Francuzski piśmieńnik češskaha pachodžańnia Miłan Kundera pamior va ŭzroście 94 hadoŭ. Jon aŭtar znakamitaj «Nievynosnaj lohkaści byćcia».
Miłan Kundera naradziŭsia 1 krasavika 1929 hoda. Jaho baćka byŭ pijanistam, muzykaznaŭcam, rektaram univiersiteta ŭ Brno. Padčas vučoby ŭ siaredniaj škole Miłan Kundera napisaŭ pieršyja vieršy. Paśla Druhoj suśvietnaj vajny padpracoŭvaŭ roznarabočym i džazavym muzykam.
Kundera pačaŭ vučycca na fiłasofskim fakultecie Karłavaha ŭniviersiteta (Praha), vyvučaŭ muzykaznaŭstva, kino, litaraturu i estetyku, paśla dvuch siemiestraŭ pieravioŭsia na fakultet kino Pražskaj akademii muzyčnaha mastactva.
U 1953 hodzie apublikavaŭ svaju pieršuju knihu. U jaho pieršym ramanie «Žart» (1967) havorka idzie pra stanovišča češskaj intelihiencyi va ŭmovach savieckaj rečaisnaści. Paśla apieracyi «Dunaj» u žniŭni 1968 hoda Kundera prymaŭ udzieł u šerahu demanstracyj i schodaŭ pratestu, za što byŭ pazbaŭleny mahčymaści vykładać. Jaho knihi kanfiskavali z usich biblijatek Čechasłavakii.
U 1970 hodzie pa abvinavačvańni ŭ saŭdziele ŭ revalucyjnych padziejach byŭ paŭtorna vyklučany z partyi, jamu było zabaroniena publikavacca.
U 1975 hodzie Kunderu zaprasili ŭ jakaści prafiesara ŭ Renski ŭniviersitet (Francyja).
Čaćviorty raman Kundery «Kniha śmiechu i zabyćcia» (1978) ujaŭlaje saboj cykł ź niekalkich historyj i ese, abjadnanych ahulnymi piersanažami (Tamina, sam Kundera), temami i vobrazami (śmiech, anioły, Praha, seks). Za hetuju knihu ŭ 1979 hodzie čechasłavacki ŭrad pazbaviŭ piśmieńnika hramadzianstva. Nastupnyja ramany byli zabaronienyja dla vydańnia ŭ Čechasłavakii.
«Nievynosnaja lohkaść byćcia» — samy viadomy raman Kundery, napisany ŭ 1982 hodzie i ŭpieršyniu apublikavany ŭ 1984 hodzie ŭ Francyi ŭ pierakładzie na francuzskuju. Dziejańnie adbyvajecca ŭ 1968 hodzie ŭ Prazie.
Z pačatku 1990-ch hadoŭ Kundera pisaŭ pa-francuzsku.
U 2009 hodzie Kunderu prysvoili zvańnie hanarovaha hramadzianina jaho rodnaha horada Brno.
Kamientary