U Vialikabrytanii badziažny kot ukusiŭ mužčynu. Toj adrazu zaraziŭsia nieviadomaj navucy chvarobaj
U Vialikabrytanii 48-hadovy mužčyna, napeŭna, vyrašyŭ pahładzić kata, jakoha sustreŭ na vulicy. Žyviolinie takaja ideja nie spadabałasia, tamu kot pakusaŭ nieznajomca. Adnak nastupstvy sustrečy byli vielmi niečakanyja.
Jak piša navukovaje vydańnie Science Alert, reakcyja arhanizma mužčyny na ŭkus kotki była vielmi niezvyčajnaj. Za vosiem hadzin paśla incydentu ruki apuchli tak mocna, što achviara była vymušanaja źviarnucca da miedykaŭ.
«Tyja ačyścili i pieraviazali rany, a taksama zrabili mužčynie pryščepku ad słupniaku, paśla čaho adpuścili dadomu. Ale na nastupny dzień toj znoŭ viarnuŭsia: palcy na levaj ruce stali značna bolšyja, a pieradpleččy pačyrvanieli i apuchli. Daktaram daviałosia chirurhičnym čynam vydalać paškodžanuju skuru vakoł ran i ŭnutryvienna ŭvieści ažno try vidy antybijotykaŭ. Hetym razam lačeńnie dapamahło i pacyjent chutka ačuniaŭ», — raspaviadaje vydańnie Science Alert.
Tym časam lekary namahalisia vyśvietlić, što tak paŭpłyvałana na arhanizm mužčyny. Paśla analizu mikraarhanizmaŭ z rany ad ukusu kata jany vyjavili nieviadomy streptakokavy arhanizm. Streptakoki — heta bakteryi, jakija źjaŭlajucca pryčynaj takich zachvorvańniaŭ, jak mieninhit, pnieŭmanija, kanjunktyvit i jašče šmat čaho inšaha.
Adnak daśledčyki praanalizavali častku hienomu znojdzienaj bakteryi i apynułasia, što jon nie supadaje ź nivodnym z raniej zarehistravanych štamaŭ streptakokaŭ. Heta całkam novy mikrob, jaki raniej nikoli nie byŭ aficyjna zadakumientavany.
«Znojdzienaja bakteryja naležała da rodu hramstanoŭčych bakteryj Globicatella, čyjo poŭnaje siekvienavańnie (vyznačeńnie ŭsioj paśladoŭnaści DNK, rasšyfroŭka hienietyčnaha kodu) pakazała, što jana jak minimum na 20% adroźnivajecca ad inšych padobnych štamaŭ, što pakazvaje na jaje, jak na asobny vid», — adznačaje Science Alert.
Na ščaście, hety štam dobra reahavaŭ na antybijotyki, tamu chutka byŭ vyviedzieny z arhanizmu mužčyny, ale miedyki papiaredžvajuć pra niebiaśpieku sustreč z badziažnymi žyviołami. Sabaki, katy i inšyja mohuć być pieranosčykami niekatorych surjoznych patahienaŭ i pieradać ich ludziam. Kali na vas na vulicy napała badziačaja žyviolina, pramyjcie rany vadoj z myłam i nieadkładna źviarniciesia da doktara.
Pamiatajecie Piatrušu, jaki vydziraŭ draty «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja7
Pamiatajecie Piatrušu, jaki vydziraŭ draty «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja
«Paśla pieršaha zabojstva ź im raźviałasia žonka». Što viadoma pra šmatdzietnaha Siarhieja sa Stolinskaha rajona, jaki paśla vyzvaleńnia z kałonii zabiŭ troch čałaviek44
Kamientary