Tramp i kiraŭniki IT-kampanij padpisali pahadnieńnie ab kantroli za štučnym intelektam
Prezident ZŠA sustreŭsia z kiraŭnikami najbujniejšych kampanij — raspracoŭščykaŭ štučnaha intelektu — Google, Anthropic, Meta, OpenAI i xAI. Pa vynikach sustrečy było padpisana sumiesnaje pahadnieńnie ab kantroli za raźvićciom ŠI, piša DW.
Prezident ZŠA ŭ aŭtorak sustreŭsia ŭ Biełym domie ŭ Vašynhtonie z kiraŭnikami najbujniejšych kampanij, jakija zajmajucca raspracoŭkami ŭ halinie štučnaha intelektu, u tym liku Google, Anthropic, Meta, OpenAI, Nvidia i kampanii Iłana Maska xAI, jakaja ŭ pačatku hoda abjadnałasia ź inšaj jaho kampanijaj — kaśmičnaj SpaceX. Pa vynikach sustrečy było padpisana pahadnieńnie ab uzmacnieńni kantrolu za raźvićciom ŠI. Tramp apublikavaŭ dakumient u svajoj sacyjalnaj sietcy Truth Social.
Zhodna z dasiahnutymi damoŭlenaściami, kožnaja kampanija pavinna budzie stvaryć u siabie «nadziejnyja ŭnutranyja miechanizmy» dla manitorynhu mahčymaściaŭ svaich ŠI-madelaŭ i ich adpaviednaści standartam biaśpieki na etapach navučańnia i ŭkaranieńnia ŭ takich śfierach, jak kibierbiaśpieka, bijałahičnaja i chimičnaja biaśpieka. Vyjaŭlenyja ryzyki i prablemy pavinny likvidavacca.
Ad IT-kampanij taksama čakajecca supracoŭnictva ź niezaležnymi aŭdytarami i rehularny ŭdzieł u sumiesnych sustrečach, pryśviečanych vypracoŭcy standartaŭ i mietadaŭ pavyšeńnia biaśpieki sistem štučnaha intelektu.
Tramp zajaviŭ, što pahadnieńnie maje «maralnuju siłu» i nie padlahaje prymusovamu vykanańniu ŭ sudovym paradku. Adnak u dakumiencie prapisana, što «ź ciaham času moža ŭźniknuć nieabchodnaść zamacavać hetyja miery ŭ zakonach abo narmatyŭnych aktach».
19 vieraśnia prezident ZŠA abviaściŭ ab chutkim stvareńni śpiecyjalnych «sił štučnaha intelektu» — struktury, jakaja budzie zajmacca pytańniami ŠI.
Pry hetym Tramp paviedamiŭ, što nie źbirajecca pieraškadžać raźvićciu hetaj technałohii, ukaranieńnie jakoj jon nazvaŭ «nastupnaj pramysłovaj revalucyjaj». Kiraŭnik Biełaha doma padkreśliŭ, što choča, kab ZŠA praciahvali apiaredžvać Kitaj u śfiery ŠI.
Ciapier čytajuć
Padpałkoŭnika z fakulteta vajskovaj raźviedki sudziać za «zdradu dziaržavie» pa spravie, jakaja vyhladaje palityčnaj. Što pra jaho viadoma?6
Kamientary