«Ja ŭ žachu ad taho, što kožny dzień u damy ŭkraincaŭ laciać bomby». Zasnavalnik «Jandeksa» Arkadź Vołaž adkryta vystupiŭ suprać vajny va Ukrainie
Suzasnavalnik «Jandeksa» Arkadź Vołaž upieršyniu ź lutaha 2022 hoda apubličyŭ svaju pazicyju ab rasijskim uvarvańni va Ukrainu. Jaho zajavu publikujuć rasijskija ŚMI.
«Ja kateharyčna suprać varvarskaha ŭvarvańnia Rasii va Ukrainu, dzie ŭ mianie, jak i ŭ mnohich, jość siabry i svajaki. Ja ŭ žachu ad taho, što kožny dzień u damy ŭkraincaŭ laciać bomby», — zajaviŭ Vołaž.
«Było šmat pryčyn, ź jakich mnie davodziłasia maŭčać. Možna spračacca pra svoječasovaść majoj zajavy, ale nie pra jaje sutnaść. Ja suprać vajny», — havorycca ŭ zajavie.
Pavodle jahonych słoŭ, stvarajučy «Jandeks», «jon i jahonyja kalehi» vieryli, što budujuć novuju Rasiju — adkrytuju, prahresiŭnuju, intehravanuju ŭ hłabalnuju ekanomiku, viadomuju ŭ śviecie nie tolki svaimi syravinnymi resursami. Ale «z časam» jany zrazumieli, što kraina «nie śpiašajecca stanavicca častkaj hłabalnaha śvietu».
«Pry hetym cisk na kampaniju ros. Ale my nie zdavalisia, rabili ŭsio mahčymaje niahledziačy na vonkavyja ŭmovy. Ci zaŭsiody ŭdavałasia znajści pravilny bałans? Ciapier, azirajučysia nazad, zrazumieła, što niešta možna było b zrabić inakš», — napisaŭ jon.
Pavodle jaho słoŭ, niahledziačy na toje, što jon z 2014 hoda nie žyvie ŭ Rasii, jon razumieje, što i na im «jość dola adkaznaści za dziejańni krainy».
Vołaž vystupiŭ z hetaj zajavaj nieŭzabavie paśla taho, jak žurnalisty źviarnuli ŭvahu na bijahrafiju, apublikavanuju na asabistym sajcie biznesmiena.
U joj Vołaž nazvaŭ siabie izrailskim pradprymalnikam, jaki naradziŭsia ŭ Kazachstanie.
Rasija ŭ bijahrafii nie zhadvałasia ŭ jakaści krainy, dzie Vołaž pražyvaŭ i vioŭ biznes.
U červieni 2022 hoda Arkadź Vołaž trapiŭ pad jeŭrapiejskija sankcyi praz rasijskaje ŭvarvańnie va Ukrainu. Nieŭzabavie paśla hetaha jon pakinuŭ saviet dyrektaraŭ i pasadu hienieralnaha dyrektara hrupy kampanij «Jandeksa», a taksama kirujučyja pasady ŭ mižnarodnych daččynych strukturach hrupy, nahadvaje «Mieduza».
Cichanoŭskaja pra muža: Uvieś jahony śviet pierakuleny22
Kamientary