Viačorka i Sańnikaŭ prakamientavali vydańniu The New York Times pamiłavańnie Pratasieviča
«Pierachod spadara Pratasieviča ad hieroja-pakutnika da nadta haniebnaha kałabaracyjanista — vielmi važnaja historyja, jakaja vučyć nas, nakolki žorstkimi byvajuć dyktatury, padobnyja da režymu Łukašenki».
Raman Pratasievič, jak piša 23 maja vydańnie The New York Times, staŭ simvałam baraćby za demakratyju, kali biełaruskija siłaviki aryštavali jaho, pasadziŭšy samalot Ryanair. Ciapier ža Pratasievič niečakana dla mnohich byŭ pamiłavany, a byłyja sajuźniki dahetul ličać jaho zdradnikam.
Na dumku vydańnia, paśla ŭsiaho taho, što adbyłosia z momantu aryštu Ramana Pratasieviča i Safii Sapiehi, siarod biełaruskich demakratyčnych siłaŭ isnuje šyroki kansensus nakont taho, što Pratasievič adviarnuŭsia ad ich i pierajšoŭ na bok Łukašenki.
U jakaści prykładu The New York Times pryvodzić słovy kandydata ŭ prezidenty 2010 hoda Andreja Sańnikava, jaki padčas telefonaha intervju vydańniu vielmi rezka vykazaŭsia ŭ dačynieńni da Pratasieviča.
«Kali łaska, nie chvalicie jaho jak zmahara za svabodu. Jon vielmi ciomnaja fihura va ŭsioj hetaj historyi. My nie chočam bolš nikoli čuć jaho imia. Jon zdradziŭ svajoj dziaŭčynie. Jon zdradziŭ svaim siabram i kaleham. Jon zdradziŭ usiamu demakratyčnamu ruchu», — skazaŭ Sańnikaŭ vydańniu The New York Times.
Taksama jon dadaŭ, što adnosna miakkaje abychodžańnie z Ramanam u paraŭnańni ź jaho byłoj dziaŭčynaj Safijaj paćvierdziła padazreńni, jakija daŭno isnavali ŭ niekatorych aktyvistaŭ demakratyčnych siłaŭ Biełarusi.
«Jon z samaha pačatku byŭ maryjanietkaj. My nikoli nie daviarali jamu. Ja skazaŭ siabram, kab jany nie mieli ź im nijakich spraŭ. Jość šmat ludziej, jakich chvalać, ale jakija nie apraŭdali čakańniaŭ. Nie stvarajcie hierojaŭ. Dastatkova prosta być prystojnym čałaviekam», — padkreśliŭ Sańnikaŭ.
Svajo mierkavańnie nakont Pratasieviča taksama vykazaŭ vydańniu i daradca Śviatłany Cichanoŭskaj Franak Viačorka. Jon abvinavaciŭ Ramana ŭ tym, što toj damohsia svajho pamiłavańnia mienavita dziakujučy supracoŭnictvu z KDB.
Na jaho dumku, takoje supracoŭnictva stavić pad udar dziasiatki i sotni ludziej, što vielmi składana daravać. Ale pry hetym Viačorka pieraściaroh publiku i ad pramoha hańbavańnia Pratasieviča.
«Pierachod spadara Pratasieviča ad hieroja-pakutnika da haniebnaha kałabaracyjanista — vielmi važnaja historyja, jakaja vučyć nas, nakolki žorstkimi byvajuć dyktatury, padobnyja da režymu Łukašenki. My nie viedajem, jakija katavańni jany ŭžyli suprać jaho, ale my bačyli jaho pa televizary i jon byŭ prosta źniščany. Jon vyhladaŭ vielmi niaščasnym, chvorym, źbitym, i jaho ŭvohule nie pavinna było tam być. Sam ja nie viedaju, jak by asabista pavioŭ siabie ŭ takoj situacyi», — raspavioŭ Viačorka ŭ kamientaryi dla New York Times.
Pamiłavańnie Ramana Pratasieviča, pa słovach Viačorki, źjaŭlajecca častkaj doŭhaj i brudnaj hulni biełaruskich uładaŭ pa zadušeńni inšadumstva, a taksama pakazvaje vydatny prykład taho, što choča bačyć Łukašenka ad usich svaich sapiernikaŭ.
«U vačach Łukašenki Raman staŭ łajalnym i pasłuchmianym čałaviekam. Łukašenka vielmi chacieŭ by, kab kožny palitviazień pavodziŭ siabie jak Raman. Pa sutnaści, Raman publična pryniziŭ siabie, i heta mienavita toje, što Łukašenka imkniecca pakazać ŭ jakaści ŭroka jaho inšym sapiernikam u vyhnańni», — adznačyŭ Viačorka.
Nahadajem, što da svajho pamiłavańnia Raman Pratasievič atrymaŭ pakarańnie ŭ vyhladzie 8 hadoŭ pazbaŭleńnia voli, ale pry hetym jon nie byŭ adrazu ŭziaty pad vartu. U toj ža čas jaho byłaja spadarožnica Safija Sapieha była adpraŭlenaja ŭ kałoniju na 6 hadoŭ i prosta ciapier čakaje rašeńnia pa svajoj ekstradycyi ŭ Rasiju.
Admietnaje toje, što niahledziačy na supracoŭnictva sa śledstvam, Safija pry padačy prašeńnia ab pamiłavańni, u adroźnieńnie ad Pratasieviča, atrymała admovu, što ŭžo prakamientavała jaje rodnaja ciotka.
Ciapier čytajuć
Ad 300 000 da 500 000 dalaraŭ. Stała viadoma, chto pryvioz Džejsana Deruła ŭ Biełaruś1
Kamientary