hod. Suprać jaho sapraŭdy zaviali kryminalnuju spravu pavodle artykuła 428 KK Biełarusi («Słužbovaja niadbajnaść»), ale jaho apraŭdali praz adsutnaść składu złačynstva.

Havorka idzie pra trahiedyju 15 studzienia 2009 hoda. Tady ŭ «Siličach» śniehachod ratavalnikaŭ, jaki jechaŭ na vyklik, źbiŭ łyžnika Stanisłava Paŭłaviča. Mužčyna pamior u balnicy ŭ Baraŭlanach. Spačatku prakuratura Łahojskaha rajona admoviłasia zavodzić spravu. Tady ŭdava zahinułaha kazała: «Kali b Stas raźbiŭsia nie ŭ Siličach, to była b nadzieja na spraviadlivaść». Paźniej sprava ŭsio ž dajšła da suda, jaki apraŭdaŭ Šajko.

16 červienia 2026 hoda haradski sud Fieadosii admoviŭ Šajko ŭ isku. Sud paličyŭ, što Leŭčanka havaryła ŭ pytalnaj formie, a jaje słovy nie źjaŭlajucca raspaŭsiudžvańniem źviestak.

Apielacyja častkova admianiła hetaje rašeńnie. Viarchoŭny sud Respubliki Krym pryznaŭ, što słovy Leŭčanka pra sudzimaść za chałatnaść nie adpaviadajuć rečaisnaści i hańbiać honar, hodnaść i dziełavuju reputacyju Šajko. Suma kampiensacyi maralnaj škody ŭ apublikavanym tekście schavanaja. Abaviazvać Leŭčanka publikavać abviaržeńnie ŭ čatach tavarystva sud nie staŭ: tady pra hetuju historyju daviedałasia b jašče bolš ludziej, što «paciahnie parušeńnie pravoŭ zajaŭnika».

• 0
• 0
• 0
• 2
• 0
• 0
• 1
• 0