Pamior doktar i televiadučy Alaksandr Ciareščanka

Pra śmierć 20 krasavika viadomaha doktara i televiadučaha raspaviała ŭ sacsietkach jaho dačka Kaciaryna.

«Jon pakinuŭ śled u žyćciach tysiač ludziej. Dapamohaj, paradaj, udziełam. Jon nie hladzieŭ na čyn i ranh, staviŭsia da kožnaha zvarotu sa spahadlivaściu i spačuvańniem», — napisała jana.

Alaksandr Ciareščanka byŭ nie prosta viadučym tele— i radyjopieradač pra zdaroŭje — takich, jak «Budučynia siońnia», «Doktarskija tajamnicy», «Pra što nie pryniata kazać» i šerahu inšych. Jon byŭ praktykujučym niejrachirurham, 25 hadoŭ pracavaŭ u 9-j haradskoj kliničnaj balnicy Minska, piša KP u Biełarusi.

«Tak zdaryłasia, što na maich vačach zahinuli maje rodnyja, — raspaviadaŭ doktar Ciareščanka. — Ja ličyŭ, što daktary, jakija ŭ toj momant zajmalisia vyratavańniem, nie kiravali pracesam. Tady ja zrazumieŭ, što chaču stać doktaram, kab navučycca samomu kiravać pracesam žyćcia i śmierci.

U 1974 hodzie jon skončyŭ miedinstytut u Minsku, paśla čaho źjechaŭ na dva hady pracavać na Daloki Uschod. Zatym viarnuŭsia ŭ Biełaruś na kafiedru ŭ instytut. Paralelna ź miedycynaj zajmaŭsia žurnalistykaj, jakoj zachapiŭsia jašče z 3-ha kursa.

Cikava, što svaje pieršyja apaviadańni doktar Ciareščanka pakazvaŭ Uładzimiru Karatkieviču i atrymaŭ adabreńnie znakamitaha piśmieńnika. Jon zachoŭvaŭ arkuš ź jaho redakcyjnymi paznakami.

Pavialičyć

Cikava, što jaho telepieradačy nikoli nie budavalisia na chajpie i efiektnych šou dziela pryciahnieńnia hledačoŭ. Jak jon kazaŭ sam u intervju, jaho «Tajamnicy» byli nie hłamurnaj prahramaj. U adroźnieńnie ad toj ža Aleny Małyšavaj, paśla pieradač jakoj niekatoryja siužety raźbirajuć na miemy. Jon pierakanana rabiŭ navukova-paznavalnuju prahramu, bo miedycyna dosyć surjoznaja navuka, kab apuskać jaje da ŭzroŭniu prymityvizmu.

U pieradačy «Doktarskija tajamnicy» jon staviŭ zadaču pakazać suviaź niapravilnaha ładu žyćcia z chvarobaj i z tymi nastupstvami, ź jakimi zmahajucca potym sanitarki, miedsiostry, daktary. Jon kateharyčna nie chacieŭ zdymać mulažy abo lalek, jakich apierujuć chirurhi — tolki realnyja kadry apieracyj. Kali kazali, što na ekranie heta budzie vyhladać zanadta žorstka, jon paryravaŭ:

— Žorstka toje, što potym praź ciabie daktary — chirurhi, aniestezijołahi — pakutujuć i pakutujuć. Adna sprava, kali čałaviek kaža, što jamu treba vydalić jazvu straŭnika, a inšaje, kali jon bačyć, što takoje jazva abo toj ža infarkt — miortvaje serca. Paśla hetaha jon napeŭna niekalki razoŭ padumaje, ci choča jon apynucca na apieracyjnym stale.

Ciareščanka maryŭ vychodzić z takoj pieradačaj štodnia, u prajm-tajm. Nie tolki pra chvaroby, ale i pra zdaroŭje.

Taksama doktar nahadvaŭ, što zdaroŭje čałavieka zaležyć ad doktara tolki na 10%. Usio astatniaje — hienietyka, ekałohija, charčavańnie, zdarovy ład žyćcia. Doktar Ciareščanka i sam staraŭsia vieści zdarovy ład žyćcia. Ale kazaŭ pry hetym, što chirurhu heta rabić vielmi składana.

— Nichto z daktaroŭ nie pracuje na staŭku. Chirurh zvyčajna pracuje na paŭtary-dźvie staŭki. A što heta takoje? Žyvieš uvieś čas u klinicy. Siaredniaja praciahłaść žyćcia ŭ chirurhaŭ 49 hadoŭ. Heta ž ekstremalnaja prafiesija. Kali dziažuryš nočču, kaho tolki nie pryvoziać. Rehularnyja stresy, niedasypańni, ale ty pavinien być zaŭsiody ŭ tonusie, — raspaviadaŭ jon.

Intaresy doktara Ciareščanki raspaściralisia značna šyrej, čym žurnalistyka i miedycyna. Jon usio žyćcio cikaviŭsia mastactvam — jaho zaŭsiody možna było sustreć na adkryćci novaj mastackaj vystavy ŭ Minsku. Taksama jon hanaryŭsia siabroŭstvam z mastakami Mikałajem Sielaščukom, Siarhiejem Cimochavym, Uładzimiram Zinkievičam, Valeryjem Słavukom, Uładzimiram Savičam i inšymi prykmietnymi tvorčymi fihurami ŭ Biełarusi.

• 3
• 0
• 2
• 4
• 1
• 54
• 6
• 0